2 KỌ́RÌNT 4 - Gokana - 1996 Edition - Bible.is

1 È nyímà kọ sàn nyíe e Bàrì íé ní e a náa kọ á nèi tómí kọ é sì e. Vóá à naa, lói náa ọọ. 2 È kin kọ̀láá kà nu kẹ́ẹ e gbò nen ólò naa ke gù̃a. Née ólò gbĩ́ gè kẹlẹ gbò nen, à bè ge kyọ̀gàlà mon bel Bàrì. Bàrì á sí nen di tõ̀ò nèi, kọ è dọ bàlà kẽ ló kà kà mon bel Bàrì. È náà vóí, bé gbò nen mon kọ è gé náa lèlà nu. 3 Boo bée kọ, be à íe gbò e Lé Kpẹa e beele gé veeí gũá ló, níá gbò e bà é pe. 4 Bà náa ziga ló mon bel Bàrì, boo bée kọ Pọ́lọ́ Nyómá, e a gé lẹẹlà bel ló bàlà booí, a gímèva dẽe m nyómá. À náa kọ bà á gá láá mòn ẹ́ẹ́ dee e a mo aa ló Lé Kpẹa e a kil ló bé e Kráìst, e a di m bela Bàrì, dú dù̃ùnè naa. 5 Boo bée kọ née vee kpẹa e a kil ló bẹẹ bá. Sõò è vee kọ Jíìzọ̀s Kráìst ní e a dú Dõò e, vaá è kọ beele gé sí tóm nè boolo boo bée Jíìzọ̀s. 6 Bàrì beè kọ, “Ẹ́ẹ́ dee é mo aa gbàà kùkùù gín.” T̃ẽ̀ènè kà Bàrì e a è kọ́ vóá, ní e a náana gé kọ a ẹ́ẹ́ dee á mo m beéle nyíe é, gè naa kọ é nyimá ló dù̃ùnè Bàrì e a mo aa sĩ́ Kráìst. 7 Sõò beéle e e íè na kà gyọ́ m nyómáí dìgà belí pọ́ì ńbã́ sãa, m ge naa zogè kọ gbele kpóó e a di m mon bel Bàrìi dú bá Bàrì, mè níì bá beele nì. 8 Gbele tõ̀ò tṍó bà nveei tãàgà ló, sõò bà náa láá kpègii. Sìgà tṍó è íè bàà bàà bùlà, sõò née peè bùlà. 9 Bà biigèi ló, sõò Bàrì náa iàí ló. Sìgà tṍó bà konii uu kẽ, sõò bà náa láá kyọ̀i sĩ́. 10 Dénè tṍóí è di m àà zib bã́ gè kọ bà é láá fẹ́i dì belí bé e ba è fẹ́ Jíìzọ̀s naa. Vaá gè kọ bẹẹ nom kpá ló di dùmi, náa zogè kọ mè Jíìzọ̀s dìnà gé dùm. 11 Boo tṍó e e di di dùmi, è di m àà zib bã́ lee gè kọ bà é láá fẹ́i boo bée Jíìzọ̀s. Vaá gè kọ bẹẹ nom kpá ló, e a é láá ùi, di di dùmi náa zogè kọ mè Jíìzọ̀s dìnà gé dùm. 12 Vóá à naa, beele di m àà zib bã́ lee kọ bà é láá fẹ́i, sõò vó ní e a é náa kọ boolo ó iei dùm e. 13 Ba beè emí m Kpá Káí kọ, “M̀ dẹlẹ̀ nyíe boo Bàrì. Vó à naa, m̀ gboó ló bel.” T̃ẽ̀ènè báá bé e beele dẹlẹna gé nyíe boo Bàrì naa é, vaá è ló bel Bàrì boo bée kọ è dẹlẹ̀e nyíe boo. 14 Beele nyímà kọ Bàrì, e a beè kẽee bẹẹ Dõò Jíìzọ̀s lọl ke mà úá, é kẽeena gé beele dì belí bé e a è kẽee Jíìzọ̀s naaá. À é tú boolo nè beele gbá ínmá kè sĩ́ Jíìzọ̀s. 15 Dénè gbò nuí naaá bé à dọ bélè nè boolo, vaá gbò nen é kpáá ṍá Bàrì zaa vaá lèèlàe boo tṍó e a é duulà kà gã́ bug gbò nen tení dú ló a sàn nyíe. 16 Boo bée vó, nyíei di agẹ. Náa kal ló bée kọ bẹẹ nom kpá ló e nen monmà dẽeí dì e a gé áná, bẹẹ nyómá gé dú ãa bu dee. 17 Gbálà ńkem tãàgà e e gé moní náa é di lee. À é man gbele ka e a é di dọ̀ dèdè, vaá kaá é palà ge bọọ èl tãàgài. 18 Boo bée kọ née tú bẹẹ bùlà mmè boo nu e e monmà dẽe, sõò è mmè boo nu e bè née monmà dẽe. Nu e nen monmà dẽe náa é di lee, sõò nu e nen náa monmà dẽe é di dọ̀ dee e bè náa tá.

2 KỌ́RÌNT 4 - Gokana - 1996 Edition - Bible.is - GKNIBS

Annotations