1 Chnɛ̀ jlǒ wěe sɔ̌n nì siaǒ Dlǒ Mǒ Sìin Didi Dɛ klee Ně Jǎ Flɔ̌ɔ Didiɛɛ de ngmně tǐ mǐaǒ nyni, è Nyesoaa kpatòapoo fòe klee teteǎ tee nyo pɛ̀na le fɔ̌ u mǐa Jùsu kme klě je wɛ̌ tǔn wlòmo u mǐa Ɔ dbǎ. 2 Kɛɛ kě u dɛ̌a u je, “Äǎ ni ɛ keǒ wlèwle digbaǐi tǐ wlòmo. Bä nu ɛ, tǐ tìi tà jale jejǎea fòɛ kɔn bɛ be blǒ mǒ.” 3 Tǐǒ jleě Jùsu neaě diěǒ moo Bɛtnè kɛn klě Saemɔ̌ɔ koǔ bo ɔ̈ bale kwɛ̌ tɛaa bo. È Ɔ kea dɛ di, nynɔ tɔ̀ɔ jalaě seɔ̌ sòtae ɛ̈ jǐaa sonsnǒ chnɔ̌ je ɛ̈ peaa wlě fòfoa. Nɛ̀ ɔ knana je ɔ̈ chniǐaǒ Jùsu dlǒ. 4 È nyopòo tìeǒ jěaa dɛǒ ù pea jlo, kě u dɛ̌a klě uu chɛ̀ slè u je, “Mɛ kɔɔ̌n tè ɔ nymii niǐ kɛ chnɔ̌ǒ jǐ le? 5 Chnɔ̌ǒ ɛ blɛɛ je nyopò bu plo ɛ bɛ jě jlǒ gblèe snǒ sàe wlě u mǐ ɛ sònwɛ nyo měne sɛ̀ɛ le!” Ii tè ǔ boɛa nynɔǒ win fǒ měne chɔɔ. 6 Kɛɛ kě Jùsu dɛ̌a u je Ɔ je, “A sàǒ ɔ wun mɔ̀. Mɛ kɔɔ̌n tè a nii niǐ kɛ nynɔà feanfeǒ? Ɔ nu kàan dɛ keǒǒ mɔ̀. 7 Tǐi pɛpɛ mɔ̀ a klee sònwɛ nyo a miɔ kmɔ̌ɔ mɔ̀ nema, è aa nyu bɔ̌ jlɛ̌ uu nyu mǒ sɛ̀ɛa ɔ mi ɔ mǒ sɛ̀ɛba. Kɛɛ Mǒà Ě seɔ a slè nema mu tǐ wùɛ mɔ̀. 8 È dɛ ɔ wɔ̀lee nunuɛ nɛ̀ǒ ɔ ni ɔ̌ chniǐǒǒ chnɔ̌ dlǒ. Ně fǒà nɛ̀ ɔ wɛ̀ mɔ̀le keǒ bo tùtuɛ mɔ̀ ɛ̈ neěe nya. 9 Tèǒ nì kɔn tè Ě tmɛɛ̌ amo, tà wùɛ u miǒ Nyesoaa kàan tuposàà pooba kělɔ kmɔ̌ɔ mɔ̀, dɛà nynɔà ɔ nuu u mi ɛɛ tè boɔba ke, dɛǒ nɛ̀ moo ɔɔ wlò mɔ̀le popoɛ.” 10 È Jùdǎse Esekalìa ɔ̈ mooa tàii pù tùo sɔ̌n'ǒ u nyuu do nɔ̀ muaě Nyesoaa kpatòapoo fòe mɔ̀ ɛ̈ di ɛɛ numa ɔ mǐaě Jùsu bo demǒ sà keǒ u jemǒ. 11 Tà u wɔ̌naa dɛ Jùdǎse boɔla uu je, è uu plɔ blooa ɛ kɛn chɔɔ ǔ pooaě ɔ wlě. Ii tè sɔɔn'a kɛ̀ǒ tǐǒ jleě mǒ Jùdǎse pɛ̀na kàan fɔ̌ le ke ɔ mǐa lěe Jùsu bo demǒ sèsa nu. 12 È nyane chnɛ̀ jlǒ waěǒ kɔn mǒ u tùi Ně Jǎ Flɔ̌ɔ didiɛ wlò u dbɛ̌ɛ lěe blajlǔ mǒ keǒ Dlǒ Mǒ Sìin Didi Dɛɛ de ngmnengmnɛ̌ mɔ̀, Jùsuu mɔ̀ cheěn nyo gbàla Ɔ wan u je, “È tà jlɛ̀ bä wɔ̀ɔ loǒ kɛ Dlǒ Mǒ Sìin Didi Dɛà mɔ̀le keǒò mɔ̀?” 13 È Ɔ dboa Ɔɔ mɔ̀ cheěn nyoo sɔ̌n Ɔ̌ tmɔɔ̌a nu Ɔ je, “A muě Jlǔsnɛ dǐa, jbɛju tɔ̀ɔ mi a kɛn jɛɛba ɔ̈ blěe ně jagbee, a na ɔ de 14 koǔǒ kɔn bo ɔ miěe paba, a tmɔɔ̌ jbɛjuǒ kɔn'ɔ koǔǒ u je, ‘Äa Tee Nyu je tà nè dakpě blò neě kɛ, tà Ɔ klee Ɔɔ mɔ̀ cheěn nyo miěe Dlǒ Mǒ Sìin Didi Dɛ diiba?’ 15 Ɔ mi a blò fòɛ teeba ɛ̈ neěe koǔ ja ɛ̈ u snǎ lěe bo ble le noǎ wùɛ wɛ̀ɛ mɔ̀le ï neěe. Klě ba wɔ̀ɔě didi dɛǒ mɔ̀le keǒ ä mɔ̀.” 16 Ii tè Ɔɔ mɔ̀ cheěn nyoo sɔ̌n'ǒ ǔ muaě diěǒ wlòmo, ke Ɔ nua nɛ ùu tmɔɔ̌a teěn kě dɛ wùɛ u jěaa ɛ nua tùɔn kpokpa. È Dlǒ Mǒ Sìin Didi Dɛ nɛ̀ǒ u wɔ̀a mɔ̀le. 17 È klě wìtika wlòmo Jùsu klee Ɔɔ mɔ̀ cheěn nyoo pù tùo sɔ̌n'ǒ ù pala dǐa. 18 È tà u keaa dɛ di u tbɛɛaa ngmà fuoǒ dǐ, è kě Jùsu dɛ̌a u je Ɔ je, “Tèe jleě nìà Ě tmɛɛ̌ amo, aa nyuu do ɔ̈ klee Mǒo sɔ̌n diiǒo tàa do dɛ nɔ̀ miěě bo demǒ sàba.” 19 Ùu wùɛǒ ù bea měne wɔle ǔ pea ɛ do do ǔ gbɛ̀a Ɔ wan le, “Deě mǒà mǒ ɛ tù kɛ le? Mǒà mǒ ɛ tù kɛ le?” 20 Ɔ tùa u kɛ̀ɛn Ɔ je, “Amo tàii pù tùo sɔ̌n'à amo kɔn nyuu do ɛ tù. Nyuǒ ɔ̈ klee Mǒo sɔ̌n ä pɛɛn'ěe son fuo wan nɔ̀ ɛ tù. 21 Jbɛjuu Jǔà Ɔ mi kǒba ke Nyesoaa win dǎa, kɛɛ chlǒ keǒ nyuà mɔ̀ ɔ̈ miě Ɔɔ bo demǒ sàba. Ɛ mii tɛɛ numa ɔmo nyuǒ bɔ̌ seea kɔɔn no kělɔ kmɔ̌ɔ mɔ̀.” 22 È tà u keaa dɛ di, Jùsu dǔa flɔ̌ɔ tìe mǒ Ɔ̌ pea Nyesoa tàto Ɔ̌ klǎla ɛ wan le Ɔ̌ nyea nɛ Ɔ̀ɔ mɔ̀ cheěn nyo Ɔ je, “A dǔ ɛ mǒ a di ɛ, dɛà nɛ̀ moo Ně fǒ.” 23 È Ɔ dǔa mǒ naě kàe mǒ ɛ̈ jǐa lěe Ɔ̌ pea Ɔɔ Gbeǐ tàto keǒ ɛ mɔ̀ Ɔ̌ nyea nɛ uu wùɛ ǔ naěa ɛ mǒ. 24 È kě Ɔ dɛ̌a u je Ɔ je, “Dɛà nɛ̀ moo Ně nymɔ ɛ̈ gblɛ̀ le keǒ nyopò fòfoa mɔ̀ plě nɛ̀ po kuo win jajleǒ neǒo tùonyopo klee Nyesoa pǎnpe kòo kɛn. 25 È kàan tè nìà Ě tmɛɛ̌ amo, Ě seǎa kɛ̀ kwlepò dbǔu buoo nmɔ nǎ de ɛ mǐ ɛ kpa kpa ɛ miǎ chnɛ̀ jlǒ waěǒ Ě miǎ ɛɛ jajlo nǎma kɛn jɛɛ le klě Nyesoaa deplě slè.” 26 È nùǒ blea Nyesoa wlɛ̌ ü pěaǒ plomǒ ü muaě togbeeǒ moo Ɔlè dlǒ. 27 È Jùsu tmɔɔ̌a nu Ɔ je, “Aa wùɛà a miǒǒ bo siba. Mɛ̌oǒ joo nɛ̀ moo Nyesoaa win nì boɔ li i je, ‘Ě mi blableǎ Jǐ Mɔ̀ Tù Nyu dbǎba, Ɔɔ blǎgbò mi le gbɛ̀tɛɛ le.’ ” 28 È Jùsu kpɛɛa Ɔɔ win nya Ɔ je, “Kɛɛ bo Nyesoa Bɔ̌ sàlǎ lěě kǒla mǒ, Ě miǎě a nya muma klě Jàlalǐi wakǎ kɛn klě a klee Mǒ ä miaě mɔɔma.” 29 È kě Pitɛ̌ dɛ̌a Ɔ je ɔ je, “Baǎje nyopò wùɛ bǔ siǒò bo, kɛɛ mǒà Ě seǒò bo siba mu!” 30 È kě Jùsu dɛ̌a ɔ je Ɔ je, “Kàan tèà Ě sèsɛ leè wlòmo, klě tǒn jlǒ waěà wlòmo plě seaka kokɔ̌ mǐma slò, mìǐ mɔ̀ chnɛ̀ma ɛ̈ moo sèě ji klě wěe tan wlòmo.” 31 Kɛɛ kě Pitɛ̌ dɛ̌a kaǒ ɔ neaǒ ɛ kɛn ɔ je, “Baǎje bǔ momǎe mǒ klee Mòo sɔ̌n kɛn bo bǔ ke ä dbɛ̌ba mii chɛ̀, Ě seǎà mɔ̀ chnɛ̀ kpe ɛ̈ moo Ě seè ji!” È ɔɔ bǐì mɔ̀ cheěn nyo tùuǒ dɛɛ doǒ nɛ̀ u boɔla ke. 32 È Jùsu klee Ɔɔ mɔ̀ cheěn nyo nyniaě bòǒ u dɛɛ Jɛ̀semne wlòmo, kě Ɔ dɛ̌a u je Ɔ je, “A neà tàa bo Boǒ kèklaeǒ nya Ě miě Ně Gbeǐ mɔ̀ boɔ.” 33 È Ɔ dǔa Pitɛ̌ klee Jìmǐse klee Jɔ̀ɔ̌n mǒ nù Ɔ kpala, feanfeǒ klee tǐ jakě fòe nì jǐa Lɔ je. 34 È kě Ɔ dɛ̌a u je Ɔ je, “Ně wlòà ɛ jǐ je le wɔle chɔɔ, ɛ jlɛ̌ bɛ dbǎ Mǒ, nɛ̀ kɔn tè a neàǎ gbàa bo a tù jǐ mɔ̀.” 35 È Nɔ̀ǒ jejǎeaǒ nya bo Ɔ̌ chlìaǒ blǒ mɔ̀ bo Ɔ̌ bɛ̀tea Nyesoa Ɔ je, “Bɛ̌ nu bɛ̌ wɔ̀le ɛ, è Nè sonwɛǒǒ mɔ̀ mǒ Ně beě tǐ jakěà slè. 36 Ně Gbeǐ, noǎ wùɛ wɔ̀le ɛ le keǒò mɔ̀, ii tè sàǒ sònwɛ jejeɛ̌ɛ kàeà kěàǎ jleě mǒ, kɛɛ bɛ̌ nu Bò se ɛ jlǎ, è dɛǒ jlɛ̀ɛ nɛ̀ Bò nu ɛ̈ se Něe chɛ̀ɛ kɛn wɔɔn dɛ.” 37 È tà Ɔ tbaeaa je kělɔ Ɔɔ mɔ̀ cheěn nyoǒ mɔ̀, Ɔ̀ jɛɛa u mǒ momnɔ, è kě Ɔ dɛ̌a Pitɛ̌ je Ɔ je, “Saemɔ̌, mɛ̀ kɛ lee? A slě wɔ̀ ba mǎ kɛɛ̌ le bä tù jǐ mɔ̀ klě àwɔɔ do wlòmo le? 38 A gbɛ̀ɛ le a mǐ Nyesoa bàte aǎ diě měne tèntɛn slè be. Tùonyuu wlò wɔɔn ɛ kɛn keǒ bɛ nu Nyesoaa kɛn wɔɔn dɛ, kɛɛ tùonyugbee kpni kukwǐ kmɔ̌ǒ neě ɔɔ mǒ nɛ̀ ɛɛ̌ wɔɔn ɛ kɛn.” 39 È Nɔ̀ǒ tbaea je de Ɔ̌ mua Ɔ̌ nia win'i doǒ Ɔ̌ bɛ̀tea Ɔɔ Gbeǐ Nyesoa. 40 È tà Ɔ tbaeaa je, Ɔ̀ jɛɛa u mǒ momnɔ de. Mɛ̌oǒ joo nɛ̀ moo uu kbě wɛ̀aě le chɔɔ. È tà Ɔ sàla uu momnɔ mǒ, u sea dɛ ji bu boɔla Ɔɔ je. 41 È wěe tan nenɛ mɔ̀ tà Ɔ tbaeaa je, è kě Ɔ dɛ̌a u je Ɔ je, “A mɛɛ̌ jè kɛ le kaǒ ǎ sɛ̀ lě kɛn jɔ mǒ le? Momnɔǒ ɛ wɛ̀ mɔ̀ no, tǐ nyniǒ noò. A tanàle, Jbɛjuu Jǔà Ɔ miě bo demǒ sàeba klě kpni kukwǐ nyo kwete mǒ! 42 A dǔ jemǒ, a nɛ bä mu! A tanàle, nyuà ɔ̈ sàě Mǒo bo demǒ nɔ̀ǒ diěò!” 43 È tà win kɛ̀naě Jùsu wan bo, è Jùdǎse ɔ̈ mooa tàii pù tùo sɔ̌n'ǒ u nyuu do, è nɔ̀ǒ nyniaǒ, ɔ jalaě diblɛ̌ ü sɔna lěe Nyesoaa kpatòapoo fòe klee teteǎ tee nyo klee Jùwɛ nyoo bòlibo mɔ̀ mǒ. U blěa kwa le pen klee kpangbia. 44 È Jùdǎse nyea diblɛ̌ǒ jboo dɛ ɔ je, “Bä nyniǒ, Nyuǒ a jlɛ̌ɛ Nɔ̀ kɔn wun Ě mi nyǒma, è ba kme Ɔ. A tbɛɛ Ɔ dǐ, aǎ tɛ Ɔ bo a mǐ Ɔ kpa.” 45 Tǐi doo tǐ jleě tà Jùdǎse nyniaǒo, ɔ kèklaeaǒ Jùsu gbàa ɔ je, “Chì Kpa Ämoo,” ɔ̌ nyǒa Jùsuu wun. 46 È Nɔ̀ǒ u jǎla mǒ u kmea. 47 Kɛɛ nyuu do nynanaǒ tàǒ bo nɔ̀ sloaě ɔɔ pan bɔ mǒ ɔ̈ sàla Nyesoaa bodiɔɔ nyebajloo do nɔkǔ dlǒ. 48 È Jùsu gbàla u wan Ɔ je, “Mɛ kɔɔ̌n tè a keě kɛɔ Mǒ mɔ̀ di a jɛ leě pen klee kpangbia wòje keà nyu mii jliɔ̌ le pɔ̀nma? 49 Klě Ě ne pnɔě a mɔ̀ Nyesoaa kǎ fòɛ bo tǐ wùɛ mɔ̀ Ě boɛ a Nyesoaa tè je klě a slěě kmee ne. Ɛmo dɛǒ ɛ kpa tùɔn ɛ̈ di ɛɛ numa Nyesoaa win'à i miǒ jaě le.” 50 È Ɔɔ mɔ̀ cheěn nyo wùɛ nùǒ plùa ü siaǒ Ɔ bo. 51 È nyemò tɔ̀ɔ ɔ̈ nɛaa Jùsu mɔ̀ ɔ̈ pea ɔɔ kɛn po dalo kɛn le, tà u jlɛ̌ bu kmea nɔɔ ke, 52 ɔ sia u daloǒ kwete mǒ ɔ̌ poa gblàgblo ɔ̌ plùa. 53 È u dǔa Jùsu mǒ ǔ kpalaě Ɔ klě Nyesoaa bodiɔɔ tà, è Nyesoaa kpatòapoo fòe klee Jùwɛ nyoo bòlibo klee teteǎ tee nyo uu wùɛ nùǒ bòa le klě koǔǒ bo. 54 Pitɛ̌ nɛa Jùsu de, kɛɛ ɔ poa Ɔ kpa mɔ̀ bo ɔ̌ muaě klě bodiɔɔ blilǐ tù koǔǒ ɛɛ pànto mǒ ɔ̌ beaě tabɔ̀ǒ tùiaa jǐ mɔ̀ slè ɔ̌ wɛ̌n'a na. 55 È Nyesoaa kpatòapoo fòe klee Jùwɛ nyoo tè tù nyo wùɛ pɛ̀na le sàsepo ü mǐaa Jùsu tè kmee ne u miǎ Ɔɔ dbǎ, kɛɛ uǔ jěa kenkan dɛ u miǎ Ɔɔ kmee ne. 56 Nyopò fòfoa pea Ɔ sen kɛne, kɛɛ uu boɔboɔ win ně beaǒ tàa do. 57 È klě demǒ bɔɔ̌ tǐ wlòmo sen le tmɔ̌ nyo tùu nùǒ nynana bo u je, 58 “Dɛà nɛ̀ Ɔ boɛa le ä wɛ̌n'a, Nyesoaa kǎ fòɛà äa nyopò poo Ɔ je Ɔ mi ɛ wlǎba plě Ɔ mǐ ɛ bě tɛ̀ɛ po klě chnɛ̀ jlǒ wěe tan wlòmo ɛ̈à tùonyuu son seǒ jleě mǒ mu.” 59 Kɛɛ win wùɛ u boɛaa le iǐ beaǒ tàa doo chɛ̀. 60 Ii tè Nyesoaa bodiɔ nynana bo keǒ nyopòǒ jemǒ ɔ̌ gbɛ̀a Jùsu wan ɔ je, “Tè wùɛà nyopòà u boɛ kɛɛ keǒò jleě mǒ, kɔ̀n dɛ mìi boɔ keǒ i jleě mǒ le?” 61 Kɛɛ Ɔ nua kpee Ɔɔ̌ jlǎ Bɔ boɔla wien. È Nyesoaa bodiɔ gbàla Ɔ wan de ɔ je, “Deě Mò moo kɛ Nyesoaa Tentǎn Jǔ Ɔ̈ moo Nyesoaà ä bìsee le Ɔɔ Jǔ?” 62 È Jùsu tùa ɔ kɛ̀ɛn Ɔ je, “Mǒà Mǒ ɛ tù. Aa wùɛ a miǎ Jbɛjuu Jǔà jěba Ɔ miǎ lě kpě kɛne Nyesoaa dilǎ son mɔ̀ bo nene, klě Ɔ miǎě mǒ sɔɔnma Ɔ miǎě di klě nukpě kɛn wòje ke Nyesoaa win dɛ̌ɛ.” 63 È Nyesoaa bodiɔǒ ɔ keklǎea ɔɔ chɛ̀ɛ wlawlǒ wan le keǒ jlo sosǒ mɔ̀, è kě ɔ dɛ̌a ɔ je, “Ɔ po Nyesoa kɛn pà! Mɛ kɔɔ̌n tè ä pɛ̀ɛ̌n jè kɛ sàsepo tùu le? 64 Aa chɛ̀ a po bo nɔkǔ ǎ wɛ̌n'ě Ɔ wan le Ɔ̌ po Nyesoa pà kɛn! Mɛ a jlɛ̌ bä nuǔ kɛ Ɔ mǒ?” Uu wùɛǒ u poaǒ win tàa do u je, “Ɔ blɛɛ je Bɔ kǒ!” 65 È uu tìeǒ neaǒo ù tùngmaea Ɔ tontmɔ wnawna. U pìin'a Ɔ dalo jǐ mǒ, uu nyu bɔ̌ tba Ɔ kpunɔ ɔ̀ gbà Ɔ wan ɔ̀ je, “Sàě nyuǒ tba Mòo dɛ ɔɔ nynɛ̌!” È tabɔ̀ dǔa Ɔ mǒ ǔ kpala Ɔ plě ǔ bea Lɔ. 66 È tǐǒ jleě Pitɛ̌ nea lěe pànto mǒ, Nyesoaa bodiɔɔ na wien po nyneju tɔ̀ɔ nɔ̀ dia lě. 67 Tà ɔ jěaa Pitɛ̌ ɔ keaa na wɛ̌n, ɔ tanaǒ ɔ mɔ̀le, kě ɔ dɛ̌a ɔ je ɔ je, “Mòà moo nyopòà u nyuu do üà klee Jùsu Ɔ̈ kɔn lěe Nǎsòwɛ̌ u nɛaa.” 68 Kɛɛ Pitɛ̌ chnɛ̀a ne, kě ɔ dɛ̌a ɔ je, “Tèǒ bòɛɛ Ě se i ji plě ně wɔ̌n i měnee chɛ̀!” È nɔ̀ǒ muaě ngmì gbàa. 69 Tà na wien po nynejuǒ ɔ jěa lɔɔ de, è kě ɔ dɛ̌a nyopòǒ neaǒo je ɔ je, “Nyuà tàa ɔ moo Jùsuu mɔ̀ na nyuu doò.” 70 Kɛɛ Pitɛ̌ chnɛ̀a i mǒno de. Tà tǐ gbei sìn'aa, è nyopòǒ nynanaǒo tùɔn'ǒ kɛn bo kě u dɛ̌a Pitɛ̌ je u je, “Wò win mǒ Jàlalǐi nyu, ii tè i moo kàan tè mòo nyopòà u nyuu do.” 71 È nɔ̀ǒ tùngmaea sadoě popoɛ ɔ̌ pea ɔɔ chɛ̀ win kɛn le ɔ je, “Ě se Jbɛjuǒ Ɔ̈ kɔn tè a boɛɛ jii chɛ̀!” 72 Tǐi doo tǐ jleě è kokɔ̌ nɔ̀ǒ slòa, è win'ǒ Jùsu tmɔɔ̌a nɔɔ ì beaě ɔ mǒ wlò ɛ̈ moo, “Plě seaka kokɔ̌ mǐma slò, mì Ně tè mǒ chnɛ̀ma wěe tan ɛ̈ moo sèě ji.” È Pitɛ̌ nɔ̀ǒ tùngmaea fìɛn.
