LÚÙK 6 - Gokana - 1996 Edition - Bible.is

1 Ene dee bò séi pá Júù, Jíìzọ̀s géè kyãà tení bàlà ól kĩ e ba è fó lẹ́lẹ̀ nu e a belí kpá kyàlà. Gbò e bà ólò nyoonée nvée beè vaggi kum lọl ló vaá kàm súú bõoá kè ká báva, gboó taa. 2 Sìgà pá Fárèsì à gboó bĩináva kọ, “Éé ní e a náa ò naanii nu e bẹẹ Log kọ́ é gá naa dee bò séi é?” 3 Jíìzọ̀s beè gboó aalá nèva kọ, “É kọ ò gáà beè bugii nu e Méné Dévìd beè naa, tṍó e tá kói tá ló pá a gbò nè ẹ̀ẹ̀? 4 A beè bã tọ Bàrì, dé fétúlú e ba è nè Bàrì vaá tuna gé nè pá a gbò kọ bà á dè. Sõò bẹẹ Log kọ́ tọ́ọ̀ nen á gá dè maaná áá gbò vààla gyọ́ọ lọl ló.” 5 À gboó kọ́ nèva kọ, “Nda, Sã́áná Nen, ní e m gé lẹẹlà bel ló dee bò séi é.” 6 Dõòna dee bò séi, Jíìzọ̀s beè bã́ ene kà tọ Bàrì pá Júù vaá noomà nu. Ene kà gbálà beè dì kĩé e a bá lè beè ú táé ló. 7 Gbò nóòmà Log nè pá Fárèsì beè gbĩ́ nu e bà gá élá boo siimà log Jíìzọ̀s. Boo bée vó, bà gboó palà ge ẹ̀b kà bè à é bó gbálàa dee bò séi. 8 Sõò Jíìzọ̀s beè nyimá ba bùlà vaá à gboó kọ́ nè gbálà e báe beè ú táé lóá kọ, “Elá ela vaá ò dú deè sĩ́ kĩí.” Gbálàa beè gboó aa boo gé elá kĩé. 9 Jíìzọ̀s à gboó kọ́ nèva kọ, “Nda é zẹ́ẹ́ bĩinái ene kà bel: Éé ní e bẹẹ Log kọ́ é naa dee bò séi é? É kọ à kọ́ é naa lé, sẹ̀ à kọ́ é sí pọ́lọ́ é? À kọ́ é kùmà dùm nen, sẹ̀ à kọ́ é fẹ́ nen é?” 10 Jíìzọ̀s ẹbva vaá à gboó kọ́ nè gbálàa kọ, “Nììnà báni.” Vaá tṍó e a niinà báe, kà à gboó kpáá bã m. 11 Sṹg à gboó palà ge bã̀va, naa ní e ba è dàlà togó bilá ló pọ́lọ́ e bà é láá sí Jíìzọ̀s. 12 Boo tṍóá, Jíìzọ̀s beè kil boo ene kà gù gé tãàga ló Bàrì. A è tú zivè bílá dee tõomá kĩé olòó tãàga ló Bàrì. 13 Tṍó e dee ni zilà, à gboó kolí dénè gbò e bà ólò nyoonée nvée bõònè, vaá sà òb nè bàà nen e a kólíva gbò e a lẹẹlàè. 14 Ba è kọ̀là: Sáímọ̀n (e a kólíe Pítà) nè a vígà Ándrù, Jém̀z nè Jọ́ọ̀n, Fílìp nè Baatọ́lọ̀mù, 15 Máátìù nè Tọ́màs, Jém̀z, e a dú nvín Álfìọ̀s, nè Sáímọ̀n (e a è di zẹ̀ẹ̀ gbò e bà géè bé boo kọ pá Júù á aa kè bá pá Róm̀), 16 Júdàs, e a dú nvín Jém̀z, bii ló Júdàs Iskárìọ̀t, e a fẹ́gẹ̀ ló tú Jíìzọ̀s nvèè bá ọ́b. 17 Boo tṍó e Jíìzọ̀s nè gbò e a lẹẹlà beè kyãà aa boo gùa, a è gboó elá boo kunu kẽ e a kuna sĩ́, bii ló gbele tõ̀ò gã́ bug nen e a ólò nyoonée nvée. Gbò nen beè sì̃ aa kọ̀láá ke tõ̀ò e a di Judíà, nè Jerúsàlẹ̀m, nè gbò bon e a di nu múú Táíà nè Sáídọ̀n. 18 Ba è dú boo bée ge pãanée tṍ ló, nè ge boá aa bá dénè ba kom. A è bona gé dénè gbò e zọ beè bã̀vá m. 19 Dénè nen beè pììgà ge tọ́e bá ló, boo bée kọ kpóó e a bómá dénè ọ̀và géè tení ààé m. 20 Jíìzọ̀s beè gboó dàlà dẽe boo ẹ̀bmà gbò e bà ólò nyoonée nvée vaá kọ: “Léé sĩ́ di ból boolo, gbò sàn, boo bée kọ boolo ní e Bàrì gé lẹẹlà bel ló é! 21 Léé sĩ́ di ból boolo, e tá kói gé táí ló kátogóí, boo bée kọ Bàrì é naa dénè bọọ bíi! Léé sĩ́ di ból boolo, e o gé tóí kátogóí, boo bée kọ ò é beè magai! 22 “Léé sĩ́ di ból boolo, e gbò nen gé ọ́víi vaá bà kìnii, bà ònii vaá kyọ̀ bọọ bée boo bée kọ ò gé nyoonei nvée nda, Sã́áná Nen! 23 Boo bée vóá, boo tṍó e a lẹẹ̀à naa vó, ò ṍi kààgà vaá ò pẹ́ẹgii bá ẹ́ẹ́ nyíe, boo bée kọ bọọ kp̃ẽ̀ kòm m káála palà ge bọọ. Boo bée kọ t̃ẽ̀ènè íb gbò nuí ní e ba gbò nómá tẹ̀ beè naa gbò kọ́ bùlà Bàrì e. 24 Sõò bẽ́é sĩ́ di ból boolo, e o bãì méné kátogóí, boo bée kọ bọọ ẹ́ẹ́ nyíe tá gbẹá kĩí! 25 Bẽ́é sĩ́ di ból boolo, e o íèì dénè nu e a biíi kátogóí, boo bée kọ tá kói é táí ló! Bẽ́é sĩ́ di ból boolo, e o gé magai kátogóí, boo bée kọ ò é beè bãi nyèm vaá ò tói! 26 “Bẽ́é sĩ́ dìí ból boo tṍó e dénè nen ló lé e a kilíí ló, boo bée kọ t̃ẽ̀ènè íb gbò nuí ní e ba gbò nómá tẹ̀ beè ló kilma ló gbò e ba è kpọ́ kyáá kọ baála gbò kọ́ bùlà Bàrì e.” 27 “Sõò m̀ kọ́ nè boolo e o gé pãaném̄i tṍ ló kọ: Vulei bọọ gbò ọ́b, vaá ò naanii lé gbò e a ọ́víi, 28 loi lé bel nei gbò e a kalíi gbéé, banii Bàrì kọ á naa lé gbò e a síi pọ́lọ́. 29 Be nen sáni bá náá sĩ́, ò kììlà na sĩ́ náá sĩ́á nèe kọ á sana gé. Be nen tú o kọ̀là ló, sọe bá kọ á túna gé o kàn. 30 Dõo nu nè kọ̀láá nen e a banni nu bá, vaá be nen tú o nu, ó gá kọ á òòma kẽ. 31 Dì belí bé e a léémái naa kọ gbò nen á naanìèi, boolo naanai gé vó neíva. 32 “Be ò vulei áá kóló gbò e a vulei, mó kà kele íb nu ní e o náànìì e? Boo bée kọ bãànà gbò pọ́lọ́ vulènà gé gbò e a vuleva! 33 Be ò náanii lé gbò e a náái lé, mó kà kele íb nu ní e o náànìì e? Boo bée kọ bãànà gbò pọ́lọ́ náana gé vó! 34 Vaá be ò nei bọ́ọlẹ̀ áá kóló gbò e o bólìì dẽe sĩ́ kọ bà é kpẽ́è neèi, mó kà kele íb nu ní e o náànìì e? Boo bée kọ gbò pọ́lọ́ nè bọ́ọlẹ̀ dõòna gbò pọ́lọ́ boo bée ge tumá t̃ẽ̀ènè gã́ bug e ba è nè. 35 Sõò vulei gbò e a ọ́víi, naanííva lé, neíva bọ́ọlẹ̀ vaá ó gá bolii dẽe sĩ́ kọ bà á kp̃ẽ̀, mè ò é íei pọ̀b kp̃ẽ̀ kòm vaá ò é dii belii Bàrì e a Bọọ Èl Boo. Boo bée kọ à ólò naa lé gbò e bà náa nè ṍà zaa nè gbò pọ́lọ́. 36 Boo bée vóá, iei sàn nyíe ló nen dì belí bé e bọọ Tẹ̀ íe sàn nyíe ló nen naa. 37 “Ó gá gbẹi dõòna gbò, mè Bàrì náa é gbẹ́i. Ó gá bẽgei bel dõòna gbò, mè Bàrì náa é bẽ́gèi bel. Iaí ló pọ́lọ́ nèi dõòna gbò, mè Bàrì é ia ló nè boólo. 38 Dõonii nu nèi nen, mè Bàrì é dõo nu nèi. À é néi ní e bà dò vaá à mmá èèà, boo bée kọ nu e o domàì nèi gbò nen, ní e Bàrì é domànà gé nè boolo é.” 39 Jíìzọ̀s à gboó ló kina belí nèva kọ, “É kọ nen gímá dẽe é láá tulè dõòna kà nen gímá dẽe? É kọ pálàa ọ̀và náa é dọ́ bànà? 40 Tọ́ọ̀ kà nvín e a é nó nu náa bọ́ọ́ èl a nen dò bá, sõò tṍó e nvín e a é nó nu ni táè a tṍó nò nu, à é gboó dì belí a nen dò bá. 41 “Éé ní e a náa ò mòn pẹ́l té e a di kóm dẽe o vígà vaá nóo monì kélè té e a di gbana boo dẽe olo é? 42 À é náa và vaá ò láá kọ́ nè o vígà kọ, ʽVígà, dù mè ḿ tú pẹ́l té lọlní dẽe,’vaá olo nóo monì kélè té e a di boo dẽe olo é? Olo nen bàà sĩ́! Zẹ́ẹ́ tú kélè té e a di gbana boo dẽe oloá lọl, kọ bé ò palà ge mòn nu vaá láá tú pẹ́l té lọl kóm dẽe o vígà. 43 “Pálá pálá ló té náa ólò mumí pọ́lọ́ ból súú, vaá té e kom di ló náa ólò mumí lé ból súú. 44 È nyímà ló té tení dú ló ból súú e a múmí. B̃ẽ̀è náa ólò mumí ló té kpòlò kpò taa nu, à bè ge kọ nvéè pyób é múmí ló díí kọ́ọ. 45 Lé nen ólò ló lé bel lọl m bùlà e a dú lé, sõò pọ́lọ́ nen ólò ló pọ́lọ́ bel lọl m bùlà e a dú pọ́lọ́. Boo bée kọ bel e a aa gã́ nen ní e a zógè nu e a dìé bùlà e.” 46 “Éé ní e a náa ò kolím̄i, ʽNà Dõò, nà Dõò!’vaá nóo zigai ge naa nu e m kọ́ nèi é? 47 Kọ̀láá nen e a dúm̄ ló gé dã́ nà mon bel vaá gboó naa nu e m kọ́, m̀ é zógèi íb nen e na kà nen dì belí. 48 Na kà nen dì belí ene kà gbálà e, boo tṍó e a tib tọ, a è baa kunu kẽ, vaá dò díí kẽ tọá boo dem. Tṍó e boo dọọ, pene à ḿmá èèà vaá kpóó ló múú à gboó bú kòn tọá, tọá náa dọ, boo bée kọ a è palà ge tìb. 49 Sõò nen e a dã́ nà mon belí, vaá lọe gè naa, na kà nen dì belí ene kà gbálà e a tib tọ vaá náa baa kunu kẽ naamá dò díí kẽ. Boo tṍó e múú bú kòn tọá, à gboó dọ̀. À dọ uu gbàà kẽ!”

LÚÙK 6 - Gokana - 1996 Edition - Bible.is - GKNIBS

Annotations