RÓM̀ 12 - Gokana - 1996 Edition - Bible.is

1 Vóá à naa, e pá vígà, boo bée bé e sàn nyíe e Bàrì íeí ló bọọ naa, m̀ palà ge bànii kọ ó túi bọọ ló nèi Bàrì dì belí nu e a di dùm e bà váámá gyọ́ọ nè Bàrì. Tõonii káí vaá ò náanii nu e a é léémáe. Níí lèlà sĩ́ deè ge fã̀ Bàrì e. 2 Ó gá naanii nu m sĩ́ deè e pá bàlà booí ólò náa nu, sõò sọi tọ deè kọ Bàrì á nyaanàè bọọ dùm tení domá ló gè naa kọ bọọ bug togó á dú ãa. Na tṍó sõò, ò é gboó láá nyimai bùlà Bàrì, nu e a dú lé vaá léémá Bàrì nè nu e a bọ́ ló. 3 Vaá boo bée dõ̀ò nu e Bàrì beè nèm̄ tení dú ló a sàn nyíe, m̀ kọ nè kọ̀láá bọ̀ì kọ: Ó gá ẹ̀b o ló bọ̀ọ̀vẹ̀ èlmà bé e a bọ́ ló naa. Tãa vó, tú bùlà e a kil kẽ beemá bel ló o bá, nyòòmà bé e Bàrì náa kọ ó dẹlẹ́e nyíe boo naa. 4 È íè gã́ bug ke tõ̀ò e a di ló nom kpá ló nen, sõò bu ke tõ̀ò ólò sí kele kele íb tóm. 5 T̃ẽ̀ènè báá, dénè bẹ̀ì tení dú ló bẹẹ gè gbaa ló Kráìst dú t̃ẽ̀ènè kà nom kpá ló. Náa kal ló bée kọ è dú gã́ bug gbò nen, dénè bẹ̀ì gbáà gbaá ló ene dì belí bé e kele kele íb ke tõ̀ò e a di ló nom kpá ló nen gbaá ló ene vaá dú t̃ẽ̀ènè kà naaá. 6 Vóá à naa, naanii mè é tú kele kele íb dõ̀ò nu e Bàrì beè nè bu bẹ̀ì simá tóm e a zọ ló sàn nyíe e Bàrì beè iéí ló gbõ̀ònà. Be dõ̀ò nu ge kọ́ a bulà ní e Bàrì beè nè nen é, á kọ́ nyòòmà bé e a dẹlẹ̀ nyíe boo Bàrì naa. 7 Be ge nvèè bá tóm, á kil sĩ́ gè nvèè bá. Be ge dò bá nu, á kil sĩ́ gè dò bá. 8 Be ge nè agẹ nyíe dõòna gbò nen, á naa naa vó. Be ge dõo nu e a ié nè dõòna gbò, á taalẹ báe dõo. Be ge tulè gbò nen, á nvèà kpóó lóe. Be ge ié sàn nyíe ló dõòna gbò nen, á tú taaà ló bulà naamá. 9 Ó gá sẹlẹi ló belí kọ ò vulèi nen, boo tṍó e bè nóo vulèie. Ọvii pọ́lọ́ nu vaá ò biilii bá ló nu e a dú lé. 10 Vulèi ene dì belí bé e a bọ́ ló kọ gbò vígà m Kráìst á vùlè ene naa, vaá ò nveenii ka ló ene èlmà bé e o nveènii ka ló bọọ bá naa. 11 Lói á gá ọọ e a kil ló gè sí tóm. Tui dénè bọọ nyíe simai tóm nèi Dõò. 12 Ṍi kààgai m bọọ ból dẽe sĩ́, ì̃ìmai tãàga, vaá ò tãàgai ló Bàrì lee. 13 Dõonii nu e o íèì nei gbò nvín Bàrì e bíí dìva ló. Kolii kyáà. 14 Tãàgai ló Bàrì mái gbò e bà biigèi ló, kọ Bàrì á tãanèva dee bá, níì ge kọ á tumí pọ́lọ́ múú kyáá nèva nì. 15 Zọi gbò e bà gé ṍ kààga ṍi kààgai, vaá ò zọ̀i gbò e bà gé tó toi. 16 Tõonii ló ene m kù̃ùnà mòn. Ó gá dalài kpá ló boo, sõò zọi gbò e bà kil kẽ naai nu. Ó gá ẹvii bọọ bá belii kọ ò nyímài nu. 17 Ó gá tui pọ́lọ́ kpẽmai pọ́lọ́ nèi nen. Naanii nu e a é lèlà kè sĩ́ dénè nen. 18 Piigai gè monii kọ, kilma kĩ e boolo dì, mè ò zọ̀i dénè gbò nen tõonii m fẹ́ẹ́ fẹẹ̀ ló. 19 Pá ńda kóò, ó gá kpẽi pọ́lọ́ e nen síi. Tãa vó, ò sọi tọ deè kọ Bàrì á kp̃ẽ̀. Boo bée kọ Kpá Káí kọ, “Nda ní e a kuu gè kpẽ́ pọ́lọ́ é, m̀ é òòmà kẽ pọ́lọ́ e nen sí dõòna nen nèe,” bé e Dõò Bàrì kọ́ é. 20 Tãa vó, ò náanii dì belí bé e Kpá Káí kọ́ naa kọ: “Be tá kói tá ló o nen ọ́b, ò nèe gyã́á; be múú tànie, ò nèe múú á õ̀. Boo bée kọ tṍó e o naa vóí, ò síimàe kẹ́ẹ.” 21 Ó gá tomii kọ pọ́lọ́ á èlìèi bá. Tãa vó, ò túi lé elmai bá pọ́lọ́.

RÓM̀ 12 - Gokana - 1996 Edition - Bible.is - GKNIBS

Annotations