1 Fə̀rum aà mede gà ana i de a ya. Iye ana, i ziwe a gər gà tsìye? Iye mala meslire Mbulum asa tsìye? Dìte yàa ŋgat a Yesuw Batsàh kwa ŋa nda are gà mbàŋa tsìye? Kurum tserdze kà nwim gà mburma Mbulum ka, aɗàbà ìye, agəra ana ì ge megè ìmir a Yesuw Batsàh kwa ŋa ya. 2 Ku mege gà mìsle ŋgìɗ ta gə̀s ìye kàmala ana ìye mala meslire Mbulum tsìye tèkeɗè, i tə̀v kurum ka, kà sərum, ìye ka, mala meslire ŋgar ndzer. Kə̀ gə̀sum Yesuw Kiristi nda gə̀zlə̀ŋ ka, aɗàbà ana ì ɗif a kurum à bazlam ŋgwal ŋa ya. Aɗàbà taŋa, na a sər ba ka, ìye mala meslire ŋgar ndzer kaɗə̀ŋ a. 3 Na gà mburma ti yehe a bakal i tə̀v ga ya ka, araha na dukw ana i tsik a ter aaka a ya: 4 Duwa a riŋ a peliŋ a àhəm a, na i ŋget a dukw mezime nda dukw mese, aɗàbà megè ìmir gà ana ì gewa ya? 5 Kurum kə̀ gwaɗum ana, duwa a riŋ a peliŋ a àhəm a, na i zle a daala, dìte mìi sìweye akaba a i tə̀v ilik ŋa məmà, kàmala gà Piyer ana nda gà àsìŋ gà ɓə̀zla meslire Mbulum, nda gà dàmər Yesuw ta gewa ya ya? 6 Kurum kà dzalum ana, say mə̀r nda Barnabas ɗekɗek, na mì gewa megè ìmir, dìte mì gala dər ba mə̀r nda ahər mə̀r ŋa ya ya? 7 Wànà wele ana ŋgat sliwdze ya, a ge a megè ìmir gùvəl ana, aà taf pəra ya? Awaŋ. Dìte weke na, bə̀la aka fə̀t gùvàh, àlə̀ka duwa aka nàh ka, a zim a tsìye? A riŋ tsà. Weke na, à kìv a gà duwa ka, a ɗwits a àwàh ŋa, dìte a se a tsìye? A riŋ tsà asa. 8 Dukw aaha ì tsik a kurum ka, taŋa a dara ka, i madzàlà gà gər mburma ya ɗekɗek tsà. Tàa wetse i wàkità məpàlà àhəm Mbulum ka, kàmala taŋa ya mbàŋa. 9 Musa a wetse ka, a gwa: "Na sla a riŋ a gek a megè ìmir ka, ka ta tiker tikwirek aka bazlam tsà." Kà dzalum, Mbulum a tsik taŋa dze ana, agəra gà sla ya? 10 A tsik taŋa ana, aɗàbà kwa ìvaɗ tsìye? A tsik ka, aɗàbà kwa ndzer dukw ŋgar. Gà mala meslìgè daw nda mala masàsà ŋa ka, gà ŋgwal ŋa ndzer, na ti tike a madzàlà gà gər tar tserdze aka dukw ana ti ta ŋget a iɗəm dukw mayà ba tar a, aka miɗ a mbà ya. 11 Mì ɗif a kurum à vatwa Mbulum ka, kàmala ana ti slige duwa a gùvàh a. Dìte kà dzalum dze ana, na bə̀la mìi ŋget a dukw ana ika gər àhə̀ɗ a, i ahər kurum ana, ŋgwala tsìye? 12 Na gà àsìŋ gà mìsle ŋgìɗ ta wiz a dukw ana ti ndze a dər a, i tə̀v kurum ana, mə̀r mìi sle a mewize mbàŋa, a zè a dər biy tar ata tsìye? Ama màa wiz aà kurum duwa ilik tsìdze. Mì bàs gə̀zlə̀ŋ i mesèwère are ana a le aà mə̀r tserdze ya pəra mbàŋa, na dìte ka, mìi hìndìk a a vatwa a bazlam ŋgwal ŋa ata aka gər Yesuw Kiristi, mburma tì dzèr a zləm a tsìye. 13 Kurum kà sərum, gà na ta gewa megè ìmir i ga Mbulum batsàh ŋana ya ka, ta ŋgatawa dukw ana ti ndze a dər a, i huɗ dukw ana gà mburma tə dzàwa a fata ya. Gà na ta batsawa duwa a Mbulum a tèkeɗè, ta ŋgatawa iɗəm biy tar a mbàŋa, tà pèpìɗiŋa. 14 I tə̀v gà na ti tsik a bazlam ŋgwal ŋana a mburma ya mbàŋa ka, kàmala taŋa ya. Yesuw Kiristi Batsàh kwa ŋa a gwa ka: Say gà mburma tì dzè a duwa a gà na ti tsik a bazlam gà ya. 15 Ama ku mege kataya tèkeɗè, ìye ka, yàa wiz aà kurum duwa ilik tsìdze. Ku mege kinèhe, yàa gwaɗa a kurum ka, slirwimiŋara duwa ya ka, yàa tsik ɓàv tsà. Ŋgùlùm na ì mə̀t à may a ìvaɗ, na ndəna i wiz aà kurum a duwa ya. Aɗàbà wùra ilik ma tə nəs à dukw maŋgàyà ba gà ana a ŋgeyiŋ dər ba i gə̀zlə̀ŋ a tsà. 16 Metsìkè bazlam Mbulum ana i tsik a kurum a ya ka, aka viliŋ vatwa aà megè dər zlapa tsà, aɗàbà megè ìmir ata ka, i Mbulum na taŋa ya. Ŋgat na a gweɗiŋ, tsik a tar a. Aɗàbà bə̀la na yàa tsik a tar tsə̀ka, ndelèɓ ndelèɓ mesèwère are ika gər gà. 17 Na mege ì zla megè ìmir ata nda meweye gà ka, ana ka, ŋgùlùm ta viliŋ a dukw mayà ba gà zàakwa. Ama ì zla ka, nda meweye gà tsà. Iye ihər i ge a ka, ka ta gwaɗum nda mezìwè gà gər gà tsà, aɗàbà Mbulum na a viliŋ a ahər a. 18 Dukùla na a ne dukw mayà ba gà ata ya? Na a ne ka, bazlam ŋgwal ŋa ana i tsik a a mburma ka, biy taf, yàa wiz duwa tsìye. Vatwa a riŋ te ìbam, na ta viliŋ a duwa agəra bazlam ŋgwal ŋa ata i tsik a ter a ya. Ama ka, yàa gə̀s tsà. 19 Ku mege ìye ɓele wùra tsà tèkeɗè, àma ì həna à gər a bə̀ɗ aà menè ɓele mburma tserdze ìvaɗ, na dìte i zlèk a mburma, ti dere a hinne, tà gìs a Yesuw Kiristi nda gə̀zlə̀ŋ tar a. 20 Na bə̀la ìye riŋ ika màgə̀r gà Yahuda ya ka, i ndze a kàmala tar a mbàŋa, na dìte i zlèk a tar aà magə̀sà Yesuw Kiristi ana tà gə̀s nda gə̀zlə̀ŋ tar a. Məpàlà àhəm Musa ka, a kwere a ìye asa tsà seyiŋ, àma i tə̀v ana ìye riŋ i lìwiŋ gà na ti zezem a məpàlà àhəm ata ya ka, i ge a kàmala tar a mbàŋa, dìte na kìtseŋ kìtseŋ i gese a ter a ahər a tə̀v Yesuw Kiristi ya. 21 I tə̀v ana ìye riŋ ika màgə̀r gà mburma ana tə sər məpàlà àhəm Musa ata tsìye ka, ì gewa kàmala tar a mbàŋa, na dìte ka, i gese a ter a ahər aka miɗ Mbulum mbàŋa ya. Yàa gwa ka, i gìs a àhəm aà məpàlà àhəm Mbulum tsə̀ka, yàa tsik tsà, aɗàbà i zezem a ka, məpàlà àhəm Yesuw Kiristi ndzer dukw ŋgar. 22 Ama na ìye riŋ ika màgə̀r gà mburma ana tàa sime ika vatwa Mbulum zùkw tsìye ka, ì newa à ba gà kàmala tar a mbàŋa, na dìte i yehere a tar a tə̀v Mbulum a. Ku mege gà dukùla tèkeɗè ka, na yàa ndze a tə̀v tar ka, i ndze a kàmala tar a mbàŋa. I gewa dər kataya ka, aà dìte gà àsìŋ ŋana i lìwiŋ tar a, ta mbala, na mege a ge a ba ya. 23 Dukw ata i ge a tserdze ya ka, na dìte bazlam ŋgwal ŋana ma da aka miɗ aka miɗ a. A sèsiŋ ka, i ŋget a dər mipìsè àhəm Mbulum ana a pisiŋ a ya, mə̀r nda gà àsìŋ gà mburma ana ta gə̀s bazlam ata tserdze mbàŋa ya. 24 Kurum kà sərum, gà mburma hinne na tì dzèr a ba aà mivele sah lèlè ya. Ama ə̀lə̀k ti ndze a a tə̀v ana tì tìz aɗəm a ya ka, mburma ilik pəra na à lèh a, à zè a dər gà biy ŋgìɗ aaha ya. Ŋgat ka, a ŋget a dukw mayà ba ŋgar. Aɗàbà taŋa, ìye ihər i tsik a kuruməŋa: Mərum àba, kàmala gà ɓə̀zla metìze ata ya, dìte na ki ŋgetwim a dukw mayà ba kurum a. 25 Wùr ana a sàsar a vel a sah lèlè ya ka, a tike a ndzə̀ɗa aka ba ŋgar, kilɓesl kilɓesl à tètìɗ a à mile ŋgar dzekwiŋ, na dìte à zè a dər gà biy ŋgìɗ aaha, a ŋget a dukw mayà ba ŋgar a. Dukw mayà ba ŋgar ata kəla ka, kwiɗèy à ndìviŋa, a ndze a hinne tsà. Ama kwa kinèhe ka, tàtə̀ɗakwa à mile ika vatwa Mbulum, na dìte ki ŋgetekwe a dukw mayà ba ana a ndze a aà biybiy a. 26 Aɗàbà taŋa, ìye ihər i vel a ka, kàmala wele ana a vel a sah lèlè ya. Dìte ìye tèkeɗè ìbam, i mir a à ba ika vatwa Mbulum kataya mbàŋa kàmala wele ana duzl a ge a madugwazlà ahər a mburma ka, a mè a a bə̀ɗ taf masak ŋa tsìye. 27 I gìzl a ba gà nda ahər gà ŋa, dìte na à gìs aà ìye a àhəm a. Aɗàbà a sèsiŋ ka, ìye na i zal a bə̀ɗ aà megè dukw ata ya, dìte ka, i ndze a iɗəm a bə̀ɗ a ka, a ge a ba tsà. Kàmala taŋa ya, a pat sèriyè Mbulum ka, ma ta mà à ìye a dəba tsà, na ìye ana ì ɗif à bazlam ŋgar a mburma ya.
