Gogelelo 10

1Kagena de ngohi takelelo o malaikat ma somoa moili wonononau, una magena o sorogaku wouti. Una magena o lobi-lobi iwisaono, de awi saheka kanaga o ngawate yalalono, de awi bio ma siwa maro o wange ma siwa de lo awi ḋohu maro o uku ma golingasu. 2Kanaga awi giaka o buku ma ceceke o lolo moi de o buku magena ipelengaka. So una awi ḋohu ma girina o teoku womasigipitoku de awi ḋohu ma gubali o dududuka womasigipitoku. 3De una womatoore womaili-ilika maro o singa imatoore. Womatooreka, de o diwotu iwisango ma dupuru isidadu ma para tumudingi ma ili ka ilamo poli. 4So o diwotu magena idupuruka, de ngohi ai edekati o demo magena talefo, duma toise o ili moi o sorogaku itemo, "O diwotu ngai tumudingi ma demo gena upa nalefo, de magena bilasu nosipongoka so upa nosingangasu." 5Kagena de o malaikat una gena awi gia ma girina watide o sorogaye, 6de wosasi o Gikimoi Awi ronga Una magena wooho ka sidutu ikakali o soroga, o dunia, o ngoloto de lo ma raba o bi moi-moi ḋangodu gena wosidadika. So o malaikat magena wosibobeto wotemo, "He! O Gikimoi asa wotamaha kawa ma orasi gena yaadoka. 7Kanaga o malaikat ma tumudingika done ma orasika awi trompet magena wawuwu, de o Gikimoi Awi edekati waiihu gena asa waaka ma ngale Awi dupa wosiboloka. Awi edekati magena imatero de o kia wasingangasu Awi sosulo-sosuloka, ena gena o bi nabi-nabika." 8De ma ili o sorogano magena ibicara ngohika itemo kali, "Notagi o malaikat una womasigogipito o teoka de o dududuka, la o buku o lolo moi awi giaka magena naḋehe kasi." 9Ngohi totagi o malaikat magenaka, de togolo totemo, "Tanu o buku ilolo ma ceceke magena noihike ngohika." So una wotemo ngohika, "Naḋehe de naoḋo namata-mataka o buku magena. Done asa ani uru ma rabaka ma jame ḋamuti maro o madu, duma ani poko ma rabaka de asa idadi ḋamali." 10Kagena de o buku ma ceceke o lolo moi magena o malaikat awi giaka ngohi taḋehe de lo taoḋoka. To ngohi ai uru ma rabaka tajame ḋamuti maro o madu, duma ma orasi taḋasika, de ai poko ma rabaka de asa idadi ḋamalika. 11Ḋabolo de isulo ngohika, "Ngona gena bilasu nasingangasu kali o Gikimoi Awi demo manena ma ngale o bi bangsa moi-moika, de o bi soa moi-moika, o bi bahasa moi-moika de lo manga kolano yangoduka."

will be added

X\