Matoosa 14

1He wode Galila dere haariza Herdoosi asay Yesusa nashizayssa siydes. 2Herdoosi ba ashkaratas “Hessa gidikko, Xammaqiza Yohannisi hayqoppe dendidi yides guussakka! Hayssi wuri gita malatay iza kushen oosettizay hessassa” gides. 3Herdoosi ba isha Piliphoosa macho Herodiyadi gaason Yohannisa oythidi qasho keeththan yeggides. 4Gaasoyka Yohannisi Herdoosa “Ne izo ekkana mala woga gidenna gida gishassa” gides. 5Herdoosikka Yohannisa wodhanas koyishin asay Yohannisa nabe mala xeelliza gish babbides. 6Herdoosi ba yeletetha gallas Herodiyadi naya yethan iza ufayssida gish naya iza oychidaz ubba immanas izis caaqides. 8Nayakka aayey zoren “Xammaqiza Yohannisa hu7e keren wothada ha7i hannin taas imma” gadus. 9He wode kawozi izas mishettides. Gido attin caaqida gishshinne izara diza imathata gish giidi nay oyshoy polettana mala azazides. 10Kiittidinne Yohannisa woyne keeththan dishin qoodhe qanxisides. 11Qanxetida hu7eza keren woththidi nays immida. Nayakka ekkada ba aayeys immadus. 12Yohannisa kaallizayti iza aha ekkidi moogidinne hanidayssa ubba Yesusas yootida. 13Hessa siyida mala Yesusi kase ba dizaso aggidinne wogolon gelidi barka hara asi bayndaso bides. Dereyka hessa siydi katamay dizasoppe tohora iza kaallides. 14Yesusikka wogolozappe wodhdhishe daro asa beyidi asas mishettides. Saketizaytaka pathides. 15Gadey qammi qammi bizayssa beyidi iza kaallizayti izakko shiiqidi “Hayssi nu dizasoy bazzo; gadeyka qammi qammi biza gish gede gutatan gutatan biidi baasi maanaz shammana mala asaa yedda” gida. 16Gido attin Yesusikka ista “Inte asas maanaz immite attin asay baanas koshshenna” gides. 17Istika izas zaaridi “Hayssan nuus ichashu ukethinne nam7u moleppe attin haray baawa” gida. 18Izikka ista “Ane heyta dizayta haa taas ekki yiite” gides. 19Qasseka asay maata bolla uttana mala azazides. Ichashu ukethanne nam7u moleta ba kushen oykkidi ba ayfe pude salo dhoqu histi galatidi, uketha menthi bana kaallizaytas immides. Istika asaas immida. 20Asay wurikka miidi kallides. Hessafe guye iza kaallizayti asaappe mishin attidayssa tammanne nam7u leemate kumeth shiishida. 21Mida asay macasattinne guutha nayti gujettonta attumasay xalala ichashu shi gidana. 22Heerakka iza kaallizayti wogolon gelidi gede pinth izappe kasetidi pinana mala azazidi asa moyzanas baassi guye attides. 23Dereza moyzidappe guye woossa woossanas barka zuma bolla kezides. Gadey dhuminka yaan zuma bolla barka dees. 24Hessa wode wogoloya abba kantha bishin dambalay dendidi daro metotho oykkides. 25Qamappe koyro kuttoy baqqishin Yesusi abba bollara hamutidi iza kaallizayti dizaso yides. 26Yesusa kaallizaytikka izi abba bollara hamuti yishin beyi babbida gish iza moytile giidinne waassida. 27Yesusi heerakka “Aykkoy ba! Tanakko; babbofte!” gides. 28Phexroosi “Godo! Nena gidikko ta abba bollara hamutada neekko baana mala tana azaza” gides. 29Yesusi iza “Haaya!” gides. Phexroosikka wogolozappe wodhdhidi haaththa bollara hamutidi Yesusakko yides. 30Gido attin carkoza wolqa biyidi babbida gish haaththan miteteth oykkidi “Godo! Tana ashsha!” gi waassides. 31Yesusi heerakka ba kushe yeddi oykkidi “Neno, ammanoy paccidaysso! Aazas sidhadii?” gides. 32Yesusinne Phexroosi wogolozan gelida mala carkoy sirph gides. 33Hessafe guye wogolon dizayti “Neni tumu Xoossa Naa!” giidi izas goynnida. 34Yesusinne iza kaallizayti abba pinnidi Gensereexe geetettizaso gakkida. 35Heen dizayti Yesusa gididayssa eridi, he heeran yuuyi aadhdhanas diza asaas kiita yeddida. Asaykka harganchata ubba Yesusakko ehides. 36Harganchati iza afala xeera xalala bochchana mala Yesusa woossida. Bochchidayti wurikka paxida.

will be added

X\