Gogelelo 21

1Kagena de asa ngohi takelelo he kanaga o soroga ḋamomuane moi de lo o dunia ḋamomuane moi. Sababu o soroga de o dunia iḋoḋoma gena ihiwaka, komagena lo o ngoloto. 2De kanaga lo o kota moi de o bi dorou ḋatotorou moi lo ihiwaka so ḋatetebi, de takelelo gena o kota ḋamomuane moi, ena gena o Yerusalem asa iuti o sorogaku. Magena isidailako maro o ngopeḋeka moi mokakawi ma ngale ami roka gena o baju ḋaloloha-loha imihike la momasitiba. O kota magena o Gikimoi kagena o sorogaka de asa wosigutiku. 3De lo asa toise o pareta ma kursino o ili ilalamo moi itemo, "He! O Gikimoi Awi goge o orasi manena asa kanaga o nyawa manga sidongirabaka. Komagena so o nyawa ona magena asa yodadi to Una Awi nyawa de Una masirete lo asa wogoge dede ona, imatero maro to ona manga Gikimoi masirete. 4So Una asa to ona manga sininga ma susa eko to ona manga o kongo gena, ḋangodu wapiki so wasisaka. De ona nagoona lo asa yosone kawa, yododora kawa, yoari kawa eko lo yasangisara kawa. Sababu o bi moi-moi iḋoḋoma ḋangodu asa isisaka." 5Magena de Una o pareta ma kursika womatatami gena asa wotemo, "He! Ngohi asa taaka so o bi moi-moi ḋangodu ḋamuaneka. Hika o demo moi-moi magena nalefo iḋoma, sababu o demo-demo ḋangodu magena igogou so aku popiricaya. 6De Ngohi lo tonidedemo o bi moi-moi taaaka ḋangodu itiai de ḋaboloka. Ngohi manena Ai kuasa ma bati lo ihiwa, de Ngohi lo kanaga ma nonomaka, de lo ma dodoguka de lo asa tooho ma dodogu lo ihiwa. So Ngohi o oho ma gola gena asa taaka, so nakoso o nyawa la Ngohi gena idupa, de Ai dateka ona magena asa ioho ka sidutu ikakali. Maro o nyawa la kanaga manga kiri ḋadudu done tahike la o ake youdo, de o ake ma jobubuno magena yahike ma ngale upa he ona yafangu. 7De lo o nyawa nakoso ona o dodoto ikokulai yaholu de Ngohi ipiricaya ḋaputuru maro o prajurit moi imakudubu sidago lo watura, de ona magena asa Ngohi o bi moi-moi ḋangodu tahike onaka. De lo Ngohi asa todadi to ona manga Gikimoi, de ona asa yodadi to Ngohi Ai ngopaka. 8Duma nakoso o bi nyawa ma dorou, ona magena asa yaumo o uku ma talaga ma rabaku la kagena asa yasidutupu de o walira, de komagena ona magena asa yosone ma sinotoka. O bi nyawa ma dorou ona yaumo gena, nakoso yobaraniwa, duma yoholu o Yesus Kristus wipiricaya ḋaputuru. Ona magena manga manara ḋangodu ḋatorou, ena gena ona yototooma, ona manga nyafusu ḋatotorou yaaaka, ona igogomahate, ona o kia naga de manga gia isiakaka gena yasuba, de lo ona yatotodamato de hitilahi o manara ḋatotorou yaaaka." 9Ḋabolo de o malaikat yatumudingi ona iḋomaka o udo-udo de o bodito ma dodogu tumudingi iaaho, ona magena manga sidongirabano wimoi wahino ngohino, de wotemo, "Nahinosi, la ngohi tonisikelelo ngonaka mokakawi muna magena o Duba ma Goho to Una Awi peḋeka." 10Kagena de o Gikimoi Awi Gurumi idahe ngohika ai sininga wapareta kali, so o malaikat una magena woingaho o tala ma ḋoku ikukuru-kuruye. De kagena woisidumu o kota ilalamo moi de kagena o dorou moi lo ihiwa, ena gena o Yerusalem ma kota o sorogaka de o Gikimoi wosigutiku. 11Iutiku, de kanaga de to Una Awi kuasa ma mulia so ma nita gena maro o paramata ḋabobole ma soka moi ifoloisi ḋaloha, gena o yaspis ma pudaki, de ma dodo koloko o kaca so ileto-leto. 12O kota magena kanaga ma sigilolino ma boberesu foloisi ikukuruye de ma ngora lo ngai mogiowo de sinoto. De ma ngoramoi-ngoramoika magena lo kanaga o malaikat yamogiowo de sinoto yojajaga. Kagena ma ngoramoi-ngoramoika lo isilefo o Israelka manga soa yamogiowo de sinoto ma ronga, so o ngora moika gena isilefo o ronga moi. 13Ma boberesu o wange ma siwako kanaga o ngora saange de lo ma koremiaku o ngora saange, ma koresaraye o ngora saange de lo o wange ma dumusa o ngora saange. 14O boberesu magena imaoko ma sosoḋe o teto ngai mogiowo de sinoto ma ḋokuka. O sosoḋe ma teto moi-moi magenaka kanaga o Duba ma Goho Awi sosulo yamogiowo de sinoto manga ronga moi-moi gena isilefoka. 15O malaikat una magena to una awi giaka wacohono o didiki moi o guracino, la o kota magena watuga wakiloli, bai ma boberesu bai lo ma bi ngora-ngora. 16So wotagi de o didiki o kota magena watugaka. O kota magena ipasagi iha so ma doduga gena ma gaku imatero lo de ma ngoha. Watugaka, de waeto ma gaku o stadia 12,000 (eko o kilo 2,400), de komagena lo ma ngoha bai lo ma gaku gena ka imaketero. 17De lo watuga kali, ma boberesu waeto so ma gakuye o meter moributangaka, o malaikat ma doduga gena kanaga lo o nyawa ma biasa yapapake. 18Ma boberesu magena isiaka de o teto paramata ḋabobole ma soka, o yaspis ma pudaki, o kota magena isiaka de o guraci ma duhutu, so isiru de idodo imatero de o kaca. 19Ma boberesu magena ma sosoḋe ma teto isiporomu de o paramata ma bio idala gena he ḋangodu. O sosoḋe ma teto ma nonoma gena o paramata ḋabobole ma soka, o yaspis pudaki isiaka. Ma sinotoka o paramata foloi ihali de ḋabisi ma duhutu koloko o nao lidanga, ena gena o nilam. Ma saangeka o paramata ḋaaare de ḋatataro yatuo-tuo maro o kumo, gena o mirah. Ma ihaka o paramata ḋabobole ma sokali gena o zamrud. 20Ma motohaka o paramata yaliri-liri maro o karianga, duma ḋaaare de ḋasosawala, gena o baiduri sepah. Ma butangaka o paramata ḋasosawala maro o dowora ma ake, gena o delima. Ma tumudingika o paramata ḋakokurati gena o ratna cempaka, ma tupaangeka o paramata ḋabibisili gena o pirus, ma siwoka o paramata ḋakokuratili gena o topas, ma mogiowoka o paramata idodo maro o marigapi gena o krisopras, ma mogiowo de moika o paramata ḋabibisi kali gena o lazuardi, de lo o teto ma mogiowo de sinotoka o paramata ḋauungu gena o kecubung. 21Ma boberesu ma ngora mogiowo de sinoto magena gena o mutiara ngai mogiowo de sinoto so o ngora moi o mutiara ngai moika. O kota magena ma ngeko isiaka de o guraci ma duhutu, gena ma dodo maro o kaca ileleto-leto. 22Kagena o kotaka asa ngohi tamakewa o Gikimoi Awi Tahu, sababu o Jou Wokokuasa de lo o Duba ma Goho Ona igogoge o kota ma rabaka. 23De o kota magenaka ngaroko upa he o wange eko o ngoosa ma siwa, sababu o Gikimoi gena Awi mulia ilamo so de to Una Awi nita ma siwa magena sidago lo o kotaka yodisiwa, komagena lo o Duba ma Goho Awi nita ma siwa. 24De o kota magena maro o nita yadisiwa o bi moi-moi ḋangoduka, so o bi nyawa yangodu o bi moi-moi itotiai gena aku yaaka. De lo o bi kolano yangodu asa yahino la iwosa, to ona manga horomati de manga kaya masirete magena yaaho de yatide isuba o Gikimoika de lo o Duba ma Gohoka. 25Sababu ngaroko o puputu kanaga iḋomaka so kota ma ngora-ngora ma boberesu asa iperesuka, duma o riho magenaka asa he ḋapuputu kawa so o ngora magena he yaperesu kawa. 26So komagena asa o nyawa o bi doku ḋangodu yahino la to ona manga horomati de manga kaya masirete gena yaaho de yatide isisuba o Gikimoika de lo o Duba ma Gohoka. 27So ka o nyawa nagoona lo yahiwa la kanaga manga sininga ma rabaka de o dorou, eko manga manara maro o Gikimoi waleleki, eko lo yatodamatoko. Duma kanaga ona magena ka cawali manga ronga isilefo kugena o buku ma rabaku, kiaka o nyawa ona magena yooho ka sidutu ikakali.

will be added

X\