RÓM̀ 9 - Gokana - 1996 Edition - Bible.is

1 M̀ ló kà kà bel dì belí nen e m zọ Kráìst gbaa ló. Nà nyíe, e Nyómá Káí gé lẹẹlà bel ló, élá nen di tõ̀ò nèm̄ kọ ním̄ gé kpọ́ kyáá bel, 2 kọ nyíem̄ ólò palà ge bììlà kilma ló pá ńda gbò, e e gbáà dú m t̃ẽ̀ènè kà mii. 3 Boo bée baala, à gá è dú nà bùlà kọ Bàrì á tumí pọ́lọ́ múú kyáá nèm̄ vaá kpòòlàm̄ lọl ló Kráìst. 4 Baala pá Ízràẹ̀l e Bàrì beè túva naamá pá ńlẹ nvín vaá à tú a dù̃ùnè zogèva. A beè zilági zíl nèva vaá nèva Log. À noomàva sĩ́ deè e bà é fã̀e vaá zìgàgì zìgà nèva. 5 Bà dú kúúlí túá kpãa gbò nómá tẹ̀a, vaá Kráìst beè mèà dú nen aa m ba mana mana. Lèèlà á dì nè ẹlẹ, Bàrì, e a gé lẹẹlà bel ló dénè nu, dọ̀ dèdè! Á dì naa vó. 6 Ním̄ gé kọ Bàrì náa náa nu e a beè zìgà. Boo bée kọ níì dénè gbò e bà aa mana mana Ízràẹ̀l ní e bà dú pá Ízràẹ̀l e nì, 7 à bè ge kọ dénè nen e a dú mana mana Ébràhàm dú gbò nvín Bàrì. Bàrì beè kọ́ nè Ébràhàm kọ, “Gbò nvín e Áízèk bon ní e bà é dú pá o nvín é.” 8 Níí náa kọ níì dénè gbò pá nvín e Ébràhàm bon ní e bà dú gbò nvín Bàrì e nì. Tãa vó, gbò pá nvín e bà mèà tení aa lo zìgà e Bàrì beè zìgà nè Ébràhàma ní e bà dú gbò nvín Bàrì e. 9 Nee gbò mon bel e Bàrì beè lò tṍó e a beè zigà nuáí, “Kpenà vóí nyàn, m̀ é ooà kẽ dú vaá Sẹ́rà é man nvín pá gbálà.” 10 Níì áá vó nì. T̃ẽ̀ènè kà tẹ̀, e a náámá bẹẹ tẹ̀ Áízèk, ní e a è dú tẹ̀ pálàa kà nvín Rebẹ́kà e. 11 Sõò be sĩ́ bà kalá mèà, be sĩ́ bà kalá naa lé à bè pọ́lọ́, Bàrì beè kọ́ nè ba kà kọ, “Ńpọ̀b é dú gyóòlo nè ńkem.” Níí zógè kọ à dú nu e Bàrì beè noo sẹlẹ́ kẽ ge sà ene nen gbàà pálàa kà nvíní--níì boo bée tóm e bà sí nì, sõò boo bée a kól. 13 Dì belí bé e a ẽ́á m Kpá Káí naa kọ, “M̀ vulè Jékọ̀b, vaá m̀ ọ́vi Ísọ̀.” 14 É kọ è é gboó kọ Bàrì náa náa lèlà nu lẹí? Níì vó nì! 15 Boo bée kọ Bàrì beè kọ́ nè Mózìs kọ, “M̀ é ié sàn nyíe ló nen e a léémám̄ gè iée sàn nyíe ló, vaá m̀ tó sàn nen e a léémám̄ gè tóe sàn.” 16 Vóá à naa, ge kọ Bàrì sa nen náa dẹẹà boo bùlà e a di m nená à bè bé e a pììgà naa; tãa vó, à dẹẹà boo sàn nyíe e Bàrì iée ló. 17 Boo bée kọ Kpá Káí kọ Bàrì kọ́ nè Fẹ́rò kọ, “Ge tú nà kpóó tẹlẹ bàlà kẽ tení dúní ló vaá naa kọ dénè bàlà boo á nyímám̄ ló, níá lèlà nu e m beè nyoone vaá túni naamá méné é.” 18 Vóá à naa, Bàrì ólò ié sàn nyíe ló nen e a léémáe gè iée sàn nyíe ló, vaá à agẹlẹ nyíe nen e a léémáe gè naa kọ nyíee á àgà. 19 Ò é láá gboó bĩinám̄ kọ, “Be níí bé e a dì naa é, à é tení náà vaá Bàrì láá kọ bel nen kọ nen náa gbànìe tṍ ló é? Mée ní e a é láá bé bùlà Bàrì é?” 20 Sõò olo mée, e nen, e o é láá bĩiná bel Bàrì é? É kọ ńbã́ sãa é láá bĩiná bel nen dèm bã́ e a è dèmìe kọ, “À náà vaá ò dèmim̄ naa vóí é?” 21 Nen dèm bã́ íe kói gè tú sãa bã́ dèmmà bàà íb bã́, be à léémáe--ene kà ní gè nvèè ka ló, na kàa ní gè símá kọ̀láá íb tòm. 22 T̃ẽ̀ènè báá bé e a dìnà gé naa ló Bàrì e. A beè gbĩ́ gè tú a sṹg tẹlẹ bàlà kẽ vaá naa ní e gbò nen é nyímá ló a kpóó. Boo bée vó, a beè palà ge ì̃ìmà lab dògò gbò e a é tú a sṹg beemáva bel ló, e bà bọ́ ló gè kọ Bàrì á kyọ̀va sĩ́. 23 Vaá a beè gbĩ́ gè túna gé a gbele dù̃ùnè tẹlẹ bàlà kẽ. A è tú sìgà dù̃ùnèi nè beele, e e dú gbò e a iéi sàn nyíe lóí, e a è noo gbẹẹ kẽ kọ è é dõonàè a kaí. 24 Boo bée kọ beele ní gbò e a è kolí lọl zẹ̀ẹ̀ pá Júù nè gbò e bè níì pá Júù nì e. 25 Nee bé e Bàrì beè kọ́ naa m Kpá Hozíài: “Gbò e bà náa beè dú pá ńda gbò, m̀ é kolíva: ʽPá ńda gbò.’ Kpá dó e nda ním beè vùlè, m̀ é kolíva: ʽPá gbò e m vulè.’ 26 Vaá kà lèlà pá kĩ e Bàrì beè kọ́ nèva kọ: ʽBoolo níì pá ńda gbò nìa,’ pá kĩé ní e Bàrì, e a di dùm, é kolíva pá ńlẹ nvín é.” 27 Vaá Aizáíà beè kọna gé kilma ló pá Ízràẹ̀l kọ: “Náa kal ló bée kọ pá Ízràẹ̀l bọọ gã́ bug belí ẹ́ẹ́ sãa e a di gã́ pene, gbálà ńgbṍ dẽe ọ̀và ní e bà é duuà e. 28 Boo bée kọ Bàrì é valẹ bá tú agẹ bá beemá bel ló zivè kà bàlà booí.” 29 À dì belí bé e Aizáíà beè zẹ́ẹ́ kọá kọ: “Be Dõò gbò bé náa beè sigè sìgà pá bẹẹ mana mana, è gá è belí pá Sọ́dàm, vaá è gá è belí pá Gọmọ́rà.” 30 Nee nu e e gé kọ́í, kọ mè Bàrì léèvè bel gbò e bè níì pá Júù nì tení dú ló gè kọ bà dẹlẹ́e nyíe boo, náa kal ló bée kọ bà náa géè gbĩ́ gè naa ní e Bàrì é léèvèèva bel. 31 Sõò pá Ízràẹ̀l, e bà géè gbĩ́ log e bà é láá sẹlẹ vaá Bàrì tení dú ló vó léèvèva belá, bà náa è gbĩ́ mòn. 32 À náà và vaá à dì naa vó é? Boo bée kọ bà náa beè dọ̀ bẹ̀là ge dẹlẹ nyíe boo Kráìst, sõò ba è dọ̀ bẹ̀là ba tóm. “Kpò dem kum tọ ló dọ̀a” beè sivèva. 33 Kpá Káí ló bel kilma ló kpò demá kọ: “Ẹvii, m̀ tú ene kà kpò dem nvee kẽ gbẹá Záíọ̀n. Kpò demí é dú kúm e a é sívè gbò nen, dem e bà é ténigí boo dọ̀. Nen e a dẹlẹ́e nyíe boo náa é íe sĩ́ kẹ́ẹ tọ́ọ̀ dee.”

RÓM̀ 9 - Gokana - 1996 Edition - Bible.is - GKNIBS

Annotations