Wlɛ̀velesɔ̌n 5

1È Ě jěa chněedɛ̌à u plǎlaa nɛ̀ neaě Nyuǒ neaǒo klɔ̀ba gbèsɛɛǒ kɛn bo Ɔɔ dilǎ son mǒ ɛ̈ kɔn wakěe sɔ̌n wùɛ u chlěaa kɛn le plě ü poaa sluu kpɛɛ nyiɛta je. 2Plě Ě jěa kpě kɛne najiǒpòi ɔ̌ pea sàe ɔ je, “Mɔ blɛɛ leě kɛ je keǒ bò sàǎ chněedɛ̌à sluuà jele?” 3Kɛɛ ɛ sea nyu kɔn klě jɔkɛn klee kělɔ kmɔ̌ mɔ̀ klee kělɔ blǒ bobo ɔ̈ wɔ̀laa je bɔ̈ knanaa plaplǎ chněedɛ̌ǒ je ɔ̈ mǐa ɛɛ slè. 4Tà ɛ tùu nyu wùɛ sea tà ne ɔ̈ blɛɛa lɛɛ je keǒ bɔ̈ knanaa chněedɛ̌ǒ je ɔ̈ mǐa lɛɛ slè, è mǒǒ fìn'a wɔle fìɛn chɔɔ. 5È kě kunkunyɔɔ do tɔ̀ɔ dǎlaǎ je ɔ je, “Ma wien, bɔ̌ fìnfiɛn, tanà le, ɛ kɔn Sà Fòɛ Ɔ̈ sɔn lěe dakɔ̌ǒ moo Jùdǎ slè mǒ, Ɔ sɔn'ě klɔ̀ba Dèběsee jlǔ slè mǒ, Nɔ̀ du ɛmo toǒ Ɔ̈ wɔ̀le je Bɔ̈ sàǒ sluu kpɛɛ nyiɛtaǒ chněedɛ̌ǒ je Bɔ̈ kna ɛ je.” 6È Ě jěa Blajǔ Ɔ̈ wǒ dɛ u dbǎlaa, Nɔ̀ nynanaǒ klɔ̀ba gbèsɛɛǒ ɛɛ slè bo ɛ̈ kmɔ̌ ne soaa hɛ̀n klee kunkunyoǒ u tbɛɛa dǐ. Ngmèe nyiɛta nì neaǒ Ɛ dlǒ klee jǐi nyiɛta ï nynanaǒo Nyesoaa Sìsii nyiɛta pènmo bo ï Ɔ dboo kělɔ kmɔ̌ wùɛɔ mɔ̀, 7Nɛ̀ mua Ɛ̈ dǔa plaplǎ chněedɛ̌ǒ mǒ Ɛ̈ sàlaě ɛ Nyuǒ neaǒo klɔ̀ba gbèsɛɛǒ kɛn bo Ɔɔ dilǎ son mǒ. 8Tà Ɔ dǔa ɛ mǒo, è kmɔ̌ ne soaa hɛ̀n klee kunkunyoo wlò tùo hɛ̀n'ǒ è nìǒ kɔ kwne bo keǒ Blajǔǒ jemǒ. Uu wùɛ u blěa kwa le kanǐkàe plě klò fui neaě u kwete mǒ ï sonsnǒ noǎa jǐaa je ï nynaǒo pènmo bo Nyesoa nyoo bàtea keǒ Nyesoa mɔ̀. 9U blea wlɛ̌ jajlo, è kě uu wlɛ̌ win dɛ̌a ɛ̈ moo, “Mò ɛ blɛɛ je Bɔ̈ dǔ ɛmo plaplǎ chněedɛ̌à mǒ Bɔ̈ sà ɛ sluu wùɛǒ jele. Mɛ kɔɔ̌n tèǒ joo nɛ̀ moo u dbǎlaà le, è Nè nymɔǒ nɛ̀ nù È tɔ̀n nyopò keǒ Nyesoa mɔ̀ ü sɔn'ɔ blǒ wùɛ kɛn mǒ plě ü pee win'i doědoe plě ü sɔn'ɔ dakwɛ̌ wùɛ mɔ̀ měne klee tùonyopoo doědoe wùɛ. 10Plě È nu u klɔ̀bapoo mǒ klee bodiɔpò keǒ bu nu äa Nyesoaa konkwa bu kɔn kmɔ̌à win kwa.” 11Tà Ě keaǒo le tɛn, Ě wɔ̌na najiǒpò fòfoaa win ü tbɛɛaa klɔ̀ba gbèsɛɛǒ dǐ klee soaǒ plě klee kunkunyoǒ, uu wùɛ u nua taslěwɛ klee mǐniɔwɛ 12ǔ jɛɛ̌aě win ǔ blea, kě uu bleble win dɛ̌a ɛ̈ moo, “Blajǔà u dbǎlaa Nɔ̀ blɛɛ ɛ je bu nye kpěǒ klee pònpan'a doědoe, tɔ̀n plě kpě klee tùtuɛ klee tè jǐ boaboǎ plě de bìsea!” 13Ě wɔ̌na noǎ wùɛ ï neaa kmɔ̌ ii win klě jɔkɛn klee kělɔ blǒ mɔ̀ klee klě blǒ bobo plě noǎǒ neěe jbǒ mɔ̀ ǐ blea, kě i dɛ̌ i je, “Keǒ Nyuǒ neǒo klɔ̀baa gbèsɛɛǒ kɛn bo mɔ̀ plě keǒ Blajǔǒ mɔ̀, nɛ bo de bìsea klee bo tùtuɛ klee tè jǐ boaboǎ plě klee kpě bi kɔn'ǒ Ɔ mɔ̀ ke ɛ mii jleě mǒ bo tonma!” 14È soaa hɛ̀n'ǒ kě i dǎla i je, “Kě bɛ ne!” È kunkunyoo wlò tùo hɛ̀n'ǒ u kɔla kwne bo ǔ sàla Blajǔu wɛ̀ klee Nyuǒ neaǒo gbèsɛɛǒ kɛn bo.

will be added

X\