HÍBRÙ 11 - Gokana - 1996 Edition - Bible.is

1 Gè dẹ̀lẹ̀ nyíe boo Bàrì kọlà ge agala boo nu e e bólì dẽe sĩ́ nè ge palà ge nyimá kọ kà kà e gbò nu e bè née monmà dẽeá dì. 2 Ge kọ gbò e ba è dì kéléá beè dẹlẹ nyíe boo Bàrì ní e Bàrì beè elá boo vaá lèèlàva e. 3 Ge kọ beele gé dẹlẹ nyíe boo Bàrì ní e a náa kọ é tavẹ kọ a mon bel ní e Bàrì beè dèmmà bàlà booí é, naa kọ a beè tú nu e bè née monmà dẽe dèmmà nu e e monmà dẽe. 4 Ge kọ Ébẹ̀l beè dẹlẹ nyíe boo Bàrì ní e a è naa kọ á tú vààla gyọ́ọ e a lée èl ní Kéìn nè Bàrì e. Téní dú ló dẹ̀lẹ̀ nyíe booí ní e Bàrì léevèe bel vaá lèèlà a dõ̀ò nu é. Náa kal ló bée kọ Ébẹ̀l beè ùa, à dì e a gé ló bel nèi tení dú ló bé e a beè dẹlẹ nyíe boo Bàrì naa. 5 Ge kọ Ínọ̀k beè dẹlẹ nyíe boo Bàrì ní e a è naa kọ Bàrì á túe ààmà vaá naa kọ á gá ù e. Tọ́ọ̀ nen náa beè mònnàe boo bée kọ Bàrì beè túe lọl bàlà booí kilma káála. Kpá Káí kọ́ nèi kọ, kọ bé Bàrì à kalá túe ààmà, mè a beè naa nu e a léémá Bàrì. 6 Tọ́ọ̀ nen e bè náa dẹ̀lẹ̀ nyíe boo Bàrì náa gé láá naa nu e a léémáe, boo bée kọ kọ̀láá nen e a gé dú ló Bàrì íe ge zigà kọ Bàrì dì vaá mè à ólò kpẽ kpẽ́ nè gbò e bà gbĩ́e. 7 Ge kọ Nóà beè dẹlẹ nyíe boo Bàrì ní e a è naa, vaá tṍó e Bàrì ãanée kilma ló gbò nu e bè à gáà zẹẹ mònmà dẽe, mè á gbàn tṍ ló Bàrì vaá ká faà e a duulà pá a tọ nè ẹ̀ẹ̀ e. Boo bée vó, bẽge bel beè dọ́ boo pá bàlà boo, vaá Bàrì beè gboó leevè bel Nóà tení dú ló a gè dẹlẹ́e nyíe boo. 8 Ge kọ Ébràhàm beè dẹlẹ nyíe boo Bàrì ní e a è naa kọ á gbàn tṍ ló Bàrì boo tṍó e Bàrì kolíe kọ á aa a bon vaá má sĩ́ bon e ẹlẹ, Bàrì, beè zìgà nèe é. A beè aa a boná àà, boo tṍó e bè náa beè nyimá kĩ e a gé tã́ànè. 9 Íb bé e a dẹ̀lẹ̀ nyíe boo Bàrì naa ní e a è naa kọ á tõo belí nen kyáà m bon e Bàrì beè zìgà nèe é. A beè tõo m tọ kàn dì belí bé e Áízèk nè Jékọ̀b, e bà dú nvée ẹlẹ, e t̃ẽ̀ènè kà zìgà nuí beè dìnà gé nèva, beè tõona gé naaá. 10 Ébràhàm beè láá tõo naa vó boo bée kọ à géè elá bànà bon e Bàrì ní e a beè noo bé e a é tõo naa vaá tìb e, e a dú bon e a é di lee. 11 Ge kọ Ébràhàm beè dẹlẹ nyíe boo Bàrì kọ à é náá nu e a beè zigàè nèe ní e a è naa vaá Bàrì à naa kọ á láá ié nvín é, náa kal ló bée kọ a ána vaá a va, Sẹ́rà, beè dĩi. 12 Náa kal ló bée kọ Ébràhàm beè ana zelí ló gè bòn nvín, áá gbò pá nvín e a manà aa ló ẹlẹ beè bọọ gã́ bug belí gyã́à káála e a di sĩ́ káála nè sãa e a di gã́ pene, e tọ́ọ̀ nen náa é láá bugi. 13 Dénè gbòi beè dẹlẹ nyíe boo Bàrì dọ̀ tṍó e bà ú. Ba beè ú boo tṍó e bà gáà ie nu e Bàrì beè zìgà nèva, sõò ba è mòn nuá e a di kpã́á dee e a gé dú vaá nyíeva à gboó ẹẹ, boo bée kọ ba è zìgà kọ baala gbò e bà die boo kyẽe boo sãa bàlà booí belí bon kyáà. 14 Gbò e bà zìgà naa vó palà ge naa tẹlẹ bàlà kẽ kọ bà gé gbĩ́è kĩ e bà é náamàè baála bon. 15 Bà náa beè ẹ̀ànà nvée ẹ̀b bon e ba è ààa. Bà á kọ nyíeva á di boo bon e ba è ààa, bà gá è beè láá gbĩ́ deè ge òòa kẽ. 16 Sõò bà géè gbĩ́ bon e a lée èl bon e ba è ààa, vaá níé káála. Boo bée vó, kẹ́ẹ náa gboó sii Bàrì kọ bà kolìè ẹlẹ ba Bàrì, boo bée kọ à íe bon e a beè kpoogè dee ló sẹ̀ẹ̀va. 17 Ge kọ Ébràhàm beè dẹlẹ nyíe boo Bàrì ní e a è naa kọ á zìgà ge tú a sã́áná, Áízèk, vaamá gyọ́ọ nè Bàrì boo tṍó e Bàrì beè ẹbmàe. Ébràhàm, e Bàrì beè zìgà nu nèi, beè gboó kpènà ló gè tú áá kà nvín e a íeí vaamá gyọ́ọ nè Bàrì, 18 vaá Bàrì beè kọ́ nèe kọ, “Aa m Áízèk ní e o é íe mana mana e m beè zìgà nèni é.” 19 Ébràhàm beè buga togó vaá kọ Bàrì é láá kẽee Áízèk lọl ke mà ú--vaá è é láá kọ́ naa vó kọ Bàrì kẽe Áízèk lọl ke mà ú vaá òòmàe nè Ébràhàm. 20 Ge kọ Áízèk beè dẹlẹ nyíe boo Bàrì ní e a è naa kọ á bàn Bàrì kilma ló tṍó e a di deè sĩ́ kọ á tãanè dee bá Jékọ̀b nè Ísọ̀ e. 21 Ge kọ Jékọ̀b beè dẹlẹ nyíe boo Bàrì ní e a è naa, vaá tṍó e a é gé ù, a beè bàn Bàrì kọ á tãanè dee bá bu kà pá nvín pá gbálà e Jósẹ̀f beè ié é. A beè dọ̀ bẹ̀là a kpóó té tọ́gà kẽ vaá tãaga ló Bàrì. 22 Ge kọ Jósẹ̀f beè dẹlẹ nyíe boo Bàrì ní e a è naa, vaá tṍó e a é gé ù, a beè kọ́ nu e a kil ló kọ pá Ízràẹ̀l é aa Íjèpt vaá kọ́ bé e bà é sẹlẹ̀è a íí naa é. 23 Ge kọ tẹ̀ Mózìs nè a kà beè dẹlẹ nyíe boo Bàrì ní e a è naa, vaá tṍó e Mózìs ni meà lọ̀l vaá bà mòn bé e a dú lé gbálà naa, ba è tú taa ẽ́ gõmáe vaá pọ̀ náa síiva ló gè lọl togó kè kẽ lẹ̀ẹ̀là e méné beè tenmá é. 24 Ge kọ Mózìs beè dẹlẹ nyíe boo Bàrì ní e a è naa, vaá tṍó e a ni bọọ, náa è zìgànà ge kọ̀là nvín síla Méné Íjèpt e. 25 A è leemáe gè zọ̀ gbò nvín Bàrì mon tãàgà èlmà ge tõo m kpéè ló pọ́lọ́ m gbálà ńkem tṍó. 26 A beè ẹ̀b kọ gè nvèèà lẹ́ boo bée Méné e Bàrì Sa lée èl dénè gyọ́ e a di Íjèpt, boo bée kọ a beè bolí dẽe sĩ́ kp̃ẽ̀ kpẽ́ e Bàrì é née. 27 Ge kọ Mózìs beè dẹlẹ nyíe boo Bàrì ní e a è naa, vaá à aa Íjèpt vaá pọ̀ náa è siíe ló sṹg e a di gbàà Méné Íjèpta é. Mózìs náa beè ẹ̀à nvée. Tãa vó, a beè belí bé e Bàrì, e dẽe nen náa moàa, dìé sĩ́ e ẹlẹ gé moníe lee. 28 Ge kọ Mózìs beè dẹlẹ nyíe boo Bàrì ní e a è naa, vaá à lẹ̀ẹ̀là kọ pá Ízràẹ̀l á dàlà togó Vààla Gyọ́ọ Ténì Zelí, vaá kọ bà á tú mii ból pine ló ba té nu tọ, kọ bé nyómá tóm Bàrì e a é fáálá ú tenmá náa fẹ́ ba gbò sã́áná é. 29 Ge kọ pá Ízràẹ̀l beè dẹlẹ nyíe boo Bàrì ní e a è naa kọ bà á láá kyãàmà tọ tení Mii Mii Pene belí bé e bà gé kyãa boo kã́á kãà kẽ é. Tṍó e pá Íjèpt kọ́ bà á doè, múúá à túva. 30 Ge kọ pá Ízràẹ̀l beè dẹlẹ nyíe boo Bàrì ní e a è naa, vaá gbọọ bon Jẹ́rìkò beè dọ tṍó e ba ni tú àlàbà dee kyãàmà beeá ló é. 31 Ge kọ ńnváá kùnà kúnà e a kọlà Réhàb beè dẹlẹ nyíe boo Bàrì ní e a è naa, vaá bà náa è fẹ́e gbá ló gbò e ba è lọl togó kè kẽ Bàrì e, boo bée kọ a beè tú lé bá tumá pá Ízràẹ̀l e ba è gũá dù gé noo dẽe ló bé e bon Jẹ́rìkò dì naa. 32 Ḿ kọ́ éé lọl ló é? Tṍó náa é gbõoma be m̀ kọ́ ḿ kọ́ nu e a kil ló Gédìọ̀n nè Béràk nè Sámsọ̀n nè Jẹ́ftà nè Dévìd nè Sámùẹ̀l nè gbò kọ́ bùlà Bàrì. 33 Ba beè dẹlẹ nyíe boo Bàrì, vaá boo bée vó, ba è láá begagi kpá dó èl bá. Ba beè naa lé nu vaá ié nu e Bàrì beè zìgà nèva nvea bá. Ba beè ká gã́ kpẹẹ̀, 34 bà gimè bẹẹ sã́, bà kìl aa dáa gẹ̀ bé. Bàrì beè sièva kpóó ló boo tṍó e lóva gá è ọọ, naa kọ bà á sí gyãà dẽe bé vaá èl bá gbò bé pá dõòna dõòna kà dó. 35 Gbò pá bia beè dẹlẹ nyíe boo Bàrì, vaá boo bée vó, Bàrì à kẽee ba vígà e a beè ù lọl ke mà ú. À íe dõòna gbò e gbò nen beè bómàva bàg, vaá boo bée bé e a é náa vaá bà láá kẽ̀èà vaá ié dùm e a lée èl níí, bà náa beè zìgà kọ bà á sọèva bá dọ̀ tṍó e bà ú. 36 Ba beè nvèèmà lẹ́ sìgà ọ̀và vaá kpọ́va té ló, vaá bà tú díí kpọ́gọ́lọ́ bọbmá sìgà ọ̀va kilma tọ kpọ́gọ́lọ́. 37 Ba beè tobmàva dem, bà tú gẹ̀ bèkéè bààmàva bàà, vaá tú gẹ̀ bé fẹmáva. Ba beè nvèà kọ̀là ló e bà tú kpá naanà ból nè kpá kà ból naamá. Ba beè dọ̀ tãa vaá tuá kpọ̀ té nè bíígá ló. 38 Bàlà booí náa beè bọ́va ló! Ba beè kẹgili boo kpáá bàlà ól nè boo gù, vaá tõo m kóló dem nè m deè e a di kunu kẽ. 39 Bàrì beè lèèlà dénè gbòi boo bée kọ bà dẹlẹ̀e nyíe boo. Sõò bà gáà beè ie nu e Bàrì beè zìgà, 40 boo bée kọ Bàrì beè noo ní e a palà ge dú lé sẹ̀ẹ̀ beele, vaá kọ baala náa é láá mmá e bè beele é gévá ló.

HÍBRÙ 11 - Gokana - 1996 Edition - Bible.is - GKNIBS

Annotations