MÁÁTÌÙ 25 - Gokana - 1996 Edition - Bible.is

1 “Lẹ̀ẹ̀là bel Bàrì é di belí bé e òb kà nvín pá nyáá, e ba è kolí ke nàà nu ílà dóm nè va, fáálá ba té sã́, vaá gé elá ló ba kóò bànà a dóm, e a gé dú gé ilíe. 2 Vòò ọ̀và beè dú ból, vaá vòò ọ̀và à nyimá nu. 3 Gbò e ba è dú bólá beè faalá gé ba té sã́, sõò bà náa beè faalá múú sã́ bẽ̀èà ló, 4 boo tṍó e gbò e ba è nyímá nuá beè tú múú sã́ tṍ m dõòna kà nu bẽ̀èà ló. 5 Boo bée kọ nen e a é ílí vaá náa beè vàlẹ̀ bá dù, dáá beè gboó bọ̀ọ̀ gè bã dẽe gbò nvín pá nyááá, naa ní e dénè ọ̀và dáa. 6 “Kà lèlà boo taa tóm dáá, bà gboó dã́ nen e a koolà kpã́, kọ, ʽDọí ke dẹi gé zọí nen e a é ílí vaá nyoonai, mè à gé dú!’ 7 “Òb kà nvín pá nyááá beè gboó aa boo vaá dàlà dẽe ba sã́ nè boo. 8 Gbò e ba è dú bólá à gboó bàn gbò e ba è nyímá nuá kọ bà á dõonìè sìgà múú sã́ neèva, mè baála sã́ é gé gimiè. 9 “Gbò e ba è nyímá nuá à gboó kọ, ʽNée bulà kọ múú sã́ e a dì é gbõoma be è néi. Lele bá sii gé zalii múú sã́ áá tóm.’ 10 “Gbò nvín pá nyáá e ba è dú bólá à gboó àà gé zalí múú sã́, vaá boo tṍó e bà di dí deèa, nen e a é ílí vaá beè gboó dù. Gbò e ba è kpènà ló vaá elá bànàeá beè gboó zọe má sĩ́ tọ e bà é tõo ílá dóm nè vaá. Ba beè gboó kùb nu tọá. 11 “Tṍó téní vaá na gbò nvín pá nyááá à gboó dù gé elá nvée nu tọá vaá kolí kól kọ, ʽTẹ́ẹ̀, tẹ́ẹ̀! Kùùlà nèi!’ 12 “Nen e a gé ílí vaá beè gboó aalá nèva kọ, ʻM̀ ló kà kà bel nèi kọ ním̄ nyímài ló.’ 13 “Boo bée vó, kuai dẽe ló, mè nóo nyímàì dee à bè tṍó e nda, Sã́áná Nen, é dú. 14 “Tṍóá, lẹ̀ẹ̀là bel Bàrì é belí bé e ene kà gbálà e a gé aa be sí kyẽè, vaá à gboó kolí pá a gbò tóm vaá tú a gyọ́ dõ̀òmàva kọ bà á kù dẽe ló. 15 À tú gã́ bug e a nyímá kọ bu ọ̀và é láá simá tóm nèva: À tú vòò bẹ̀lẹ̀ kpègè nè ene ọ̀và, à tú bàà bẹ̀lẹ̀ kpègè nè ene ọ̀và, à tú ene bẹ̀lẹ̀ kpègè nè ene ọ̀và. À gboó aa be sí a kyẽè. 16 Nen tóm e a beè ié vòò bẹ̀lẹ̀ kpègèa beè gboó gbẹá boo gé tú a kpègè ùlmà ki e a née úlù dõòna kà vòò bẹ̀lẹ̀ kpègè. 17 Nen e a beè ié bàà bẹ̀lẹ̀ kpègèa à ùlmànà gé ki e a née úlù dõòna kà bàà bẹ̀lẹ̀ kpègè. 18 Sõò nen e a beè ié ene bẹ̀lẹ̀ kpègèa beè gboó àà gé ùb kunu kẽ vaá lì kpègè e a tẹ̀ tọ beè nvèèé báá. 19 “Gbele begè dẽe tṍó téní, ba tẹ̀ tọ à gboó òòa kẽ dù vaá kọ bu ọ̀và á nè kpẹa bé e a beè tú kpègèa simá tóm naa. 20 Nen tóm e a beè ié vòò bẹ̀lẹ̀ kpègèa beè faalá dõòna kà vòò bẹ̀lẹ̀ kpègè bii ló máe, vaá kọ, ʽTẹ́ẹ̀, o beè nèm̄ vòò bẹ̀lẹ̀ kpègè. Nee dõòna kà vòò bẹ̀lẹ̀ kpègè, e a dú gbàà, e m bii ló domáí.’ 21 “A tẹ̀ tọ à gboó kọ́ nèe kọ, ʻỌ̀ọ̀ lé nen tóm e o bọ́ ló dẹ̀lẹ̀ nyíe boo! Ò palà ge naa. Ò bọ́ ló dẹ̀lẹ̀ nyíe boo ló ńkem nu; boo bée vó, m̀ é kọ́ ó lẹ̀ẹ̀là bel ló gbele tõ̀ò nu. Dù gé zọ̀m̄ dõ̀ònà nà ṍ kààgà!’ 22 “Nen tóm e a beè ié bàà bẹ̀lẹ̀ kpègèa dú vaá kọna gé kọ, ʽTẹ́ẹ̀, o beè nèm̄ bàà bẹ̀lẹ̀ kpègè. Nee dõòna kà bàà bẹ̀lẹ̀ kpègè, e a dú gbàà, e m bii ló domáí.’ 23 “A tẹ̀ tọ à gboó kọ́ nèe kọ, ʻỌ̀ọ̀ lé nen tóm e o bọ́ ló dẹ̀lẹ̀ nyíe boo! Ò palà ge naa. Ò bọ́ ló dẹ̀lẹ̀ nyíe boo ló ńkem nu; boo bée vó, m̀ é kọ́ ó lẹ̀ẹ̀là bel ló gbele tõ̀ò nu. Dù gé zọ̀m̄ dõ̀ònà nà ṍ kààgà!’ 24 “Nen tóm e a beè ié ene bẹ̀lẹ̀ kpègèa dúná gé vaá gboó kọ, ʽTẹ́ẹ̀, m̀ nyímàni ló kọ ọ̀ọ̀ gbele tavàlà nen. Ò ólò bùùlà nu lọl kĩ e bè olo nóo beè fò nu, vaá ò kãanà nu lọl kĩ e bè nóo beè zagẹ̀ nu. 25 Vó ní e a síimàm̄ pọ̀ vaá kọ ḿ àà gé lì o kpègè e o beè nvèèm̄ bá é. Nee o kpègèi.’ 26 “A tẹ̀ tọ à gboó aalá nèe kọ, ʽOlo pọ́lọ́ nen tóm e o dú kpọ̀lọ̀! O beè nyimá kọ m̀ ólò bùùlà nu kĩ e bè ním̄ beè fó nu, vaá kãànà nu kĩ e bè ním̄ beè zagẹ̀ nu. 27 Éé e bè nóo beè tú nà kpègè nvee bá gbò e bà ólò kùmà kpègè e? Tṍó e m ni òòa kẽ dùi, m̀ gá è gboó tú nà kpègè bii ló nvín e a dọ́ boo. 28 “ʽTui kpègèa lọliié bá nèi nen e a íè òb bẹ̀lẹ̀ kpègèa! 29 Boo bée kọ à é dú ge tẹlẹ̀ ló nè nen e a íe, vaá à é gboó ié sige ló. Sõò nen e bè náa íe, bà é tú bãànà ńkem e a beè dìé báá lọl. 30 Tãa bá na kà nen tóm e bè náa dọ bélèi--toviíe tẹlẹí ke dẹi, m kùkùù gín. Tó nè táà dáa ní e a é di kĩé é.’ 31 “Tṍó e nda, Sã́áná Nen, é fáálá nà dù̃ùnè domá, vaá bii ló dénè gbò nyómá tóm, m̀ é gboó ĩì tẽ́ boo nà kpò té méné e ka di ló, 32 vaá gbò nen e bà aa dénè kpá dó é bṍónám̄ kè sĩ́. M̀ é gboó túva dõ̀òmà bàà gbò belí bé e nen e a gé ku dẽe ló naanà ból ólò kpòòlà kà ból lọl ló naanà ból naaá. 33 M̀ é tú gbò lé lab dògò sẹ̀ẹ̀a boo bá lè vaá m̀ tú na gbòa sẹ̀ẹ̀a boo bá kìe. 34 “Boo tṍóá nda, Méné, é gboó kọ́ nè gbò e bà dìm̄ boo bá lèa kọ, ʽDui, e boolo gbò e nà Tẹ̀ beè tãanè dee bá! Dui gé bãí kĩ e Bàrì gé lẹẹlà bel, e a dú kĩ e a beè kpoogè deè ló sẹ̀ẹ̀i lọl dàà togó bàlà booí. 35 Boo bée kọ tá kói beè tám̄ ló vaá ò ném̄i gyã́á, òòm̄ beè kãa vaá ò ném̄i múú, m beè bã̀í boo belí nen kyáà vaá ò tum̄i nveenií tọ, 36 o beè simím̄i kàn tṍó e kàn savà tám̄ tẽ́, lóm̄ beè zọ̀ vaá ò kãanìm̄i, ò beè dui gé moním̄i tṍó e m di tọ kpọ́gọ́lọ́.’ 37 “Boo tṍóá, gbò lé lab dògò é gboó aalám̄ gã́ kọ, ʽDõò, mó dee ní e e beè mònni e tá kói tání ló vaá è nèni gyã́á é, sẹ̀ mó dee ní e e beè mònni e òòni kã́a vaá è nèni múú é? 38 Mó dee ní e o beè bã̀í boo belí nen kyáà vaá è túni nvee tọ é, sẹ̀ mó dee ní e e beè mònni e kàn savà tání tẽ́ vaá è simíni kàn e? 39 Mó dee ní e e beè mònni e lóni zọ à bè kọ ò di tọ kpọ́gọ́lọ́ vaá è kãáni é?’ 40 “Nda, Méné, é gboó aalá nèva kọ, ʻM̀ ló kà kà bel nèi kọ kọ̀láá tṍó e o láá naanii ene kà gbò nuí nei ene kà pá nà gbò vígà e a kil kẽí, mè ò náànàì gé nei nda.’ 41 “Boo tṍóá, m̀ é gboó kọ́ nè gbò e bà dìm̄ boo bá kìeá kọ, ʽTenii aalim̄í sĩ́, boolo e kpọ̀ té Bàrì di boo! Aalii mai sĩ́ dáà sã́ e bè náa é gímí, e Bàrì beè sẹlẹ sẹ̀ẹ̀ Pọ́lọ́ Nyómá nè pá a gbò nyómá tóm! 42 Boo bée kọ tá kói beè tám̄ ló vaá nóo nem̄i gyã́á, òòm̄ beè kãa vaá nóo nem̄i múú, 43 m beè bã̀í boo belí nen kyáà vaá nóo túm̄i nveeníí tọ, kàn beè sàvà tám̄ tẽ́ vaá nóo símìm̄i kàn, tṍó e lóm̄ zọ nè tṍó e m di tọ kpọ́gọ́lọ́ nóo kãanìm̄i.’ 44 “Tṍóá, baala é gboó aalana gé kọ, ʽDõò, mó dee ní e e beè mònni e tá kói tání ló, à bè kọ òòni kã́a, à bè kọ ò bãí boo belí nen kyáà, à bè kọ kàn savà tání tẽ́, à bè kọ lóni zọ, à bè kọ ò di tọ kpọ́gọ́lọ́, vaá née nveè bá nèni é?’ 45 “Nda, Méné, é gboó aalá nèva kọ, ʻM̀ ló kà kà bel nèi kọ kọ̀láá tṍó e bè nóo beè nveenii bá nei ene nen e a di zẹ̀ẹ̀ gbò e a kil kẽá ní e a dú kọ nóo beè nveenai gé bá nei nda é.’ 46 “Bàrì é gboó lẹ̀ẹ̀là na gbòi tẹlẹ kĩ e bà é íe kpọ̀ té e bè náa é íé kùbmà, sõò gbò lé lab dògò é bã́ m dùm e bè náa tá.”

MÁÁTÌÙ 25 - Gokana - 1996 Edition - Bible.is - GKNIBS

Annotations