1 JỌ́Ọ̀N 3 - Gokana - 1996 Edition - Bible.is

1 Ni ẹvii bé e Tẹ̀ vulèi naa, vaá naa kọ beele é kọ̀là pá nvín Bàrì--níá kà lèlà bé e e dì naa é. Vó ní e a kọ́ bàlà boo á gá nyimái ló é, boo bée kọ bà náa beè nyimá ló Bàrì. 2 Gbò e m vulè, kátogóí bẹ̀ì pá nvín Bàrì, vaá nu e e é bélí gáà palà ge dọ bàlà kẽ. Sõò è nyímà kọ tṍó e Kráìst é dọ́ bàlà kẽ, mè è é bélíe, boo bée kọ è é moníe m kà lèlà a mèà. 3 Kọ̀láá nen e a íe na kà ból dẽe sĩ́ boo Bàrì ólò õ̀ònà a ló, belí bé e ẹlẹ, Bàrì, õoà naa. 4 Kọ̀láá nen e a tõo m dùm gè sí pọ́lọ́ dọ log Bàrì, boo bée kọ gè sí pọ́lọ́ dú gè gbaalá log. 5 Ò nyímàì kọ Kráìst beè dú ló gè tú pọ́lọ́ lọl ló gbò nen. Tọ́ọ̀ kà pọ́lọ́ á gé m ẹlẹ. 6 Tọ́ọ̀ nen e a tõo m Kráìst náa ólò kil sĩ́ ló gè sí pọ́lọ́. Kọ̀láá nen e a kil sĩ́ ló gè sí pọ́lọ́ gáà gbĩe mòn à bè ge nyimae ló. 7 Tọ́ọ̀ nen á gá kẹlẹ́i, e pá nà nvín e m vulè! Nen e a náa nu e a léémá Bàrì dú nen lé lab dògò, belí bé e Kráìst dú nen lé lab dògò naa. 8 Nen e a tõo m dùm gè sí pọ́lọ́ dú ló Pọ́lọ́ Nyómá, boo bée kọ Pọ́lọ́ Nyómá beè sí pọ́lọ́ domá kà dàà togó. Nu e Sã́áná Bàrì beè dú ló kọlà ge kyọ̀ sĩ́ bá tóm Pọ́lọ́ Nyómá. 9 Tọ́ọ̀ nen e a dú nvín Bàrì náa ólò tõo m dùm gè sí pọ́lọ́, boo bée kọ dùm Bàrì sí súú gbẹaé m. Náa é láá kil sĩ́ ló gè sí pọ́lọ́, boo bée kọ ẹ̀ẹ̀ nvín Bàrì. 10 Nee kele e a di zẹ̀ẹ̀ pá nvín Bàrì nè pá nvín zọí: Tọ́ọ̀ nen e bè náa náa nu e a léémá Bàrì à bè ge vùlè a vígà, níì nvín Bàrì nì. 11 Kpẹa e o beè dãi lọlii kà dàà togó kọlà kọ é mòn kọ é vulè ene, 12 vaá mè é gá belí Kéìn, e a beè dú nvín Pọ́lọ́ Nená, vaá à fẹ́ a vígà. Vaá éé ní e a beè di boo fẹ́e é? A beè fẹ́e boo bée kọ ńlẹ láb beè dú pọ́lọ́ vaá ní a vígà à dú lé. 13 Boo bée vó, á gá bọọí ló, e pá nà vígà, be pá bàlà boo ọ́víi. 14 È nyímà kọ beele è aa bá ú bã bá dùm, boo bée kọ è vulè bẹẹ vígà. Nen e bè náa vulè nen gbẹ́á bá ú. 15 Kọ̀láá nen e a ọ́ví a vígà dú nen fẹ̀ nen, vaá ò nyímàì kọ tọ́ọ̀ nen fẹ̀ nen náa íe dùm e bè náa tá e a tõoé m. 16 Ge kọ Kráìst beè tú a dùm peeí boo ní e a kọ́ é nyimá nu e vulà súú dẽe ló kọlà e. À dú lé kọ beele é tuna gé beéle dùm pee boo bẹẹ vígà. 17 Nen e a íe nu vaá à mòn a vígà e bíi dìé ló vaá maaná sĩ́ lọlie ló é téní ãà vaá kọ vulà Bàrì dièé m é? 18 Pá nà nvín e m vulè! Naanii mè née é íe vulà e a é gbẹ́aí boo kpá bẹ́lẹ́ bũunu nè m gã́. Naanii kọ á dú kà kà vulà e a é dọ́ bàlà kẽ m láb dògò. 19 Níí nu e a é náa kọ é nyimá kọ è gé nyoonèè nvée kà kà bel, vaá à náa kọ nyíei á aga boo tṍó e e di kè sĩ́ Bàrì e. 20 Be nyíei bẽ́gèi bel, Bàrì el boo nyíe e a dìí m vaá à nyimá dénè nu. 21 Pá nà lé kóò, be nyíei náa bẽ́gèi bel, nyíei é aga kè sĩ́ Bàrì, 22 vaá kọ̀láá nu e e banié bá, à é náa nèi, boo bée kọ è gé sẹlẹ a lẹ̀ẹ̀là vaá naa nu e a léémáe. 23 A lẹ̀ẹ̀là kọlà kọ é dẹlẹ nyíe boo a Sã́áná, Jíìzọ̀s Kráìst, nè ge kọ é vùlè ene belí bé e a beè lẹ̀ẹ̀là naa. 24 Kọ̀láá nen e a sẹlẹ a lẹ̀ẹ̀là tõo m ẹlẹ vaá ẹlẹ à tõoé m. Tení dú ló Nyómá Káí e a beè nèiá ní e e nyímà kọ à tõoí m é.

1 JỌ́Ọ̀N 3 - Gokana - 1996 Edition - Bible.is - GKNIBS

Annotations