KÙÙÀ NU 2 - Gokana - 1996 Edition - Bible.is

1 “Emí má nyómá tóm e a gé ku dẽe ló nà bõ̀òna ló e a di Ẹ́fẹ̀sọ̀s kọ: Nen e a síi bá ló àlàbà kà gyã́à káála sẹ̀ẹ̀a bá lèe vaá à gé kyãa gbàà àlàbà kà nu ge mùn sã́ sẹlẹ́ boo e bà tú nóo kpé dèmmàa, kọ́: 2 M̀ nyímà dénè nu e o gé náa, o õ̀ònà kyẹ̀ẹ̀lẹ̀ pì̃, nè bé e o agẹ̀lẹ̀ ló ĩimà dénè nu naa. M̀ nyímà kọ nóo ólò nè deè gbò pọ́lọ́. O beè dò gbò e bà kpọ́á kyáá bel ló kọ baala gbò e nda beè lẹ̀ẹ̀là, vaá ò mòn kọ bà kpọ́ kyáá bel. 3 Ò ì̃ìmà vaá mòn tãàgà boo nà bée, vaá lóni náa ọọ. 4 Sõò nu e m íè kìlmàní ló kọlà vóí: Nóo vulènàm̄ belí kà túá bólá. 5 Boo bée vó, kẽea boo bé e o beè dì naa bé ò kalá dọ̀! Ọgá vaá ò gé tõo belí bé e o beè dì naa túá bólá. Be níì vó nì, m̀ é dúní ló gé tú o nu ge mùn sã́ sẹlẹ́ boo lọl a dọ̀, áá be kọ ó ọ́gá. 6 Sõò ene kà lé nu e m gbĩ́ mònní ló kọ̀là vóí: Ò ọ́vì nu e pá Nikaláọ̀s gé náa, belí bé e nda ọ́vì naa. 7 Nen e a íe tṍ á dã́ nu e Nyómá Káí gé kọ́ nè bõ̀òna ló Kráìst! M̀ é nè kpóó nen e a bé èl bá kọ á dé ból e a dú boo té dùm e a di m gba be Bàrì. 8 “Emí má nyómá tóm e a gé ku dẽe ló bõ̀òna ló Kráìst e a di Smáánà kọ: Nen e a dú dàlà togó nè ke kùbmà, e a beè ù vaá à kpáá di dùm, kọ́: 9 Nda nyímà o mòn tãàgà. M̀ nyímà tãa e a dìní dẽe--sõò ọ̀ọ̀ pá méné! M̀ nyímà bé e gbò e bà gé kpọ́á kyáá bel ló kọ baala pá Júù vaá ọ̀và níì ẹ̀ẹ̀ nì gé lóni pọ́lọ́ bel ló naa. Ọ̀và bõ̀òna ló gbò e a kuu Sétàn! 10 Pọ̀ á gá siíni ló tãàgà e o é gé tení bá. Ẹ̀b, mè Pọ́lọ́ Nyómá é gé tú sìgà bọ̀ì nvee kpọ́gọ́lọ́ naamá ge dòài, vaá ò é túi òb dee monmai tãàgà. Kà bè à dọ bel ú ò élá àgàlà, mè nda é néni dùm naamá o pẹ̀gẹ̀lẹ̀ bé èl bá. 11 Nen e a íe tṍ á dã́ nu e Nyómá Káí gé kọ́ nè bõ̀òna ló Kráìst! Nen e a bé èl bá náa é bãna bá tãàgà ní e a égè bàà tóm ú. 12 “Emí má nyómá tóm e a gé ku dẽe ló nà bõ̀òna ló e a di Páágàmàm kọ: Nen e a íe bàà sĩ́ gẹ̀ bé e a tóvíá kọ: 13 M̀ nyímà kĩ e o tõoá, kọ à dú kĩ e Sétàn tõo lẹ̀ẹ̀là bel. Ò bii bá ló nà bée, vaá nóo beè àmà sàn kọ ò ólò dẹlẹ̀em̄ nyíe boo, bãànà tṍó Ántìpàs e a dú nà nen di tõ̀ò e a bọ́ ló dẹ̀lẹ̀ nyíe boo vaá ba è fẹ́e gbẹáí zẹ̀ẹ̀, kĩ e Pọ́lọ́ Nyómá tõoá. 14 Sõò à íè nu e m íè kìlmàní ló: Ò íè gbò e bà síi bá ló dò bá nu Bélàm, e a dú nen e a beè noomà Bélàk kọ á dàgẹ̀ pá Ízràẹ̀l kọ bà á bà nom e ba è vaamá gyọ́ọ nè gbò ńbàlì e bà náàmà bá, vaá kúná gã̀. 15 Vóá bé e o íènà gé gbò e bà síi bá ló dò bá nu pá Nikaláọ̀s naa é. 16 Gboó ọgá! Be níì vó nì, m̀ é dú boo gbala gbala vaá tú kpóó gẹ̀ e a dúm̄ gã́ bemáva. 17 Nen e a íe tṍ á dã́ nu e Nyómá Káí gé kọ́ nè bõ̀òna ló Kráìst! Nen e a bé èl bá, nda é tú gyã́á e a kọla mánà, e a beè dú gè gṍ sẹlẹá, nèe. M̀ é nenàe gé ẹ́ẹ́ báà dem e bà émí ãa bée boo, vaá áá nen e demá bã́ bá ní e a nyímá bée e a di boo é. 18 “Emí má nyómá tóm e a gé ku dẽe ló nà bõ̀òna ló e a di Taiatáírà kọ: Sã́áná Bàrì, e súú dẽée sẹlẹ dẽe sã́ e a gé bẹ́, vaá ká tọe à mò belí nóo nóò kpọ́gọ́lọ́ e bà tẹ́lẹ̀ nóo ló, kọ́: 19 M̀ nyímà dénè nu e o gé náa, nè bé e o íè vulà naa, nè bé e o dẹlẹ̀ nyíe boo Bàrì naa, nè bé e o láá sí tóm vaá agẹlẹ ló ì̃ìmà nu naa. M̀ nyímà kọ ò gé palà ge sí tóm kátogóí èl kà túá bólá. 20 Sõò nu e m íè kìlmàní ló kọlà vóí: Ò sọ tọ deè nè pá bia e a kọlà Jẹ́zàbẹ̀la, e a kpọ́á kyáá bel ló kọ ẹlẹ nen kọ́ bùlà Bàrì, kọ á noomà vaá gyue pá ńda gyóòlo kọ bà á kuná gã̀ vaá dé nu e ba è vaamá gyọ́ọ nè gbò ńbàlì e bà náàmà bá. 21 M beè nèe tṍó kọ á ọgá, sõò náa gbĩ́ ge aa ló gè kuná gã̀. 22 Ẹ̀b èé, mè m̀ é gé tovíe tẹlẹ boo vái vaá tú gbò e a géè kunáe nè ẹ̀ẹ̀ nvee m gbele agẹ bá kpọ̀ té, áá be bà á ọ́gá ló dénè pọ́lọ́ nu e ba è zọ̀e naaá. 23 M̀ é fẹ́ dénè pá a nvín, vaá dénè nà bõ̀òna ló é gboó nyimá kọ nda ní e m ólò gbĩ́ nu e nen gé bugi togó boo nè nu e a dìé nyíe tẹlẹ bàlà kẽ é. M̀ é kpẽ́ nè bu nen di belí bé e a beè sí tóm naa. 24 Sõò kùbmà boolo e o sígàì e o dií Taiatáírà, e bè nóo túì na kà pọ́lọ́ dò bá nuí, vaá ò gáà noi nu e na gbòa kólíe ke kùb e a di ló Sétàn, m̀ kọ́ nè boolo kọ ním nveenài tọ́ọ̀ kà tóm bá-- 25 áá gè kọ ó biilii bá ló nu e a dìí bá dọ̀mà tṍó e m é dú. 26 Nen e a bé èl bá vaá láá sii bá ló nà tóm inmá kùbmà, m̀ é née kpóó kọ á lẹ̀ẹ̀là bel ló bàlà boo, 27 dì belí bé e nda beè ié kpóó gè lẹ̀ẹ̀mà bel lọl bá nà Tẹ̀ naa. À é tú túm e bà náàmà kpọ́gọ́lọ́ bẹ̀lmàva, vaá legèva belí kpáà bã́. 28 M̀ é nenàe gé gyã́à káála bòm dee. 29 Nen e a íe tṍ á dã́ nu e Nyómá Káí gé kọ́ nè bõ̀òna ló Kráìst!

KÙÙÀ NU 2 - Gokana - 1996 Edition - Bible.is - GKNIBS

Annotations