1 Mǒ Pɔ̀ɔ̌ mǒà gbɛ̀ɛ ɛ a wan klě kàan dɛ klee wlò dbadbǎ mǒ wòje ke Tentǎn Jǔ nuaa. Kě aa tìe tùu dɛ̌ ɛ̈ moo bɛ̌ nu a klee mǒ bä neǒ tàa do, è Ě slɔ̀ɔ je keǒ bo boɔ dɛ keǒ a jemǒ, kɛɛ boǒ tmɔɔ a mɔ̀ plě Ě kwin jele Ě chlě chněedɛ̌ jakǎ klě a mɔ̀. 2 Ě bɛ̀te ale, aǎ ni ɛ bo diě a mɔ̀ ně dɛ ně di wan kma keǒ a jleě mǒ. Bɛ̌ nu bo diě dɛ Ě jii nɛ̀ moo Ě mi jele kunma keǒ nyopòà jě lɛɛ ɛ̈ moo ä ne kmɔ̌ klě tùonyuu dlǒ le sìnsiɛn tǔn mǒ. 3 Kàan tè kě ä neɔ kmɔ̌ɔ mɔ̀, kɛɛ äǎ nu tùonyuu dlǒ mɔ̀le sìɛn'ɛ dɛ äǎ wɔ̀n keǒ Nyesoa mɔ̀. 4 Ɛ se kmɔ̌à ɛɛ wɔ̀ɔn noǎ äǎ wɔ̀ɔn ni, kɛɛ ä ni kpěà Nyesoa nye ämoo keǒ bä sùe äa jlae nyoo tùnwɛ gbè. Ii doǒ nì ä ni äǎ sùe sen le tmɔ̌ nyoo chɛtlǐia gbè klee 5 ä wlɛ̌ de jaě sùsu nyoo chɛtlǐia blǒ mǒ ɛ̈ u nii ǔ wɛ̀n'ɛ Nyesoa dɛɛ de jijiɛ je klee ä ni äa dlǒ le sìnsiɛn wùɛ ɛ̌ tùiǒ Tentǎn Jǔ bo plě 6 bɛ̌ nu bǎ poě aa chɛ̀ Nyesoa kwete mǒ keǒ Ɔɔ bo tùtuɛ mɔ̀, è ä wɛ̀ le mɔ̀ keǒ bä maěǒ nyu wùɛɛ plɔ tu kɛn bo ɔ̈à seǒo Nyesoa bo tùtuɛ kɔn. 7 Sɛje a jě noǎa kɛn dɛ sosǒ ke ɛ nee. Nyu wùɛ bɔ̌ jě ɛ ɛ̈ moo ɔ ni Tentǎn Jǔu konkwa ɔ̌ sìn'ǒ ä mǒ, bɔ sìɛn ɔɔ chɛ̀ɛ tè dlǒ mɔ̀le de ɔ mǐ ɛ ji ɛ̈ moo ä ni Tentǎn Jǔu konkwa wòje keǒ ɔ nii. 8 Tǐ tìi tà a mi ɛ jěba ɛ̈ moo ɛ moo wun fòɛ Ě pe ɛ le keǒ äa kpě jleě mǒ, kɛɛ Koɔn Nɔ̀ nye i ämo keǒ bä po a kbě ja le ɛ̈ see bä wɔ̀ a kbě ja le. Tèǒ nì kɔn tè Ě se ɛɛ tònwe peba mu. 9 Ě se jlǎ ba jě ɛ ɛ̈ moo ně chněenoǎà Ě chleě amoo mɔ̀ Ě peeě a měne fano. 10 Nyopòo tìe je ně chněenoǎa win jakǎ wan ǐ ne kbě kɛn, kɛɛ bo nyniě a slè, Ě se dɛ mono plě ně boɔ wien tɛɛ. 11 Nyu wùɛ bɔ̈ ke bo ɛ jejeɛ̌ ni bɔ ji ɛ ɛ̈ moo ke kɔn doǒ bo tmɔɔ amoo mɔ̀ Ě nii boɔboɔ klě ně chněenoǎ wlòmo, kě Ě mi numa bo neě a slè. 12 Äǎ tɛ̀n ɛ mǒ keǒ bä poě ä klee nyopòǒ jɛɛě uu chɛ̀ le gbòo do wan plě äǎ po u äa chɛ̀ je. Bɛ̌ nu bǔ mu blala mǒ plě bǔ popoo uu chɛ̀ jele, ba jě ke uu plɔ nuu kokoɛ̌ le. 13 Ämoà ä se wan le poba mu ɛ seǒ konkwaà Nyesoa nye ämoo ɛɛ wan le popoɛ mǒ sìnma mu, jà äa konkwa ä kɔn'ɔ klě a slè. 14 Bɛ̌ nu tuposàà ɛ̈ kwɛɛǒo Tentǎn Jǔu tè jleě mǒ bo bä sěɛ lě ɛ a mɔ̀ nynii ni, è wan'à ä pee le ä bɛɛ̌ ɛ snǔ tìe, kɛɛ ke ɛ toon jleě mǒ bo ä nyniiě ɛ amoo mɔ̀, äǎ po wun fòɛ ɛɛ̌ sìn'ǒ le. 15 Äǎ po wan le keǒ nyopò tùu konkwa mɔ̀ ɛ̈ u nii ɛ̈ slě ämoo mɔ̀ kɔn. Ä kuun ɛ je wlò ɛ̈ moo keǒ aa tè wlò popoɛ nii ɛ̌ kwin kaǒ, kě äa konkwaa wakěà neɔ amoo slè mi numa i mǐ kun 16 ɛ̈ di ɛɛ numa ä mǐ Nyesoaa kàan tuposàà po klě blě tìi kɛn le ï tmɔɔ amoo mɔ̀le. Ä jlɛ̌ bä mu wakě jajle kɛn le ä mǐ wun fòɛ le po keǒ äa konkwa mɔ̀, kɛɛ äǎ jlǎ bä muě wakěà kɛn ï kɔn konkwa wɛ̀ɛ mɔ̀. 17 Kě Nyesoaa win dɛ̌ i je, “Bɛ̌ nu nyu wùɛ bɔ̌ jlɛ̌ bɔ po wan le keǒ dɛɛ tè mɔ̀, è bɔ po wan le keǒ Koɔn mɔ̀.” 18 Mɛ kɔɔ̌n tèǒ joo nɛ̀ moo Nyesoa Ɔɔ̌ poo nyuà pee wun fòɛ le kòo kɛn, kɛɛ nyuǒ kɔn nynɛ̌ Nyesoaa chɛ̀ pee le nɔ̀ Ɔ pee kòo kɛn.
