GALÉSÌÀ 2 - Gokana - 1996 Edition - Bible.is

1 Tṍó e òb nè ténì gbáá ni téní, m beè gboó ooa kẽ sí Jerúsàlẹ̀m, Baanàbàs nè m̀m̀. M beè faalana gé Táítọ̀s. 2 Bàrì beè kùùlà nèm̄ kọ ḿ sì, vaá boo bée vó, m̀ gboó sì. M beè baa dẽe gbò e bà di bõ̀òna ló Kráìst kĩé, boo kà lèlà bá Lé Kpẹa e nda gé vee nè gbò e bè níì pá Júù nì. Èlmà tõ̀ò, m beè bã ló ba gbò tule e bà ólò palà ge nvèè ka ló, vaá aa deè baa tẽ́ dénè ẹ̀ẹ̀ nèva kĩ e áá baala dì, boo bée kọ ním̄ beè gbĩ́ tọ́ọ̀ nu e a é náa kọ dénè tóm e m gé sí, à bè ní e m ni sí tenmá, á dú pè. 3 Táítọ̀s e a beè dìm̄ lóí beè nen Gríìk, sõò bãànà vó, gbò tuleí náa beè gboó gé tú bá kpóó siimáe kọ bà íè ge koóe, 4 náa kal ló bée kọ kélè gbò géè zèl kọ bà íè ge naa vó. Na gbò beè gẹẹlẹ ló bã̀í zẹ̀ẹ̀ m ge sẹlẹ ló kọ baala zọèi dẹlẹ̀è nyíe boo Kráìst, boo tṍó e bà géè gbĩ́ gè ẹ̀b íb dì pọ́ì e beele íè m gè gbaa ló Kráìst, nyòòmà bé e a é náa vaá bà túèi nveenìe kè bá gyóòlo. 5 Sõò née beè nèva tọ́ọ̀ kà foga deè kọ baala á kọ́ nu e beele é náa nèi, nyòòmà bé e a é náa vaá ò láá kilii sĩ́ gè iei Lé Kpẹaí m a lèlà. 6 Na gbò tule, e baala náámá gbò e bà palà ge nvèè ka lóí, náa beè ié tọ́ọ̀ kà ãa nu e bà láá tẹlẹ ló kọ ním̄ beè noomà. (Kọ̀láá nu e gbò tuleí beè zẹẹ́ dù náa bọọ ló nda. Bàrì náa ólò sà sĩ́ nen.) 7 Tãa gè tẹlẹ̀ ãa nu ló, ba beè mòn vaá nyimá kọ Bàrì beè lẹ̀ẹ̀là nda kọ ḿ vee a kpẹa nè gbò e bè níì pá Júù nì, belíná gé bé e a beè lẹ̀ẹ̀là Pítà kọ á vee nè pá Júù naaá. 8 Boo bée kọ Bàrì e a beè nè kpóó Pítà kọ á dú nen e Jíìzọ̀s lẹẹlà má pá Júùa ní e a nenà gé kpóó nda kọ ḿ dú nen e Jíìzọ̀s lẹẹlà má gbò e bè níì pá Júù nì e. 9 Boo tṍó e Jém̀z nè Pítà nè Jọ́ọ̀n, e gbò nen beè ẹ̀bva belí gbò e bà dú bã̀ e a di ló bõ̀òna ló Kráìsta, ni mon íb sàn nyíe e Bàrì tẹ́lẹ boo nda, ba beè gboó tú kpáí bá Baanàbàs nè nda m ge zààvàí ló nveea zẹ̀ẹ̀, vaá kọ beele é kpee sĩ́ ló gbò e bè níì pá Júù nì, boo tṍó e baala gé kpeelìè sĩ́ ló pá Júù. 10 Áá nu e ba è bĩináí bá beè kọ̀là kọ é olòó kẽea boo gbò tãa, e a dúná gé kà lèlà bá nu e a beè olòó palà ge tàn nda gè naa. 11 Tṍó e Pítà dú iná Ántìọ̀k, m beè dọ̀e sĩ́ kanáe, boo bée kọ a beè naa nu e a bĩ́íná gè kọ́e bel. 12 Dénè gbò dee e Jém̀z gáà beè lẹ̀ẹ̀là tọ́ọ̀ nen domá Ántìọ̀ka, Pítà beè olòó zọ̀ gbò e bè níì pá Júù nì deá gyã́á. Sõò à gé mon gé gbòa, à gboó kpòòlà ló lọl ló gbò e bè níì pá Júù nì vaá náa zọnàva deá nu, boo bée kọ pọ̀ beè siíe ló pá Júù e bà nóomà kọ nen Júù á gá zọ̀ nen e bà gáà kooe naaá tọ́ọ̀ íb nu. 13 Na gbò vígà m Kráìst e bà dúna gé pá Júùa beè gboó zọ̀nàe gé tob kììà, naa ní e bãànà Baanàbàs beè zọ̀va tuna gé dẽe nen naamá vó. 14 Sõò tṍó e nda monì kọ nu e bà gé náa náa lelà, nè ge kọ náa zọ̀ kà kà bel e Lé Kpẹa nóomà gbaá ló, m beè gboó gbẹá kè sĩ́ dénè ọ̀và kọ́ nè Pítà kọ, “Be olo, e o dú nen Júù, láá maaná kĩé lọl vaá tõo belí nen e bè níì nen Júù nì, éé náá vaá olo ò gbĩ́ gè tú bá kpóó siimá gbò e bè níì pá Júù nì kọ bà á tõo belí pá Júù e?” 15 À dú kà kà kọ beele beè mèà vaá dú pá Júù. Née beè mèà vaá dú “gbò pọ́lọ́, e bè níì pá Júù nì” belí bé e beele kólìva naa. 16 Sõò è nyímà kọ níì bé e nen láá sẹlẹ Log naa ní e a é náa vaá Bàrì léevèe bel é nì. Tãa vó, áá gè kọ nen dẹlẹ nyíe boo Jíìzọ̀s Kráìst ní e a é náa kọ Bàrì á leevèe bel é. Vaá beele beè gboó dẹlẹna gé nyíe boo Jíìzọ̀s Kráìst kọ bé Bàrì léevèi bel tení dú ló bẹẹ gè dẹlẹ nyíe boo Kráìst, e bè náa é dẹẹa boo bé e e láá sẹlẹ Log naa. Boo bée kọ Bàrì náa é léevè bel tọ́ọ̀ nen kọ à láá sẹlẹ Log. 17 Be kóló gè kọ beele gé piigà kọ Bàrì á leevèi bel tení dú ló bẹẹ gè gbaa ló Kráìst ní e a gboó tunái naamá “gbò pọ́lọ́, e bè níì pá Júù nì” e, é kọ Kráìst gáà du gé nen e a gé lẹẹlà pọ́lọ́á? Á lọ̀! 18 Be nda kpáá gé tõo tẽ́ kẽ gbò nàà nu e nda beè tãa bá uulá kẽá, na tóm ní e m dú nen e m gé gbáálá Log é. 19 Boo bée kọ nda nè Log tõoà belí íí nen e bè á géná kè bá Log, vaá é Log ní e a beè fẹ́m̄ é. M̀ dú íí kilma kĩ e Log dì, kọ bé m̀ láá tõo dùm nè Bàrì. Nda beè zọ̀ Kráìst ú gbẹa boo bàà gbànà té, tṍó e ba è káeá, 20 vaá be à dú ge kọ m̀ di dùm kátogóí, náa dúna kọ nda ní e m di dùm e, sõò Kráìst ní e a di dum m̄ím̄ é. M̀ tú ge dẹlẹ nyíe boo Sã́áná Bàrì e a beè vùlèm̄ vaá úm̄ boo tõoma m na kà dùm e nda di m kátogóí. 21 Nda ním tom gè kìn sàn nyíe Bàrì. Boo bée kọ be o kọ́i kọ mè bé e nen láá sẹlẹ Log naa ní e a é náa vaá Bàrì léevèe bel é, na tóm ò gé kọ́i kọ ú e Kráìst beè ùa náa dọ tọ́ọ̀ kà bélè!

GALÉSÌÀ 2 - Gokana - 1996 Edition - Bible.is - GKNIBS

Annotations