1 Kwnɛtiɛ̌ 13

1Bɛ̌ nu boǒ wɔ̀le ɛ keǒ bo po tùonyopoo win'i doědoe klee najiǒpòo win'i chɛ̀, kɛɛ boǒ se mǒ noɛnoɛ kɔn keǒ nyopò tùu mɔ̀, Ě se dɛ nynɛ̌ sɛ̀n, Ě wǒ je keà u kokwɛɛ lee panpeě je le ï pee slɛ̀ le ɔ̀ɔ̌ keà u nuu gbèkleeǒ u beò. 2Bɛ̌ nu boǒ wɔ̀le je bo boɔ Nyesoaa win plě boǒ jbo je wɛ̌ noǎa wùɛ le plě bo ji noǎ wùɛ klee bo kɔn tè wlò popoɛ ɛ̈ nee kbě kɛn'ɛ chɛ̀, bɛ̌ ke ɛ ni bo ke togbei wlò le sɛ̀, kɛɛ bɛ̌ nu bo se mǒ noɛnoɛ kɔn, Ě se dɛ nynɛ̌ sɛ̀n. 3Bɛ̌ nu boǒ wɔ̀le je bo nye ně noǎ wùɛ pòpo nyo plě bo sɔn'ǒ u mɔ̀ mǒ ně fǒà bǔ siɛn nɛɛ chɛ̀, kɛɛ bɛ̌ nu bo se mǒ noɛnoɛ kɔn, ɛ seǒǒ dɛ bo poba mu plě Ě sěɛɛ̌ jè dɛ nynɛ̌ sɛ̀n. 4Mǒ noɛnoɛ moo wlò dbadbǎ plě ɛ̌ moo wɔle je jbojbɛ. Ɛ se chea kɔn plě ɛɛ̌ jě ɛɛ chɛ̀ nyu mǒ chɔɔ plě ɛɛ̌ jaeě ɛɛ chɛ̀ le. 5Seǒ nyu wùɛ tùtuɛ kɔn slě ɛ mǒ ne plě ɛɛ̌ tɛ̀n ɛ mǒ keǒ ɛɛ do bɛ kɔn noǎ wùɛ, ɛɛ̌ poě jlo le klee ɛɛ̌ po dɛ kukǔ ble keǒ nyopò tùu jleě mǒ. 6Ɛɛ̌ kɔn lě dɛ kukǔ plɔɔ bloblɛ mǒ, kɛɛ ɛɛ plɔ ble keǒ kàan dɛ mɔ̀. 7Tǐi pɛpɛ mɔ̀ ɛ se seasea kɔn plě ɛ kɔn tè wlò popoɛ tǐ wùɛ mɔ̀ ɛ̌ kɔn wlò je kunkuɛn klě Nyesoa mǒ plě ɛ̌ nyna bo kpankpa keǒ dɛ wùɛ mɔ̀. 8Mǒ noɛnoɛ se dlǒ chlɛ̀chlɛ kɔn, kɛɛ Nyesoa win boɔboɔ bɛ nyee nyu ɛ miǎ sìnma, è win'i doědoe popoɛ miǎǒ sieba plě de jbojbɛ miǎ sìnma. 9Mɛ kɔɔ̌n tèǒ joo nɛ̀ moo de jijiɛ wùɛ ɛ̈ kwɛɛǒo Nyesoa jleě mǒ bo ä ji ɛɛ wakěe tìe sosǒ plě Nyesoaa boɔboɔ win wùɛ ä boɛ i wakěe tìe sosǒ. 10Bɛ̌ nu bo tǐ bǐ nyniǒ keǒ noǎ wùɛǒ bi wɛ̀ě jele, è noǎǒ moo pnɔ ɛɛ wakě peěn i miǒ snǔ mɔ̀ sàeba. 11Tà Ě mooa jǔ Ě boɛa wòje jǔ, boǒ ke dɛ ni ɛ̀ wòje jǔ, ně dlǒ le sìɛnsiɛn wǒa je jǔ. Kɛɛ klě tǐà wlòmo Ě monoo kɛ̀ jbɛju, ii tè jǔ noǎǒ Ě sɔɔn kɛ̀ǒ i mǒ mɔ̀. 12Klě tǐà wlòmo äǎ jě Nyesoa tɛɛ wòje ke ä ni äa chɛ̀ jejeɛ̌ klě jělaě wlòmo, kɛɛ ä miǎ Ɔ jěba Ɔ klee ämo ä miǎ jeja popoo lo. Klě tǐà wlòmo dɛ wùɛ ɛ̈ kwɛɛǒo Nyesoa jleě mǒ bo Ě ji ɛɛ wakěe tìe sosǒ. Kɛɛ Ě miǎ noǎ wùɛ jiba keǒ Nyesoa jleě mǒ wòje keǒ Ɔ nuu noǎ wùɛ jijiɛ kěàǎ jleě mǒ. 13È noǎ kplěe tan'à nì se bo wèwɛ kɔnma mu, tè wlò popoɛ klee wlò je kuuan plě mǒ noɛnoɛ. Kɛɛ ii tan wùɛǒ mǒ noɛnoɛ nɛ̀ moo dlǒ.

will be added

X\