Matius 24

1Ma orasi o Yesus o Gikimoi Awi Tahu ilalamo wodongosa de Awi muri-muri yahino Unaka, de iwisidumu o bi tahu-tahu magena ḋaloha icarawa. 2Una wasango onaka wotemo, "Iteroka, ngini nianano gena o tahu magena ilamo de ḋaloha. Duma ngini tinisingangasu igogou, done o tahu-tahu magena ma teto o ngai moi lo asa imalapangawa de o teto ma somoa, sababu ḋangodu magena asa iruba de ituraba." 3Kagena de o Yesus wotagi o Zaitun ma Talaka so ma ḋokuka wogogeku. De Una ka womatengoka, de Awi muri-muri yahino ma ngale imasano. Ona wisano Unaka itemo, "Baba, hika nomisingangasu muruoka asa o hali notetemo magena idadi. De lo nomisidumu o nonako o kia idadi nakoso Ngona asa nahino de lo ma orasi ma dodogu imasidiado." 4Una wasango onaka wotemo, "Nimasitiari ḋaloha, upa sidago ngini inisihaga. 5Sababu o nyawa yadadala asa yahino de itemo, 'Ngohi manena ḋabolo o Salamati ma Kolano,' so asa o nyawa yadadala yasihaga de yasisa. 6So nakoso niise kadoke o dupuru ma ili de kadoka o kudoti ma habari, upa lo nia rohe ḋatora. O moi-moi magena bilasu idadi iḋoma, duma upa nitemo magena o dunia ma dodogu ma orasi imasidiadoka. 7O bangsa moi yasaturu o bangsa ma somoa, o kolano moi asa yakudoti o kolano ma somoa. Kiaka o dunia ma ḋokuka asa idadi kiaka bato o bare so o ino asa ihiwa, de lo o osu de o diwotu. 8Ḋangodu magena asa ka o bi sangisara ma nonomaka bato, koloko o ngopeḋeka moi mitotilibu de ami siri ma nonomaka so matamaha ma orasi muna he mopuo. 9Mutuwade ngini done nitago la nisangisara de nitooma. De ngini manena o bi bangsa yangodu asa niduhudu sababu ngini Ngohi nimomote. 10O nyawa yadadala done asa manga piricaya Ngohika gena yodongosa. Ma binuka asa manga dodiao yasidoa manga saturuka, de yadadala asa imatekeduhudu moi de moika. 11De o guru ikokulai yadala asa yahino la o nyawa yadadala yakulai. 12Kagena de o bi nyawa manga dorou asa foloi idogo, sidago lo yadala yaaku kawa imatekedodara. 13Duma nagoona manga piricaya Ngohika ḋaputuru sidago o dunia ma dodogu imasidiado, igogou ona magena done asa manga dorouno isalamati. 14Duma o dunia ma dodogu yaado waasi, de o habari ḋaloloha o Gikimoino gena bilasu isihabari kasi sidago o dunia ma pupuku ihaka, la o bi doku yangodu lo aku yoiseka. Ḋabolo de o dunia ma dodogu asa imasidiado." 15"Iḋoḋomaka ma nabi Daniel wosingangasu done o orasi ma simaka o kia naga moi isironga 'O Dorou Ilalamo' gena asa niakelelo isituraba o Gikimoi Awi Tahu. (Nako niabaca gena bilasu niatailako nisidodiahi o demo manena ma ngale.) 16So nakoso niakelelo, de nagoona o Yudea ma daeraka bilasu yoloḋa o talaye. 17So nagoona la kanaga manga tahu ma ngihi iḋoḋokuka lo upa iwosa la manga kia naga moi yaḋehe, duma ka youti de yodoloḋa. 18De nagoona kanaga manga doroka lo upa yoliho la manga baju yaḋehe, duma ka yodoloḋa. 19De yasibodito ilamo o bi ngopeḋeka yatotilibuka de o bi awa la manga ngopa ka yasusususi. Kodo! Isusa ona yoloḋa. 20Hika nigolo o Gikimoika, la niloloḋa ma orasi magena upa idadi o alo ma orasika eko o Sabat ma wangeka so isusa ngini niloḋa. 21Sababu igogou ma orasi magena asa idadi de imaaka o sangisara gena pakokelelo waasi, ka ma solano o dunia isidadi sidago o orasi manena de lo o orasi ma simaka asa idadi-dadi kawa. 22Duma o Gikimoi ma orasi magena watimisi, sababu nakoso ma orasi watimisiwa, igogou o nyawa moi lo iohowa. So ma ngale o Gikimoi Awi nyawa wahihirika, sidago o sangisara ma orasi magena gena ka watimisi. 23So o orasi magegena nako o bi nyawa itemo nginika, 'Niakelelo, o Salamati ma Kolano kanena naga!' de ma somoa itemo 'Hiwa, kadoke naga!' upa lo niapiricaya o nyawa ona magena. 24Sababu o bi Salamati ma Kolano ikokulai de o bi nabi ikokulai asa yahino de yaaka o nonako ihahairani la o nyawa yadala gena yakulai. Nako yaaku, o nyawa la o Gikimoi Awi nyawa wahihiri ona magena lo yakulai. 25So bilasu nimasitiari ḋaloha! Sababu o moi-moi ḋangodu manena Ngohi tinisingangasu iḋomaka la ngini nianakoka, ngaroko idadi waasi. 26So nakoso o nyawa itemo nginika, 'Niwikelelo, o Salamati ma Kolano kagena naga o tona ibobeleuka!' upa lo nitagi. Eko nakoso itemo, 'Niwikelelo, Una kagena o tahu ma rabaka!' upa lo niapiricaya. 27Sababu ma orasi igogou Ngohi o Nyawa ma Duhutu tahino kali, de Ai hino gena asa o dunia ma pupuku ihaka yakelelo, maro o tatawi la kanaga yodisiwa o wange ma siwako sidago o wange ma dumusa. 28Nakoso kanaga o sone ma bake, gena yanakoka sababu o bi namo idala asa imatolomu ioḋo. Komagena lo Ai hinoli o duniaka, upa tahino tomasipongoka, duma asa ka nianako." 29"Ma orasi o susa de o sangisara magena ipasaka, de o wange de o ngoosa isiwa kawa so ḋapuputuka. So o dipa lo ihiti so o moi-moi ḋangodu o dipaka ma dodagi he yamote kawa, de o bi ngoma lo asa o dipaku itura. 30O orasi magenaka de o dipaka o nonako moi asa yasikelelo gena ma ngale Ngohi, o Nyawa ma Duhutu, tahino kali. De o bi nyawa yangodu o duniaka asa yododora, sababu ona asa ikelelo Ngohi tahino o lobi-lobi ma rabaku touti de to Ngohi Ai mulia ma siwa tomasisaoka de Ai kuasa ma buturu. 31O trompet ma ili ilamo asa yawuwu, de to Ngohi Ai malaikat tasulo la itagi yatolomu to Ngohi Ai nyawa yangodu o Gikimoi wahihirika, o dunia ma pupuku ihaka sidago o dunia de o dipa ma batika." 32"Ngini bilasu o simodoto nimagese, ena gena o ara ma hutuka. Nakoso o ara ma hutu ma umaka la niakelelo itoori de lo iboboko, magena inisinonako o ogo ilalamo idumuka. 33Komagena lo nakoso o susa de o sangisara ḋangodu Ngohi tododedemoka la idadi gena, nianako Ai hino ma orasi he idumuka. 34So igogou tinisingangasu nginika, o nyawa yangodu iooho manena isone waasi, de o bi sangisara ma hali moi-moi manena done asa idadi de imaaka. 35So o dipa de o tona asa isisa de ḋalutu, duma Ai demo de Ai dodoto asa itagi gila-gila de ma dodogu ihiwa." 36"Ngaroko komagena, o nyawa moi lo asa yanakowa to Ngohi o Nyawa ma Duhutu Ai hino ma orasi de ma wange. Salanta o malaikat o sorogaka lo yanakowa de Ngohi Awi Ngopa masirete lo tanakowa, ka cawali Ai Baba masirete wanakoka. 37Maro o kia naga done asa idadi ma orasi Ngohi o Nyawa ma Duhutu tahino kali, imatero maro o kia naga idadadi iḋomaka ma nabi Nuh awi orasika. 38Iḋomaka ma nabi Nuh awi orasika, de o nguuhi ilamo sidago idadi o taufani magena imasidiado waasi, de o nyawa yanakowa o kia naga done asa yadahe onaka. Ona salalu ka yooḋo de youdo, de lo yokawi, gena gila-gila sidago ma nabi Nuh magena o deru ilalamoku wopaneka. 39Ma orasi o taufani magena imasidiadoka, so o ake idola sidago ona yangodu yalutu, de ka o orasi magenaka o kia naga idadadi gena ona asa yosihodaka. Komagena lo ma dodagi ma orasi Ngohi o Nyawa ma Duhutu tahino kali kanena o duniaka. 40O orasi magena o nyawa yasinoto o doro ma rabaka imatekemanara moi, de wimoi asa iwingaho de moili asa iwiḋohaka. 41O ngopeḋeka yasinoto o tamo yotutu ma rabaka, de mimoi asa imingaho de moili asa imiḋohaka. 42Komagena so Ngohi totemo bilasu ngini nimajaga de nia dailakoka, sababu ngini nisidodoguwa muruoka de nia Jou asa wahino." 43"Nimasosininga to Ngohi Ai ade-ade komanena: Nakoso o tahu ma duhutu yanakoka o putu itongirabaka de manga tahu ma rabaka itotosi iwosa, de igogou ona asa yojaga isidodiahi ma ngale itotosi gena upa iwosa. 44Komagena lo ngini bilasu nimajaga nisidodiahi la Ngohi nidamaha, sababu ngini nianakowa ma orasi muruoka de Ngohi o Nyawa ma Duhutu asa tomasidiado." 45"Tosiade-ade kali, kanaga woleleleani moi wococawaro de lo awi tuangi awi manara waaka wokaeli. Woleleleani una magena ma tuangi witideka, la wodadi yoleleleani ma binuka manga sahe moi ma ngale manga ino o wange isigeto-geto wositoku. 46Igogou una asa wosanangi, nakoso ma tuangi awi dodagino woliho de wimake una awi manara gena ka waakasi. 47Ngini tinisingangasu igogou, ma tuangi gena asa una witide la wodadi to una awi arata ḋangodu ma jojaga. 48Duma nakoso woleleleani magena awi sininga ḋatorou, una magena asa awi siningaka wotemo, 'Ai tuangi ma deka lo woliho waasi.' 49Kagena de una asa yoleleleani ma binuka gena wangangapoka de wotagika, wooḋo de woudo de o nyawa yatotobadalu. 50Duma ma orasi una waaka maro komagena, de imatodoka awi tuangi asa womasidiado ma orasi eko ma wange una wananakowa. 51Done woleleleani magena awi tuangi asa wingangapo wisangisara de wiumo ma duduka, wiaka maro wokokulai moi. Kagena una asa woari de lo wosangisara."

will be added

X\