Ifisiɛ̌n 3

1Dɛǒ nɛ̀ kɔn tè kwɛǒ je mǒ Pɔ̀ɔ̌à Ě moo kekɛɛ wùlo po nyu keǒ bo boɔ Nyesoaa win ɛ̈ moo Tentǎn Jǔ Jùsu kɔn'ǒ amo kuodakwɛ̌ mɔ̀. Mɛ̌oǒ joo nɛ̀ moo Jùwɛ nyo jě lɛ ɛ̈ moo uu do nù Nyesoa kɔn'ǒ mɔ̀. 2I moo kàan tè a wɔ̌na ini ɛ̈ moo Nyesoaa wlòo jlajlǎ dɛ ɛ̈ɛ̌ sà Lɔɔ wlò kǔ mǒ ɛ̈ Ɔ kɔn'ɔ keǒ a mɔ̀ nɛ̀ kɔn tè Ɔ nyeaǎ konkwaà bo nu nɛ keǒ a mɔ̀. 3Nyesoa po Ɔɔ je wɛ̌ dɛǒ mǒ pepě keǒǒ mɔ̀ ɛ̈ kɔn tè Ě chɛɛn nee kɔno dlǒ sosǒ Ě tmɔɔ̌ amoo. 4Bɛ̌ nu bǎ slè chněedɛ̌à, a mi ɛ jiba ke Ě nuu je wɛ̌ dɛǒ kwɛɛǒo Tentǎn Jǔ jleě mǒ bo le jbojbɛ. 5Klě tǐà sìin wlòmo Nyesoa sea je wɛ̌ dɛǒ pepě mǒ po keǒ tùonyugbe mɔ̀, kɛɛ klě tǐà wlòmo Ɔɔ Sùsu Nɛ̀ po ɛ pepě mǒ keǒ Ɔɔ ngmà je ne tuposà kpa nyo klee wnɔsàɔpo mɔ̀. 6Ɛmo je wɛ̌ dɛ nɛ̀à, klě Nyesoaa kàan tuposà mǒ kuodakwɛ̌ mi ngmnaa doǒ Jùwɛ nyo kɔn'ɔ kɔnma. Uu wùɛǒ u beě tàa do ǔ nu dɛɛ do wòje fǒ, è kmɔ̌ sie fònfnoǒ Nyesoa peea lěe keǒ nyopòà kɔn'ɔ tè wlò popoɛ klě Tentǎn Jǔ Jùsu mǒ, uu wùɛ u mi ɛ mǒ paěnma. 7Nyesoaa kpěà nii konkwa kělɔɔ̌ mǒ nì nu ɛ Ě kɔn Ɔɔ wlòo jlajlǎ dɛ ɛ̈ɛ̌ sà Ɔɔ wlò kǔ mǒ keǒ bo nu Ɔɔ konkwa ɛ̈ moo Ɔɔ tuposà blě kɛne gbɛ̀tɛɛa. 8Kàan tè kě ně tè se kma klě Nyesoaa nyopò wùɛ slè, Ɔ nyeě fɔ̌ keǒ bo tmɔɔ̌ kuodakwɛ̌ wlòlekaen noǎ ï sɔn lěe Tentǎn Jǔ mɔ̀ mǒ 9plě Ɔ̌ nyeě fɔ̌ keǒ Ɔɔ je wɛ̌ dɛà Ɔ poo ble boǒ po ɛ pepě mǒ keǒ nyu wùɛ mɔ̀ ɛ̈ Ɔmo Nyesoaà monoo noǎ wùɛɛ nunu Nyu Ɔ tùaa bo klě tǐà sìin wlòmo 10ɛ̈ di ɛɛ numa Tentǎn Jǔu wǎn mǐ Nyesoaa tɔ̀n pepě mǒ po keǒ win kwa kɔn najiǒpò klee najiǒpòà kɔn'ɔ kpě mɔ̀ ü neěe jɔkɛn, u mǐ ɛ ji ke Nyesoa nuu tɔ̀n konkɔn keǒ dɛ wùɛ mɔ̀. 11Dɛǒ nɛ̀ Nyesoa poa ble seela plě Ɔ nu ɛ̈ kpa tùɔn klě äa Koɔn Tentǎn Jǔ Jùsu mǒ. 12Keǒ dɛǒ Tentǎn Jǔ nuu ɛɛ tè mɔ̀, bɛ̌ nu bä kɔn tè wlò popoɛ klě Ɔ mǒ, ä miě ɛ wɔ̀ba bä boɔě Nyesoa mɔ̀, è ä mi wlò kpaea kɔnma kpǎkpǎ ɛ̈ moo Ɔ mi ä nɔkǔ jebo poba. 13Tèǒ nì kɔn tè Ě bɛ̀te ale, aa wlè biǐ be wɔ̀ɔn. Mɛ̌oǒ joo nɛ̀ moo Ě jě sònwɛ keǒ a mɔ̀, ɛmoǒ ɛ miǒ a dɛ bo po. 14Tèǒ nì kɔn tè kwɛǒ je Ě kɔ kwne bo Ě bɛ̀te äa Gbeǐ Nyesoa 15Ɔ̈ nuu dakɔ̌ wùɛ neěe jɔkɛn klee kělɔ kmɔ̌ɔ mɔ̀ ǔ nee kmɔ̌. 16Ě gbɛ̀ Ɔ wan keǒ Ɔɔ Sùsu Bɛ nye a kpě ï sonwɛ lěe Ɔɔ kpě fòe mǒ ɛ̈ di ɛɛ numa aa tè wlò popoɛ mǐ kbě mǒ ne 17ɛ mǐ ɛ nu Tentǎn Jǔ miě aa wlè jleě ne. Ě bɛ̀te Nyesoa keǒ ba mǐ Ɔ mǒ noɛɛ ne klee tùonyopo tùu 18ɛ̈ di ɛɛ numa a klee aa bǐì Tentǎn Jǔu wǎn tùu a mǐ kpě blě keǒ tèe de jbojbɛ mɔ̀, a mǐ ɛ jě ke Tentǎn Jǔu mǒ noɛnoɛ Ɔ kɔn'ɔ keǒ a mɔ̀ ɛ nuu kunkuɛn. 19Ɛ se nyu kɔn bɔ̈ jbo ɛɛ le kpǎkpǎ. È Nyesoaa chɛ̀ miě a měne jǐba kpǎkpǎ. 20Tè jǐ boaboǎ keǒ Nyesoa mɔ̀ Ɔ̈ kɔn kpě ï nii konkwa klě ä mǒ äǎ wɔ̀le ɛɛ keǒ bä nuu noǎ fòfoa ï ä slě wɔ̀ bä sìɛn nee dlǒ mɔ̀le klee bä gbàa wan. 21Nɛ bo Tentǎn Jǔu wǎn'a jlǔu jlǔǒ neě kmɔ̌ɔ nya ü kɔn'ɔ tè wlò popoɛ klě Ɔ mǒ bu nye Nyesoa tè jǐ boaboǎ ke ɛ mii jleě mǒ bo tonma, kě bɛ ne.

will be added

X\