MÁÀK 2 - Gokana - 1996 Edition - Bible.is

1 Sìgà dee téní, Jíìzọ̀s à gboó ooa kẽ má sĩ́ bon Kapánìọ̀m, vaá dénè nen à dã̀ kọ mè a íná be. 2 Gbele tõ̀ò nen à gboó dú mmá, naa ní e tọ́ọ̀ kà fòga dee náa dinà, bãànà nu tọ. Jíìzọ̀s géè vee mon bel Bàrì nèva. 3 Ténì nen à gboó dàlà ene kà gbálà e zọ ló túe gbẹẹ́ mà kẽ kọ á gá láá kyãà domáé ló. 4 Tṍó e bà náa mon tọ́ọ̀ kà bé bà gá tú nená tenmá naa gbàà gbele gbòa inmá ló Jíìzọ̀s, bà gboó fùl deè boo bọ̀b tọá, tẹlẹ kà lèlà kĩ e Jíìzọ̀s dì. Bà gboó dàlà gbálài boo a búl tenmá dee kĩ e ba beè fùla tẹlẹ kẽ. 5 Tṍó e Jíìzọ̀s ni mon bé e gbòa dẹlẹe nyíe boo naa, à gboó kọ́ nè gbálàa kọ, “Nà nvín, m̀ ia ló o pọ́lọ́ nèni.” 6 Sìgà gbò nóòmà Log pá Júù e ba è di ĩ́ì tẽ́ kĩé à gboó tõo kẽ bugi togó kọ, 7 “À náà và à láá ló íb gbò mon belí é? Níí dú gè on Bàrì! Boo bée kọ, maaná áá Bàrì lọl, mée ní e a é láá ia ló pọ́lọ́ nè nen é?” 8 Jíìzọ̀s à gbalẹ̀ boo nyimá nu e a dìvá bùlà, vaá à gboó bĩináva kọ, “Éé ní e a náa vaá ò iei íb na kà bùlài é? 9 Gbàà ge kọ́ nè gbálà e bè náa láá kyãài kọ, ʻM̀ ia ló o pọ́lọ́ nèni,’nè ge kọ́ nèe kọ, ʽAa boo, ulí o búl vaá ò kyãà,’ńmoné ní e o bùlài kọ à válí é? 10 Sõò m̀ é náa kọ ó nyimai kọ nda, Sã́áná Nen, íè kpóó gè láá ia ló pọ́lọ́ nè gbò nen gbẹá bàlà booí.” Tṍóá, à gboó kọ́ nè gbálà e bè náa è láá aa boo kyãàa kọ, 11 “Aa boo, ulí o búl vaá ò kil be!” 12 Kè sĩ́ dénè gbòa, à gboó aa boo, tú a búl vaá gbalá àà. À gboó palà ge bọọ ló dénè gbòa, naa ní e bà leelà Bàrì vaá kọ, “Beele gáà mònmà dẽe íb nu e a náaí tọ́ọ̀ dee!” 13 Jíìzọ̀s kpáá òòànà gé kẽ kil nu Pene Gálìlì, vaá gbele tõ̀ò nen à ḿmá beeá teníé ló. À gboó dàlà togó nóòmàva nu. 14 Boo tṍó e a géè kyãà tení ló kẽ, a beè mòn ene kà gbálà e a ólò lọl kpègè e a kọlà Lívàì, nvín Álfìọ̀s, e a di ĩ́ì tẽ́ m a tọ tóm. Jíìzọ̀s à gboó kọ́ nèe kọ, “Nyooném̄ nvée.” Lívàì beè gboó aa boo nyoonée. 15 À fẹ́gẹ̀ ló, Jíìzọ̀s géè gboó gé dé gyã́á tọ Lívàì. Gbele tõ̀ò gbò lọl kpègè nè dõòna gbò e bà íe pọ́lọ́ bée beè bììà nvée Jíìzọ̀s, vaá tõ̀ò ọ̀và beè zọ Jíìzọ̀s nè gbò e bà ólò nyoonée nvée deá gyã́á. 16 Tṍó e sìgà gbò nóòmà Log pá Júù e a dṹùnà pá Fárèsì mon kọ Jíìzọ̀s gé zọ gbò e bà íe pọ́lọ́ bée nè gbò lọl kpègè deá gyã́áá, bà gboó bĩiná gbò e bà ólò nyoonée nvée kọ, “Éé ní e a náa vaá Jíìzọ̀s à zọ gbò lọl kpègè nè gbò e bà íe pọ́lọ́ bée deá gyã́á é?” 17 Tṍó e Jíìzọ̀s dã́, à gboó aalá nèva kọ, “Nen dóm biè náa dú bíi ló gbò válá ló, sõò ló gbò e lóva zọ. Ním̄ beè dú ló gè kolí gbò lé, sõò m beè dú ló gè kolí gbò pọ́lọ́.” 18 À íe ene dee e gbò e bà ólò nyoone nvée Jọ́ọ̀n, Nen Lógmà Múú, nè pá Fárèsì géè ká gã́. Gbò nen beè dú ló Jíìzọ̀s vaá bĩináe kọ, “Éé ní e a náa vaá gbò e bà ólò nyoone nvée Jọ́ọ̀n nè gbò e bà ólò nyoone nvée pá Fárèsì à ká gã́, sõò gbò e bà ólò nyoone nvée olo náa ká é?” 19 Jíìzọ̀s à gboó aalá nèva kọ, “É kọ gbò e ba è kolí kè ílà dóm nè va ólò ká gã́ boo tṍó e nen e a gé ílí va dìvá ló? Á gé naa vó! Boo tṍó e nen e a gé ílí va dìvá ló, bà é dé gyã́á. 20 Sõò dee gé dú e bà é beè tú nen e a gé ílí vaá lọlvá ló. Tṍóá ní e bà é gboó ká gã́ é. 21 “Tọ́ọ̀ nen náa ólò tú ãa báà nu uu dẽe kĩ e a baalà ló nómá kọ̀là ló. Be à náa vó, ãa báà nuá é nvémá vaá baa nómá kọ̀là lóá èlmà bé e a beè dì naa. 22 Tọ́ọ̀ nen náa ólò túna gé ãa míí tṍ m nómá bẹ̀lẹ̀ kpá ból. Be à náa vó, kói e a dú ló ãa mííá é pómè bẹ̀lẹ̀a vaá pálàa kà gbá pè. Tãa vó, bà ólò tú ãa míí tṍ m ãa bẹ̀lẹ̀ kpá ból.” 23 Ene dee bò séi pá Júù, Jíìzọ̀s nè gbò e bà ólò nyoonée nvée géè kyãà tení bàlà ól kĩ e ba è fó lẹ́lẹ̀ nu e a belí kpá kyàlà. Gbò e bà ólò nyoonée nvée beè vaggi kum lọl ló dúé nvée. 24 Pá Fárèsì à kọ́ nè Jíìzọ̀s kọ, “Ni ẹb, mè gbò e bà ólò nyoonéni nvée gé náá nu e bẹẹ Log kọ é gá naa dee bò séi.” 25 Jíìzọ̀s beè gboó aalá nèva kọ, “É kọ ò gáà bugii nu e Méné Dévìd beè naa, tṍó e tá kói beè tá ló pá a gbò nè ẹ̀ẹ̀? 26 Tṍó e Abáíàtà beè dú Pọ̀b Nen Vààla Gyọ́ọ, Dévìd beè bã tọ Bàrì, dé fétúlú e ba è nè Bàrì vaá tuna gé nè pá a gbò kọ bà á dè. Sõò bẹẹ Log kọ́ tọ́ọ̀ nen á gá dè, maaná áá gbò vààla gyọ́ọ lọl ló.” 27 Jíìzọ̀s tú a bel inmá ke kùbmà tṍó e a kọ, “Bàrì beè sẹlẹ dee bò séi kọ nen á boma séi. Náa beè kọ log e a bẹl deeá á kpọ́ té ló nen. 28 Boo bée vóí, nda, Sã́áná Nen, ní e m gé lẹẹlà bel ló dee bò séi é.”

MÁÀK 2 - Gokana - 1996 Edition - Bible.is - GKNIBS

Annotations