1 KỌ́RÌNT 15 - Gokana - 1996 Edition - Bible.is

1 Kátogóí, e pá nà vígà, m̀ gbĩ́ ge naa kọ ó kẽeai boo Lé Kpẹa e m beè vee nèiá, e o beè zigai ló vaá à dú dò díí kẽ e bọọ zìgà bel tia booá. 2 Be ò biilii bá ló Lé Kpẹa e m beè vee nèiá, à é duulài. Be nóó náanii vó, à náa kọ ò zigai ló boo zọ̀là pọ́ì. 3 Nda beè tú nu e a palà ge bọọ e ba è kọ́ nè ndaá kọ́ nè boolo, kọ mè: Kráìst beè ú boo bẹẹ pọ́lọ́, dì belí bé e ba è émí m Kpá Káí naa, 4 nè ge kọ ba beè lìe, vaá ní e a égè taà dee, à kẽ̀èà aa ke mà ú, dì belí bé e ba è émí m Kpá Káí naa, 5 nè ge kọ Pítà beè mònìè, kọ bé na kà òb nè bàà nen e bà ólò nyoonée nvéeá à kálá mònìè. 6 Gã́ bug nen e a é téní zelí bóó nè vòò tub (500) nen e bà ólò nyoonée nvée beè gboó gbá mònìè t̃ẽ̀ènè tóm. Gbele tõ̀ò ọ̀và di di dùm kátogóí, sõò sìgà ọ̀và a ú. 7 À náá naa vó lọ̀l, Jém̀z à gboó mònìe, kọ bé dénè gbò e Jíìzọ̀s lẹẹlà à kálá mònìe. 8 Dee dee nvée nda beè gboó mònnàe gé--náa kal ló bée kọ nda dì belí nen e a è mèà tṍó e dee gáà egaé ló. 9 Boo bée kọ nda ní e a dú nen e a kil kẽ zẹ̀ẹ̀ dénè gbò e Jíìzọ̀s lẹẹlà e--kà sĩ́ náa bọ́ ló kọ bà á kolí nda nen e Jíìzọ̀s lẹẹlà, boo bée kọ nda beè biigè ló bõ̀òna ló Bàrì. 10 Sõò sàn nyíe Bàrì ní e a túm̄ naamá nen e m dú é, vaá sàn nyíe e Bàrì íém̄ lóá náa pe. Boo bée kọ nda palà ge sí tóm èl dénè na gbò e Jíìzọ̀s lẹẹlàa, náa kal ló bée kọ níì ńda kói nì, sõò sàn nyíe Bàrì e a dìm̄ boo ní e a túm̄ simá é. 11 Vóá à naa, kà bè nda à bè baala ní e a è vee Lé Kpẹaí nèi é, dénè bẹ̀ì veè t̃ẽ̀ènè kà Lé Kpẹa, e a dú ní e boolo zigai lóá. 12 Kátogóí be beele vee kọ Bàrì beè kẽee Kráìst lọl ke mà ú, à tení naà vaá sìgà bọ̀ì ò kọ́i kọ gbò e ba è ù náa é kẽeà aa ke mà ú é? 13 Be gbò e ba è ù náa é kẽ̀èà aa ke mà ú, be vó à náa kọ mè Bàrì náa è kẽee Kráìst lọl ke mà ú. 14 Vaá be Bàrì náa è kẽee Kráìst lọl ke mà ú, be vó à náa kọ mè bẹẹ Lé Kpẹa e e gé vee dú zọ̀là pọ́ì, vaá gbò e bà zigà ló Lé Kpẹaí zigà ló boo zọ̀là pọ́ì. 15 Èlmà tõ̀ò à é dú gè kọ mè beele gé kpọ́ kyáá bel ló Bàrì, boo bée kọ beele élà nen di tõ̀ò kọ Bàrì beè kẽee Kráìst lọl ke mà ú. Sõò be à dú kà kà kọ gbò e ba è ù náa é kẽ̀èà aa ke mà ú, be vó à náa kọ mè Bàrì náa è kẽee Kráìst lọl ke mà ú. 16 Be gbò e ba è ù náa é kẽ̀èà aa ke mà ú, be vó à náa kọ mè Kráìst náa beè kẽ̀èà aa ke mà ú. 17 Vaá be Kráìst náa beè kẽ̀èà aa ke mà ú, be vó à náa kọ mè bọọ gè dẹlẹi nyíe boo Kráìst dú zọ̀là pọ́ì vaá Bàrì gáà ia ló bọọ pọ́lọ́ nèi. 18 Be vó à náana gé kọ mè gbò vígà m Kráìst e ba è ù pe. 19 Be áá nu e e íè m na kà di dùmi ní e a dú nu e e nyoone dẹlẹ nyíe boo Kráìst e, è dú kà gbò ge tó sàn èlmà dénè gbò e bà dì bàlà booí. 20 Sõò kà kà bel e a dì kọlà kọ Kráìst ní túá nen e Bàrì beè zẹ́ẹ́ kẽee lọl ke mà ú é, e a naa zogè kọ mè Bàrì é kẽeena gé gbò e ba è ù lọl ke mà ú. 21 Boo bée kọ, dì belí bé e ú tulà dénè nen tení dú ló pọ́lọ́ e ene nen beè sí naaá, vóá bé e kẽ̀èà aa ke mà ú é tulànà gé dénè nen tení dú ló lé e ene nen náana gé naa é. 22 Dì belí bé e ú tulà dénè nen tení dú ló gè kọ bà aa m mii Ádàma naaá, vóá bé e kẽ̀èà aa ke mà ú é tulànà gé dénè nen tení dú ló gè gbaa ló Kráìst naa é. 23 Sõò ní e a dì íe ńlẹ tṍó e a lelà ló ẹlẹ gè kẽ̀èà. Kráìst ní túá nen e a beè zẹ́ẹ́ kẽ̀èà e. Tṍó e a é dú, gbò e bà dẹlẹe nyíe boo é gboó kẽ̀èà. 24 Tṍóá bàlà boo é gboó íná kùbmà. Kráìst é kyọ sĩ́ dénè gbò nyómá e bà gé tú kpóó nè kói bẹ̀lmài, vaá gboó tú lẹ̀ẹ̀là bel lọa bá nè Bàrì Tẹ̀. 25 Boo bée kọ Kráìst é lẹẹlà bel dọ̀mà tṍó e Bàrì é kyọ sĩ́ dénè gbò ọ́b lọ̀l vaá túva nvèèe kè ká tọ. 26 Dee dee nvée nen ọ́b gè kyọ̀ sĩ́ é dú ú. 27 Boo bée kọ Kpá Káí kọ, “Bàrì tú dénè nu nvèèé kè ká tọ.” À palà ge dọ bàlà kẽ kọ tṍó e a kọ “dénè nuá” mè Bàrì e a é túé dénè nu nvèèé kè ká tọá á gé gã́ bug. 28 Sõò tṍó e dénè nu ni tõo kè kẽ Kráìst, ẹlẹ, Sã́ánáá, é gboó tú ńlẹ ló nvee kè kẽ Bàrì e a è tú dénè nu nvee kè kẽ ẹlẹá. Vaá Bàrì é gboó lẹ̀ẹ̀là bel ló dénè nu gbõome. 29 À íe gbò e bà tú múú logmáva boo bée gbò e ba è ù. Be à dú kà kà kọ gbò e ba è ù náa é kẽ̀èà aa ke mà ú, dì belí bé e sìgà bọ̀ì kọi naaá, à náà vaá bà tú múú logmava boo bée gbò e ba è ù e? Éé ní e bà ẹb dẽe sĩ́ kọ bà é íèè e? 30 Éé ní e a gá è naa kọ beele é zìgà ge tení kè bá nu àà zib bã́ dénè tṍó é? 31 Pá nà vígà, nda ólò tení kè bá ú dénè deeí! Ṍ kààgà e m íè m boolo, nè m bẹẹ dùm e a gbaa ló Kráìst Jíìzọ̀s ní e a náa kọ ḿ kọ́ vó é. 32 Be á dú gè kọ aa m bug togó e nen íé, ní e m beè elá boo vaá bé gbò pọ̀b kà nom kọ̀l gbẹa Ẹ́fẹ̀sọ̀s e, mó kà bélè ní e a gá è dọ̀ nèm̄ é? Sõò be gbò e ba è ù náa é kẽ̀èà aa ke mà ú, be vó, à dì belí bé e mon belá kọ́ naa, kọ: “Naanii mè é dé vaá õ̀, boo bée kọ kóló sṍóe ní e è é ú é.” 33 Tọ́ọ̀ nen á gá kẹlẹ́i. “Pọ́lọ́ kóò e nen zọ gbá tọ ólò kyọ̀e.” 34 Gboó nyieai vaá ó gá kilnai sĩ́ gè sínai pọ́lọ́. M̀ kọ́ m ge siimài kẹ́ẹ, kọ sìgà bọ̀ì nóo nyímàì ló Bàrì. 35 Sìgà nen é bĩ́íná kọ, “Gbò e ba è ù é kẽeà naa é? Mó íb nom kpá ló ní e bà é íé é?” 36 Olo nen ból! Tṍó e o fó nu kunu kẽá, súú té e o beè fòa náa ólò sí mée, e bè à gáà zẹẹ bèm. 37 Vaá níì zivè kà kpá ló íb té e a sí mée aa ló súúá ní e olo beè fò e nì, sõò kóló súú ní e olo beè fò e, be à sẹlẹ súú kpá kyàlà à bè dõòna íb súú té. 38 Bàrì tú íb kpá ló e a léémá ẹlẹ nvee ló té e a sí aa ló súúá. Bu íb súú té ié íb kpá ló té e a ólò sí aa ló ẹlẹ. 39 Vaá zọ́ọ́ dénè íb nu e a di dùm níì t̃ẽ̀ènè íb nì. Nen íe kele íb zọ́ọ́, nom à ié dõòna íb, ńnóm à ié dõòna íb, vaá gyã́à à iena gé dõòna íb. 40 Vaá à íe gbò nu e a di sĩ́ káála nè gbò nu e a di boo kunu kẽí. Bé e gbò nu e a di sĩ́ káála mo naa dú kele ló bé e gbò nu e a di boo kunu kẽí mo naa. 41 Nàànì íe bé e ẹlẹ mo naa, ẽ́ à ié bé e ẹlẹ mo naa, vaá gbò gyã́à káála à ié bé e baala mo naa. Vaá bé e gbò gyã́à káála mo naa dú kele ló ene. 42 Vóá bé e a é dìnà gé naa ló gbò e ba è ù tṍó e bà é kẽ̀èà aa ke mà ú é. Nom kpá ló e bà liá ólò ú bèm. Sõò tṍó e a é kẽeà, náa é ú bèm. 43 Nom kpá ló e bà liá náa ólò ié ka. Sõò tṍó e a é kẽeà, à é íe ka. Ní e bà liá ólò dú ọ́ọ́ ọọ̀. Sõò tṍó e a é kẽeà, à é dú agẹ ló. 44 Nom kpá ló e bà liá ólò dú nom kpá ló nen e a di bàlà kẽ. Sõò tṍó e a é kẽeà à é dú nom kpá ló nyómá. Nom kpá ló nen e a di bàlà kẽ dì e a náa dẽe kọ nom kpá ló nyómá é dinà ge. 45 Boo bée kọ Kpá Káí kọ, “Bàrì beè dèm túá nená, Ádàm, naamá nen e a di dùm.” Sõò kpẹ̀ nvée Ádàmi à dú nyómá e a nè di dùm nen. 46 Níì nen e a dú nyómáá ní e a beè zẹ́ẹ́ dù e nì, sõò nen e a di bàlà kẽá ní e a beè zẹ́ẹ́ dùe, kọ bé nen e a dú nyómáá à kálá dù. 47 Túá kà Ádàm e ba è tú sãa dèmmàeá aa boo sãa bàlà boo dù. Ní e a égè bàà kà Ádàma à aa boo sãa káála dù. 48 Gbò e bà kuu bàlà booí dìgà belí nen e ba è tú sãa dèmmàeá. Gbò e bà kuu káála à dìgà belí nen e a aa boo sãa káála dùa. 49 Dì belí bé e e tú mèà nen e ba è tú sãa dèmmàeá, vóá bé e e é túná gé mèà nen e a aa boo sãa káála dùa naa é. 50 Nu e m gé kọ́, e pá vígà, kọlà kọ mè nen e a di m nom kpá ló nè mii náa é láá bã kẽ lẹ̀ẹ̀là bel Bàrì, vaá nu e a ólò ú bèm náa é bã kĩ e nu e bè náa ólò ú bèm ólò tõo. 51 Gbanii tṍ, mè m̀ é tú nu ke gù̃a tẹlẹ bàlà kẽ nèi. Dénè bẹ̀ì née gé ú, sõò dénè bẹ̀ì é gbalẹ̀ boo nyaaá, 52 m ńkáb dẽe tṍó, e a é belí bé e nen náa dẽe naa káláb, tṍó e bà é uuli kùbmà nvée koò. Boo bée kọ tṍó e bà é uuli koòa, gbò e ba è ù é kẽ̀èà aa ke mà ú, naa ní e bà náa é úná, vaá beele é gboó nyaaá. 53 Boo bée kọ nu e a ólò láá bèm é íè ge nyaaá dú nu e bè náa é bèm. Nu e a ólò láá ù é íè ge nyaaá dú nu e bè náa é ù. 54 Vóá à naa, tṍó e nu e a ólò láá bèm ni nyaaá dú nu e bè náa é bèm, vaá nu e a ólò láá ù ni nyaaá dú nu e bè náa é ù, nu e ba è emí m Kpá Káíá é gboó mmá, e a kọ́: “Bà a kyọ sĩ́ ú, vaá bé fẹ̀ a di! 55 Ú, ãà ní e o bé fẹ̀ dì e? Ú, ãà ní e o kpóó e o ólò ĩimá nená dì e?” 56 Pọ́lọ́ lab dògò ní e a dú kpóó e ú ólò ĩimá nená é, Log ní e a nvèè kpóó ló pọ́lọ́ lab dògò e. 57 Sõò è ṍà Bàrì zaa kọ à nei bé fẹ̀ tení dú ló bẹẹ Dõò Jíìzọ̀s Kráìst! 58 Vóá à naa, e pá nà vígà e m vulè, kilii sĩ́ gè elai agalai. Tã́gíní bé e o nyímàì kọ tọ́ọ̀ kà tóm e o síi nèi Dõò náa peá, kilii sĩ́ gè sii tóm neíe.

1 KỌ́RÌNT 15 - Gokana - 1996 Edition - Bible.is - GKNIBS

Annotations