LÚÙK 12 - Gokana - 1996 Edition - Bible.is

1 Boo tṍó e gbele tõ̀ò nen gé tã́gi bá ene nè ene vaá kònà dù gé bõoná kĩé, Jíìzọ̀s beè gboó gyà sĩ́ kọ́ nè gbò e bà ólò nyoonée nvée kọ, “Iei ọ́ẹ́ dẽe kilma ló nu e a gbuuve fétúlú pá Fárèsì, e a kọlà ge dú gbò bàà sĩ́. 2 Kọ̀láá nu e a dú gè gbẹẹ́ ke gũa kátogóí é beè dú gè tẹ́lẹ bàlà kẽ, vaá kọ̀láá nu e a dú gè uu kátogóí é beè dú gè naa kọ gbò nen á nyimá. 3 Boo bée vó, kọ̀láá nu e o beè kọi gbẹaí ke gũa, bà é dã́ bàlà kẽ, vaá bel e o beè saagai gbẹaí àn, bà é naa ní e dénè nen é dã́. 4 “Pá nà kóò, m kọ́ nèi kọ, pọ̀ á gá siíi ló gbò nen. Bà é láá fẹ́ áá nom kpá ló vaá à lée. 5 Sõò nda é dói bá nen e o é síiai pọ̀ ló: Siiai pọ̀ ló Bàrì e, tṍó e a ni fẹ́ lọ̀l, à íe kpóó gè láá tẹlẹ ke tõ̀ò bẹẹ ló. M̀ palà ge kọ́ nèi kọ ó siiáíe pọ̀ ló! 6 “Ńgá kõò á gé ló tọ́ọ̀ nu. Nen é láá oo vòò ọ̀và vaá náa é láá kẹ́ ló lọl ló. Vaá ene ọ̀và náa tá nyíe Bàrì. 7 Bàrì nyímá bãànà gã́ bug pa gyáa e a dìí togó. Boo bée vó, pọ̀ á gá siíi, mè boolo bọọlii ló Bàrì elii gbele tõ̀ò ńgá kõò! 8 “M palà ge ló kà kà bel nèi kọ, nen e a dọ bàlà kẽ elá nè nda kè sĩ́ gbò nen ní e nda, Sã́áná nen, é dọna gé bàlà kẽ elá nèe kè sĩ́ gbò nyómá tóm Bàrì e. 9 Sõò nen e a amam̄ sàn kè sĩ́ gbò nen, nda, Sã́áná nen, é amànàe gé sàn kè sĩ́ gbò nyómá tóm Bàrì. 10 “Bàrì é ia ló nè nen e a on nda, Sã́áná Nen, sõò nen e a on Nyómá Káí, Bàrì náa é ia ló nèe. 11 “Boo tṍó e pá Júù é béélái bel ló gbẹá ba tọ Bàrì à bè ge faalái simá kè sĩ́ gbò e a di togó lẹ̀ẹ̀là bel, ó gá bulai nu e o é kọ́i nè bé e o é áalai bel naa. 12 Boo bée kọ Nyómá Káí gé néi mon bel ge ló kà lèlà tṍóá.” 13 Ene kà gbálà e a di zẹ̀ẹ̀ gbòa beè gboó kọ́ nè Jíìzọ̀s kọ, “Nen Dò Bá, bàn sã́á nà tẹ̀ kọ ḿ zọ̀e dõ̀ònà gyọ́ e bẹẹ tẹ̀ beè ú gbẹẹ.” 14 Jíìzọ̀s à gboó aalá nèe kọ, “Nà kóò, mée ní e a beè túm̄ naamá bọọ dóm bèèla, à bè nen e a é dõói gyọ́ é?” 15 À gboó kil sĩ́ vaá kọ́ nè dénè ọ̀và kọ, “Ọẹi dẽéi vaá o túi tàn lọlii boo gè ié gyọ́, boo bée kọ dùm nen náa dú boo nu e a íe, kọ̀láá bé e a gbo gyọ́ naa.” 16 Jíìzọ̀s beè gboó logí ene kà lóg nèva kọ, “Ene tṍó beè dì. Ene kà gbálà e a bã méné beè ié ene kà ól e nu palà ge dum boo. 17 À gboó dàlà togó ló bel nèà a bá kọ, ʽNím̄ íè kĩ e m gá sẹlẹ dénè nu e a ni léèvè m nà ól, vaá m̀ é gboó naà và e?’ 18 “À gboó kọ, ʽNee bé e m é náaí. M̀ é kṍóná dénè nà dá, vaá m̀ niinà gbò pọ̀b kà dá e m é tú dénè nà nu e a ni léèvè sẹlẹ́ boo. 19 Boo tṍóá, m̀ é gboó kọ́ nè nà bá kọ, “Nen léé sĩ́! O íe dénè lé nu e a dì nèni m gbele tõ̀ò gbáá. Gboó fẹẹlẹ ló dé nu, ò ṍ vaá ò zaàvà!” ’ 20 “Sõò Bàrì beè gboó kọ́ nèe kọ, ʽNen ból! Kà lèlà bílá deeí, ò gé sọ bá o dùm, vaá mée ní e a é gboó ié dénè gbò nu e o beè sẹlẹ nèà o bá é?’ 21 “Vóá bé e a dì naa ló nen e a gbo gyọ́ nèà, vaá náa gbo gyọ́ kè sĩ́ Bàrì naa é.” 22 Tṍóá, Jíìzọ̀s à gboó kọ́ nè gbò e bà ólò nyoonée nvée kọ, “Vó ní e a náa m̀ kọ́ nei kọ ó gá tãagei bọọ bùlà e a kil ló nu ge dé tõomá dùm à bè nu ge nvèà. 23 Boo bée kọ bọọ dùm el nu ge dè, vaá bọọ kpá ló el nu ge nvèà. 24 Ni zẹ́ẹ́ ẹvii kọ gbò ńnóm náa ólò fó nu à bè ge kọlí nu. Bà náa íe tọ à bè boo dá e bà sẹlẹ gyã́á, sõò Bàrì néva gyã́á! Boolo palà ge bọọlii ló Bàrì elii gbò ńnóm! 25 É kọ à íe ene bọ̀ì e a é láá tú dee tẹlẹ boo a dùm tení dú ló gè tãage a bùlà? 26 Be nóo é láá naanii gbálà ńkem nu e a dì belí vóí, éé ní e a náa ò tãagei bọọ bùlà e a kil ló dénè na gbò nuá é? 27 “Ni ẹvii bé e gbò víl dum naa. Bà náa sí tọ́ọ̀ kà pííla, à bè ge kọ bà láá lò kàn simá. Sõò m̀ kọ́ nèi kọ bãànà Méné Sólomọ̀n, e a beè palà ge ié gyọ́, náa beè láá nvèà nu e a dú lé sĩ́ belí ene kà gbò vílí. 28 Bàrì ní e a símí kàn víl e a é láá dum nieí vaá bà sá lọl sṍóe vaá tẹlẹ̀ sã́ ló. Be vó, à é mon kọ à símìe kàn boolo! Ẹ̀b bé e boolo nóo láá dẹlẹi nyíe boo Bàrì naa à! 29 “Boo bée vó, ó gá bọọ gè bùlà nu e a kil ló nu ge dè à bè nu ge õ̀, vaá ó gá tãagei bọọ bùlà. 30 (Boo bée kọ gbò e bà náa nyímá ló Bàrì e bà dì bàlà booí ní e bà ólò ká nyíe gbẹẹ́ boo na gbò nuí é.) Bọọ Tẹ̀, Bàrì, nyímá kọ gbò nuí dií bíi ló. 31 Tãa vó, ò bulai ge dìí ke lẹ̀ẹ̀là bel Bàrì, mè à é gboó nèi dénè gbò nuí. 32 “Pọ̀ á gá siíi, boólo e o dúì gbálà ńkem gã́ bug, mè bọọ Tẹ̀ beè beelá fùl kọ ò é zọíe lẹẹlai bel. 33 Oolii bọọ gyọ́ vaá ò túi kpègè e a dú ló nveemai bá nei gbò tãa. Gbai bẹ̀lẹ̀ kpègè e bè náa é savà, naamá ge kùmà bọọ gyọ́ sẹlẹ́ káála e bè náa é peèi, boo bée kọ tọ́ọ̀ kà nen zib náa é íná ló, vaá tọ́ọ̀ kà nàà náa é tagi kyọ̀. 34 Boo bée kọ kĩ e bọọ gyọ́ dì, ní e bọọ nyíe é olòó dìna gé é. 35 “Kpenai ló nei kọ̀láá kà nu e a dú. Simai kàn biiaí ló, ò munii bọọ té sã́ kọ á bẹ̀, 36 vaá ò bélii gbò tóm e bà gé élá bànà ba tẹ̀ tọ e a sí bõ̀òna tõ̀ò ílà dóm nè va. Boo tṍó e a dú vaá kòn bá ló nu tọ, bà gboó kùùlà nèe. 37 Mó gbele ẹ́ẹ́ nyíe e a di gbàà gbò tóm e ba tẹ̀ tọ ooa kẽ dù vaá mòn kọ bà di zìle é! M̀ palà ge kọ́ nèi kọ, à é nveà nu dì belí gyóòlo vaá kọ bà á ĩì tẽ́ kẽ, bé e a gboó dàlà gyã́á nèva kọ bà á dè. 38 Mó gbele ẹ́ẹ́ nyíe e a dìvá gbàà, é be ba tẹ̀ tọ mon kọ bà di kpènà ló tṍó e a dúè, kà bè à dú taa tóm dáá à bè bòm dee! 39 Sõò nyimai kọ, be tẹ̀ íè tọ beè nyimá tṍó e nen zib é dómá, náa gá è sọ̀ bá kọ á baalìè a tọ. 40 Boo bée vó, boolo íè gè dinai gé kpènà ló, mè nda, Sã́áná Nen, é dú boo tṍó e bè nóo géè ẹbmaí dẽe.” 41 Pítà à gboó bĩináe kọ, “Tẹ́ẹ̀, é kọ dò bá nu e a di m lógí dì nè áá beéle, sẹ̀ à dì nè dénè nen é?” 42 Dõò à gboó aalá kọ, “Mée ní e a dú nen kù dẽe ló gyọ́ e a nyímá nu vaá bọ́ ló dẹ̀lẹ̀ nyíe boo, naa kọ a tẹ̀ tọ é beè túe sẹlẹ́ togó pá a gbò tóm kọ á olòó nèva gyã́á boo tṍó é? 43 Léé sĩ́ é díé ból be a tẹ̀ tọ dú vaá tùlàe e a gé tú tómá kilma sĩ́! 44 M̀ ló kà kà bel nèi kọ à é túe sẹlẹ́ togó dénè a gyọ́. 45 Sõò be nen tómá gboó kọ, ʽNà tẹ̀ tọ a bĩ́é dee,’ naa ní e a dàlà togó bòm na gbò tómá, bia nè gbálà, vaá gboó dé nu vaá ṍ míí tẽeá dẽe, 46 a tẹ̀ tọ é beè gboó búé ló vaá dú dee e bè náa géè ẹ̀bmà dẽe nè tṍó e bè náa è nyimá. Tẹ̀ tọá é gboó palà ge kpọ́e té ló vaá túe tẹlẹ kĩ e bà é sẹlẹ gbò e bè náa bọ́ ló dẹ̀lẹ̀ nyíe boo. 47 “Nen tóm e a nyímá nu e a tẹ̀ tọ kọ́ á naa, vaá á gé kpènà ló gè naa, a tẹ̀ tọ é palà ge kpọ́e té ló. 48 Sõò nen tóm e bè náa nyímá nu e a tẹ̀ tọ kọ́ á naa, vaá à naa nu e a bọ́ ló kọ á kpọ́e té ló, à é kpọ́e váí bá ńté ló. Bàrì ból dẽe sĩ́ gbele tõ̀ò nu lọl bá nen e a beè nè gbele tõ̀ò nu. À bolna gé dẽe sĩ́ nen e a beè tú gbele tõ̀ò nu nvee bá kọ á tuna gé gbele tõ̀ò nu lọa bá. 49 “M beè dú ló gè tú kpọ̀ té e a dì belí sã́ tẹlẹ boo gbò nen, vaá íb bé e a taním̄ kọ à gboó bẹ́ taáva naa! 50 M̀ íè ene íb tãàgà e bà é nveèm̄ ló vaá íb bé e a ném̄ bùlà naa, bọ́è kọ à gá è gboó lẹ̀ẹ̀à kọ bé à tá! 51 É kọ à tõoí ló kọ m beè dù ló gè tú kù̃ùnà mon domá boo bàlà booí? M̀ palà ge kọ́ nèi kọ níì kù̃ùnà mon nì; tãa vó, èègà mon. 52 Lọl kátogóí ààmà, tọ e vòò nen dì, gé pooà bàà: Taa nen gé dí ene sĩ́, vaá bàà nen dí na sĩ́á. 53 Èègà mon é dí gbàà nvín pá gbálà nè a tẹ̀, gbàà nvín pá bia nè a kà, nè gbàà va nè a kà dóm.” 54 Jíìzọ̀s beè kọna gé nè bõ̀ònà gbòa kọ, “Tṍó e o monìì gíní boo e a bã dee kĩ e nàànì dọ, ò ólò gboó kọi kọ, ʽBoo é dọọ’--vaá à dọọ. 55 Tṍó e o monìì fọ́ọ́lọ́ e a gé ulà aa boo kpáá bàlà ól, ò ólò kọi kọ, ʻÀ é bẹà sã́’--vaá à bẹà. 56 Boolo gbò bàà sĩ́! Ò láá ẹvii boo sãà kunu kẽ nè sĩ́ káála vaá gboó nyimai bé sĩ́ dee é di naa, sõò éé ní e a náa vaá nóo láá ẹvii nu e a di tṍóí vaá dã́ì tẽ́ é? 57 “Éé ní e a náa vaá boolo nóo béèlàì nu e a dú lé ge naa neai bọọ bá é? 58 Be nen náa bel nèni, pììgà boo ge zọ̀e bila ló tṍó e gbò ge beelá gáà bã m, mè á di vó à dáni bá kẽ simá sĩ́ nen e a é bééláni bel ló, vaá ẹlẹ túni nvee bá nen síì log kọ á túni nvee kpọ́gọ́lọ́. 59 M̀ ló kà kà bel nèni kọ bà náa é sọ́ni bá be o gáà kpẽ kọ̀láá nu e ba è kọ̀.”

LÚÙK 12 - Gokana - 1996 Edition - Bible.is - GKNIBS

Annotations