Matoosa 7

1“Inte bolla pirdetonta mala hara asa bolla pirdofte. 2Inte pirdida mala inte bollakka pirdettana. Inte makkida miishara intes makettana. 3Ne ayfen diza gita mitha beyonta dashe ne isha ayfen diza qeeri buura aazas xeellay? 4Ne ayfen gita mithi dishin ne isha ‘Ane ta ne ayfeppe qeeri buurayo kessays’ gaanas waana dandayay? 5Neno qoodheppe qommon hanizaysso kasetada ne ayfen diza gita mitha kessaycha. Hessafe kaallada ne isha ayfen diza buura kessanas lo7etha xeellandasa. 6Ba tohon yedhonta malanne simmidi intena saxi daakerethonta mala anjettidayssa kanata sinthan yeggofte; qasse inte worqakka guddunthata sinthan yeggofte. 7“Woossite intes imettana; koyite inte demmana; kare qoxite intes doyettana. 8Woossida ubbas imettana; koyiza asi demmana; qoxizades karey doyettana. 9Inte giddofe issades nay uketh woossikko shuch immiza aaway dandee? 10Woykko mole woossikko shoosh immizadey dandee? 11Histin inte iitata gidi uttidi inte naytas lo7o miish imo erizayta gidikko inte salo Aaway iza woossizaytas waanidi aadhdhiza lo7o miish imenee? 12Hessa gish hara asi intes ooththana mala inte koyizayssa, inteka haratas ooththite. Muse wogaynne nabeti hayssan kuuyettes. 13“Xuuntha pengera gelite; dhayoso efiza ogey gita; pengeykka aaho; daro asay he pengezara gelees. 14De7os gaththiza ogey gidikko xuuntha; pengeykka xuuntha; gelanaytikka guuthata xalala. 15“Istas giddo baggay Kana suyte mala gidi uttidinne dorsa ite may7idi inte giddo gelidi giddora ooththiza wordo nabetappe naagettite. 16Inte ista, ista ooson erandeta. Aguntha worappe woyney, kindicho agunthafe balase ayfey maxetizee? 17Hessathoka lo7o mithi wuri lo7o ayfees; iita mithika iita ayfe ayfees. 18Lo7o mithi iita ayfe ayfanas dandayontayssa mala iita mithi lo7o ayfe ayfanas dandayenna. 19Lo7o ayfe ayfonta mithi wurikka qanxetananne taman yegettana. 20Hessa gish inte ista isti ayfiza ayfen shaakki erana. 21“Salon diza ta Aawa shene polonta dishe tana ‘Godo! Godo!’ gizay wuri Salo Kawoteth gelenna. 22He gallas daroti ‘Godo! Godo! Nuni ne sunthan tinbite yootibekonii? Ne sunthan daydanthi kessibekonii? Ne sunthan daro malata ooththibekonii?’ gaana. 23He wode ta istas ‘Ta intena mulekka erikke! Inte iitati taappe haakkite’ gaada qoncera ta istas yootana. 24“Histikko hayssa ta qaala siydi ooson peyshizadey ba keeththe zaalla bolla keexizade misatees. 25Deexo iray bukkin; haroyka harottides; carkoyka carkides; keeththaka sugides shin zaalla bolla keexettida gish kundibenna. 26“Hayssa ta qaala siydi ooththontadey gidikko ba keeththe ace bolla keexida eeya asa mala. 27Deexo iray bukkin haroyka harottides; carkoyka carkides; he keeththaka sugides; keeththayka iita kundeth kundides” gides. 28Yesusi tamarsi wursin asay iza timirtezan malalettides. 29Gaasoyka Muse woga tamarsizayta mala gidonta izi godateththi diza asa mala tamarsides.

will be added

X\