IBS

Audio:

Drama Text Size

Back Forward

Table of Contents

Books

Chapters

Table of Contents

play
pause
stop
min volume
max volume

00:04 / 03:29

2 TẸSALỌNÁÍKÀ 3 - Gokana - 1996 Edition - Bible.is - GKNIBS

1 Ge mmè, e pá vígà, tãagai ló Bàrì mai beele kọ bé mon bel Dõò láá vàlẹ̀ bá zààlà tení ló kẽ vaá ié ka, belí bé e a è nááá zẹ̀ẹ̀ boolo naa. 2 Bannai gé Bàrì kọ á uúi lọl bá gbò bàg nè gbò pọ́lọ́, boo bée kọ níì dénè nen ní e a ziga ló mon bel Bàrì e nì. 3 Dõò bọ́ ló dẹ̀lẹ̀ nyíe boo, vaá à é nveèi kpóó ló vaá kpènài lọl bá Pọ́lọ́ Nená. 4 Dõò náa kọ nyíe beele á àgài boo. È nyímà kọ ò gé náanii belí bé e beele beè kọ́ naa nèi vaá mè ò é kilii sĩ́ gè naanii vó. 5 È gé ban kọ Dõò á naa kọ ó nyimai íb bé e Bàrì vulèi naa, vaá à náa kọ ó láá ĩimai belí bé e Kráìst beè ì̃ìmà naa. 6 Pá vígà, è gé élá boo bée bẹẹ Dõò Jíìzọ̀s Kráìst vaá nèi na kà lẹ̀ẹ̀lài kátogóí kọ ó kpoolai ló lọlii ló kọ̀láá kà vígà e a dú kpọ̀lọ̀ vaá náa tõo íb dùm e o beè monii bá beele. 7 Boolo nyímàì kọ à bọ́ ló kọ ó tõonii íb dùm e beele beè tõo. Boo tṍó e beele beè dìí lóá, née beè dú kpọ̀lọ̀. 8 Née beè dé gyã́á tọ́ọ̀ nen pọ́ì, sõò e beè sí agẹ tóm vaá kpọá té ló, vaá tú bílá dee nè ẹ́ẹ́ èlà simá pííla, kọ bé née dú nyèè tò nè tọ́ọ̀ bọ̀ì. 9 À dú kà kà kọ è íè kpóó e e gá è láá kọmá nèi kọ ó tui gyã́á domai, sõò e beè gbĩ́ gè tú bẹẹ ló nè, naamá nu dòmà bá nè boolo, kọ bé ò nói nu lọlii ló. 10 Boo tṍó e beele beè dìí lóá, e beè olòó kọ́ nèi kọ, “Nen e bè náa gbĩ́ gè sí tóm, á gá dé gyã́á.” 11 È gé kọ́ vóí nèi boo bée kọ è dã́ kọ sìgà bọ̀ì dúì kpọ̀lọ̀. Bà náa gé sí tọ́ọ̀ kà tóm. Tãa vó, bà olòó dọ kẽ ló bel tení ló kẽ. 12 È gé élá boo bée Jíìzọ̀s vaá nè lẹ̀ẹ̀là gbò e bà dì belí vó, vaá dùùlàva bá deè tṍ kọ bà á fẹẹlẹ ló sí tóm, kọ bé bà ié gyã́á e bà é dé. 13 Tãa bá boolo, e pá vígà, lói á gá ọọ ló gè naa lé nu. 14 Palà ge biilii dẽe sĩ́ nen e bè náa gban tṍ ló nu e beele émi m kpáí. Ó gá zọíe gbai tọ, kọ bé kẹ́ẹ sííe. 15 Sõò ó gá ẹvííe belii bọọ nen ọ́b; tãa vó, ò duulaíe bá deè tṍ dìgà belí bọọ vígà. 16 Kátogóí, è gé ban Dõò fẹ́ẹ́ fẹẹ̀ ló kọ á olòó tú ńlẹ ló nèmài fẹ́ẹ́ fẹẹ̀ ló kọ̀láá tṍó, m kọ̀láá kà di tõ̀ò. Dõò á zọ̀ dénè bọ̀ì tõ̀òà. 17 Nda, Pọ́ọ̀l, tú ńda bá emmá na kà kànà mòn kólí. Níí nu e o é ténií ló vaá nyimai ló kọ̀láá kà kpá e a dú bá nda é. Níí ńda bá kpá. 18 Sàn nyíe bẹẹ Dõò Jíìzọ̀s Kráìst á zọ̀ dénè bọ̀ì tõ̀òà.

Copyright ℗ 2005 Hosanna