1 TÉMỌ̀TÌ 4 - Gokana - 1996 Edition - Bible.is

1 Nyómá Káí palà ge kọ́ nèi kọ, dee dee nvée tṍó, mè sìgà gbò é beè sãànà bá ló dò bá nu Kráìst. Bà é gban tṍ ló nyómá dàg vaá tú dò bá nu zọ. 2 Gbò dò bá nuí é zaalà tení bá gbò bàà sĩ́ e bà é kpọ́ kyáá bel. Gbòi náa nyímá ló lé nè pọ́lọ́, boo bée kọ ba bùlà dú íí belí nu e ba è tú sã́ kpọ́gọ́lọ́ ọbmá fẹ̀. 3 Bà nóomà kọ nen á gá ilí va, nè ge kọ nen á kalí sìgà íb gyã́á. Sõò Bàrì beè dèm dénè gyã́áí kọ gbò e bà ziga ló kà kà bel vaá nyima nu e a kọlà á õá Bàrì zaa boo gbò gyã́áí vaá bà dé. 4 Kọ̀láá kà nu e Bàrì beè dèm dú lé, vaá náa dú lé gè kìn tọ́ọ̀ kà. Tãa vó, à dú lé kọ é õá Bàrì zaa boo kọ̀láá kà nu vaá è dé, 5 boo bée kọ mon bel Bàrì nè tãàga ló e e tãaga boo gyã́áá náa kọ á õ̀òà vaá di káí. 6 Be ò tú gbò dùùlà bá deè tṍí nè pá vígà m Kráìst, ò é dú lé nen tóm Kráìst Jíìzọ̀s. Vó é zógè kọ mon bel Bàrì e e ziga lóá nè lé dò bá nu e o di nvéeá ní e a gé búmáni é. 7 Kpòòlà ló lọl ló gbò dagi bá lóg pá bàlà boo e a belígi lóg gbò nómá va. Olòó kànà ló o nyómá kọ lóe á di agẹ m ge fã̀ Bàrì. 8 Boo bée kọ pọ́ì ge kànà ló kọ ló nen á di agẹ íe gé ńlẹ bélè, sõò ge kànà ló m ge fã̀ Bàrì íè bélè tenmá kọ̀láá bá e a dì, boo bée kọ à íe nu e a é néi m na kà dùm e e dií nè m dùm e a di sĩ́ e a gé dú. 9 Na kà belí dú kà kà vaá bọ́ ló kọ dénè nen á aa deè ziga: 10 È gé gbólá kpóó ló vaá palà ge sí tóm agẹlẹ bá, boo bée kọ è tú bẹẹ nyíe dẹlẹ boo Bàrì e a di dùm, e a dú Nen Dùùlà e a dì nè dénè nen, èlmà tõ̀ò ló gbò e bà dẹlẹ́e nyíe boo. 11 Kọ́ nèva kọ bà á naa gbò nuí vaá ò olòó noomàva. 12 Ó gá zìgà kọ tọ́ọ̀ nen á ẹbni tẹlẹ kẽ kọ ò di dí pá nvín. Tãa vó, ò dú nu dòmà bá nè na gbò e bà dẹlẹna gé nyíe boo Jíìzọ̀sa tenmá ló bá e o é lómá bel, bé e o é láví láb naa, bé e o é íe vulà súú dẽe ló naa, bé e o é dẹlẹ nyíe boo Jíìzọ̀s naa, nè bé e o é tõo dùm e a õoà naa. 13 Nvèè sĩ́ ló gè olòó bugi nu e a di m Kpá Káí nè gbò nen kọ bà á dã̀, vaá ò olòó nvèè kpóó ló gbò nen vaá noomàva nu dọ̀mà tṍó e nda é dú. 14 Ó gá gbẹmà nvée dõ̀ò nu e a dìní m, e Bàrì beè nèni tenmá gã́ gbò kọ́ bùlà Bàrì boo tṍó e gbò tule bõ̀òna ló Kráìst beè bõoná vaá dẹlẹ́ni bá bólá. 15 Tú o ló nè ge sí dénè gbò tómí kilma sĩ́, kọ bé dénè nen mon bé e o gé kil sĩ́ naa. 16 Palà ge ọẹ dẽeni e a kil ló íb láb e o é láví nè íb nu e o é nóomà. Olòó naa vó lee, boo bée kọ be ò náa vó, ò é láá dùùlà o bá, biina gé ló gbò e bà gé pãanéni tṍ ló.

1 TÉMỌ̀TÌ 4 - Gokana - 1996 Edition - Bible.is - GKNIBS

Annotations