1 JỌ́Ọ̀N 4 - Gokana - 1996 Edition - Bible.is

1 Pá nà lé kóò, ó gá zigai ló dénè nyómá, sõò palà ge ẹvii be à dú gé Nyómá e a aa bá Bàrì. Boo bée kọ à íe gbele tõ̀ò gbò e bà kpọ́ kyáá kọ baála gbò kọ́ bùlà Bàrì e bà ni zaala bàlà boo. 2 Nee bé e o é náanii vaá nyimai ló Nyómá Bàrìi: Kọ̀láá kà nyómá e a kọ́ tẹlẹ bàlà kẽ kọ Jíìzọ̀s beè mèà dú nen boo bàlà booí aa bá Bàrì. 3 Kọ̀láá kà nyómá e a amà sàn kọ Jíìzọ̀s beè mea dú nen náa aa bá Bàrì. Níá nyómá Nen Ọ́b Kráìst. O beè dãi kọ à é dú, vaá kátogóí a íná bàlà booí. 4 Sõò boolo aalii bá Bàrì, e pá nà nvín e m vulè, vaá o béi gbò e bà kpọ́ kyáá kọ baala gbò kọ́ bùlà Bàrì elii bá, boo bée kọ nen e a di m boolo el nen e a di m pá bàlà boo. 5 Baala pá bàlà boo. Vóá bà ló bel belí pá bàlà boo, vaá pá bàlà boo à pãanéva tṍ ló. 6 Sõò beele aa bá Bàrì. Kọ̀láá nen e a nyímá ló Bàrì ólò pãanéi tṍ ló. Kọ̀láá nen e bè náa aa bá Bàrì náa ólò pãanéi tṍ ló. Níá sĩ́ deè e e é láá nyimá ló Nyómá kà kà bel lọl ló nyómá kẹ̀lẹ̀ e. 7 Pá nà lé kóò! Naanii mè é vulè ene, boo bée kọ vulà aa bá Bàrì. Kọ̀láá nen e a vulè nen aa bá Bàrì vaá nyima ló Bàrì. 8 Nen e bè náa vulè nen náa nyímá ló Bàrì, boo bée kọ Bàrì dú vulà. 9 Sĩ́ deè e Bàrì tẹ́lẹ̀ a vula bàlà kẽ nèi kọlà vóí: À lẹẹlà áá kà a Sã́áná tẹlẹ bàlà booí kọ bé è íe dùm tenmáé bá. 10 Níí ní e a zógè vulà e: Náa dú kọ beele beè vùlè Bàrì, sõò ẹlẹ ní e a vulè beele vaá lẹ̀ẹ̀là a Sã́áná kọ á vaaá gyọ́ọ boo bẹẹ pọ́lọ́ é. 11 Pá nà lé kóò, be Bàrì vulè beele naa vó, à bọ́ ló kọ beele é vùlè ene. 12 Tọ́ọ̀ nen gáà mòn Bàrì. Sõò be è vulè ene, Bàrì é tõoí m vaá a vulà é gboó gbõomaí m. 13 È nyímà kọ à tõo m beele vaá beele è tõoé m, boo bée kọ à néi a Nyómá Káí. 14 È monì vaá kọ́ nè gbò nen kọ Tẹ̀ beè lẹ̀ẹ̀là a Sã́áná kọ á gé dùùlà bàlà boo. 15 Kọ̀láá nen e a kọ́ tẹlẹ bàlà kẽ kọ Jíìzọ̀s dú Sã́áná Bàrì, Bàrì tõoé m vaá ẹlẹ à tõo m Bàrì. 16 Beele è nyímá bé e Bàrì vulèi naa, vaá è dẹlẹ nyíe boo a vulà. Bàrì dú vulà, vaá nen e a tõo m vulà tõo m Bàrì, vaá Bàrì à tõoé m. 17 Bàrì tú a vulà gbõomeí m kọ bé lói láá taaá Dee Bèèla Bel. Vaá è é láá ié na kà táàà lóí, boo bée kọ dì belí bé e ẹlẹ dì naa, vóá bé e beele, e e di boo bàlà booí, dìnà gé naa é. 18 Pọ̀ á gé ló vulà. Tãa vó, vulà e a gbõoma ólò kpó pọ̀. Pọ̀ ólò faalá kpọ̀ té, vaá nen e a sííá pọ̀ gáà ie vulà e a gbõoma. 19 Beele vulè, boo bée kọ ẹlẹ beè zẹẹ́ vùlè beele. 20 Be nen kọ́, “Nda vulè Bàrì,” vaá ọví a vígà, ẹ̀ẹ̀ nen kyáá bel. Boo bée kọ nen e bè náa vulè a vígà, e a mon, náa é láá vulè Bàrì, e bè à gáà mòn. 21 Níí ní lẹ̀ẹ̀là e Bàrì beè nèi é: Kọ̀láá nen e a vulè Bàrì á vùlènà gé a vígà.

1 JỌ́Ọ̀N 4 - Gokana - 1996 Edition - Bible.is - GKNIBS

Annotations