Wlɛ̀velesɔ̌n 10

1È Ě jěa kpě kɛne najiǒpòi tɔ̀ɔ ɔ̈ sonwɛa lěe jɔkɛn mǒ ɔ̈ dia lɔɔ wɔ̀ɔn, nukpǎ nɛ̀ mooa ɔɔ wlawlǒ ɔ pea mǒ plě pànjbo tbɛɛa ɔɔ dlǒ dǐ. Ɔɔ jigbà wnea wòje wɛn, ɔɔ be wǒa napèpɛloo tiblǐ fòe. 2Ɔ blěa plaplǎ chněedɛ̌ chěnchaě kwa ɛ̈ jlèeaa mǒ. Ɔɔ dilǎ bo nɛ̀ ɔ tbalaě jbǒ kɛn bo, è ɔɔ gbàpe bo nɛ̀ neaɔ blǒ kɛn. 3È ɔ pnǎna dɛ jleě, ɔ wǒa win mǒ keà sà kwlii. Tà ɔ pnǎnaa dɛ jleě, è tɛ̀n'ɛ pnapnǎ kplěe nyiɛta nì bea bo. 4Tà tɛ̀n'ɛ pnapnǎ kplěe nyiɛtaǒ i sìn'aa, è Ě wɛ̀a mɔ̀ keǒ bo chlěa, kɛɛ Ě wɔ̌na win ï sɔnaěe jɔkɛn mǒ, kě i dɛ̌a i je, “Tɛ̀n'ɛ pnapnǎ kplěe nyiɛtaǒ dɛǒ i boɔɔ wɛ̌ ɛ je, nè chlě ɛ.” 5È najiǒpòiǒ Ě jěaa ɔ̈ kɔlaěe bo jbǒ kɛn bo klee kělɔ blǒ kɛn, ɔ dǔa ɔɔ dilǎ son jemǒ klě jɔkɛn. 6È ɔ poa ɔɔ chɛ̀ win kɛn le keǒ Nyesoa mɔ̀ Ɔ̈ nee kmɔ̌ ke ɛ mii jleě mǒ bo tonma, Ɔ̈ nuu jɔ klee noǎ wùɛ neě ɛɛ wlòmo plě Ɔ̈ nuu blǒ klee noǎ wùɛ ï neɔɔ ɛɛ mɔ̀ plě Ɔ̈ nuu jbǒ klee noǎ wùɛ neě ɛɛ mɔ̀, kě ɔ dǎla ɔ je, “Tǐi de le kpokpa tɛ̀ɛ see kɛ̀ǒ nema mu! 7Bɛ̌ nu najiǒpòo nyiɛta nonɔ bɔ̌ be ɔɔ nokpa, è Nyesoaa ble po dɛà wɛ̌ pnɔɔ je ɛ miǒ jaěba wòje ke Ɔ nua Ɔɔ na wien po nyebajle klee nynejlu klee wnɔsàɔpo tmɔɔ̌a.” 8È win'à Ě wɔ̌naa ï sɔna lěe jɔkɛn mǒ, kě i dɛ̌aǎ je de i je, “Mu, dǔ chněedɛ̌ǒ mǒ ɛ̈ knaa je ɛ̈ neěe najiǒpòiǒ kwete mǒ ɔ̈ nynaǒo blǒ klee jbǒ kɛn bo.” 9Ii tè Ě muaě najiǒpòiǒ mɔ̀ Ě tmɔɔ̌a nɔ bɔ nyeaǎ chněedɛ̌ chěnchaěǒ. Ɔ tmɔɔ̌a mǒ ɔ je, “Dǔ ɛ mǒ mì ɛ di, bò di ɛ, ɛ mi wan nmɔma wòje dochnɔ klěè wan, kɛɛ ɛ mi pɔnma klěè wlòmo.” 10Ě dǔa chněedɛ̌ǒ mǒ Ě sàla ɛ najiǒpòiǒ kwa Ě dia lɛ. Ɛ nmɔa wan wòje dochnɔ klěě wan, kɛɛ tà Ě ngmnana nɛɛ, ɛ̀ pɔn'a ne klěě wlòmo. 11È u tmɔɔ̌aǎ ne, kě u dɛ̌a u je, “Kɔ̀n bò sà Nyesoaa win wan de klě nyopò fòfoa jleě mǒ klee dakwɛ̌ klee nyopòà pee dɔ̌ɔdɔ̌ win plě klě klɔ̀bapoo mɔ̀.”

will be added

X\