1 Ä chleě a mɔ̀ ɛ̈ kwɛɛǒo Nyuà u dɛɛ Win Ɔɔ tè jleě mǒ bo Ɔ̈ nye ämoo kmɔ̌ sie fònfno. Sɔɔn'ě kmɔ̌ɔ wlò tùla mǒ Ɔ nea kmɔ̌. Äa chɛ̀ ä wɔ̌na Ɔɔ win ä kpalaǒ Ɔ jleě mɔ̀ plě ä jěa Ɔ, ä nua äa sonwe ä tǒa Ɔ le. 2 Tà Ɔ wǒaa tàmo, ä jěa Ɔ lo plě ä ni Ɔɔ sàse dɛ klě tǐà wlòmo klě a mɔ̀, Nɔ̀ kɔn tè ä tmɛɛ̌ amo, Ɔ̈ nye ämoo kmɔ̌ sie fònfno. Ɔ neaě Nyesoa mɔ̀ Ɔ̈ moo äa Gbeǐ plě Nyesoa poa Ɔ pepě mǒ keǒ ä mɔ̀. 3 Dɛà äa chɛ̀ ä jěaa plě ä wɔ̌naa nɛ̀ kɔn tèà ä tmɛɛ̌ amo ɛ̈ di ɛɛ numa a mǐ ä kɛn be ä miǒ tàa do na klě Nyesoa dɛ mǒ Ɔ̈ moo äa Gbeǐ klee Ɔɔ Jǔ Jùsu Tentǎn Jǔ 4 ɛ̈ di ɛɛ numa äa plɔ bloblɛ miě jele wɛ̀ tɛɛ. Dɛǒ nɛ̀ kɔn tè ä chlě noǎà ii tè klě a mɔ̀. 5 Tuposàǒ ä wɔ̌na lěe Tentǎn Jǔ wan Ɔ poaa ɛ̈à ä jlɛ̌ bä tmɔɔ̌ amoo nɛ̀ moo Nyesoa moo Pepě, kwijlě slě Ɔ mǒ ne. 6 Bɛ̌ nu bä nu wiěn Ɔ klee ämo ä nɛǒ tàa do, kɛɛ bä neě kwijlě slè, è dɛǒ ä nii klee tèǒ ä boɛɛ i moo sen ä tmɛ̌ ni. 7 Kɛɛ bɛ̌ nu bä neě pepě mǒ wòje keǒ Ɔ nuu, è äa wùɛ ä nɛǒ tàa do. Ɔɔ Jǔ Jùsu Tentǎn Jǔu nymɔǒ nɛ̀ jla ä le ɛ̈ sà ä kpni kukwǐ wùɛ fǒ měne. 8 Bɛ̌ nu bä nu wiěn ä se kpni kukwǐ nu, è ä gbee äa chɛ̀ mǒ no plě tèǒ ä boɛɛ i se kàan tè, 9 kɛɛ bɛ̌ nu bä wɔɔn äa kpni kukwǐ je, è Nyesoaà moo Wlò Je Kuun Nyu klee Ɔ̈ kɔn kmɔ̌ slɛɛ̌ mǒo Ɔ mi äa kpni kukwǐi tè wlò le pooba Ɔ miǒ äa seǒ jebo siǐn kmɔ̌ wùɛǒ slè sà. 10 Bɛ̌ nu bä dǎ bò ɛ̈ moo ä sěɛlǎ kpni kukwǐ ni, è ä nu Ɔ mǒ sen le tmɔ̌ nyu, è Ɔɔ win'à iǐ sàǒ ä dɛ jleě mǒ.
