Yohanes 13

1O Paskah ma Wange ma Rarame gena he yaadoka, so ma langino de o rarame ma ino yaoḋo, de o Yesus gena wanakoka Awi orasi imasidiadoka, ma ngale Una o dunia manena bilasu wodongosa de woliho wokahie ma Babaye. Una Awi muri-muri masirete igogoge o duniaka, ona magena wadodaraka so kanaga Una Awi edekati wasikelelo Awi muri-murika to Una Awi dodara gena foloisi ilamo onaka. 2So ḋaputuku de kanaga ona yooḋo de o Iblis iḋomaka o Yudaska, ena gena o Simon Iskariot ma ngopa, gena wiaka ḋabolo so wisigurubuka, o aturu ḋatotorou moi kanaga awi sininga ma rabaka itemo, "Ngohi aku o Yesus towisiija." 3Duma o Yesus wanakoka kanaga ma Baba Gikimoi wihike ḋabolo Unaka o kuasa so aku o bi moi-moi ḋangodu wapareta, de Una lo wanakoka Awi sihino o Gikimoino so kanaga asa woliho Unaka. 4So kagena ona yangodu ka yooḋosi, de Una womaoko de Awi baju wahoi so wahadoku, de o handok waḋehe so Awi doino wosipilikuka. 5Wosipilikuka, de o ake waḋehe de woguse o bokolku de womaaka maro o gogilalo moi, so Una Awi muri-muri manga ḋohu watiodo de Awi handok lo wosieseka. 6So wahino o Simon Petruska, de Awi muri una magena wotemo, "Jou, ḋadoohaso Ngona notemo maro to ngohi ai ḋohu de Ngona natiodo." 7De Una wotemo, "O kia taaaka kanaga de ma ngale, de ngaroko magena ngona nanako waasi, duma done ma duuruka ngona asa nanako." 8Kagena de Awi muri wotemo, "Idadiwa! Ka o orasi moi lo tonisimahawa, so upa Ngona de to ngohi ai ḋohu natiodo." Kagena de Una wotemo, "Nakoso ngona la Ngohi tonitiodowa, de ngona magena ngaroko to Ngohi Ai nyawa imomote, duma ma duhutu kawa." 9So Awi muri una magena wotemo kali, "We, Jou! Nako komagena, de upa ka to ngohi ai ḋohu duma bilasu de ai sahe de ai gia lo natiodo." 10Komagena de Una wotemo Awi murika, "Nakoso o nyawa la kanaga imaosi ḋabolo, manga rohe ḋatebi so o ngekoka itagi-tagi de ilihono de ka cawali manga ḋohu bilasu yatiodo. De ngini kanena nia sidongirabaka, nako nia sininga ma dorou gena ningodu niatebika, ka cawali una womatengo watebi waasi." 11Komagena wotemo onaka, sababu una womatengo done asa wisiiija magena, naguuna gena Una he wanakoka. 12Watiodo ḋaboloka, de Awi baju gena waḋehe so womasitibaka, de Awi rihoka womatami kali. So womatamika, de wotemo onaka, "Idodooha o kia Ngohi taaaka nginika gena ma ngale tanu nisihodaka. 13Ngini kanena niaso Ngohika nia Guru, eko nia Jou, de nako Ngohi komagena, gena itiai so nibicara lo ka ḋaloha Ngohika. 14Ma sababu Ngohi ngaroko to ngini nia Guru de nia Jou, duma nia ḋohu gena tatiodoka, so ngini lo bilasu nia ḋohu nimateketiodo so nimahadoku bai! 15Sababu Ngohi taaka komagena, ma ngale aku ngini tinisikelelo, maro idodooha Ngohi tiniaka nginika, komagena ngini lo bilasu nimahadoku nimatekeleleani moi de moika. 16O nyawa la idadi ileleleani, ona igogou yaakuwa itemo, 'Nako ngohi de ai tuangi woipopareta, ngohi foloi ilamo,' magena yaakuwa isibicara. De komagena lo nakoso o nyawa moi de kanaga wisulo awi dodiaoka wotemo, 'Notagi ai demo naaho de nadedemo onaka,' so una wotagi wadedemo gena, waakuwa womasihie wotemo, 'Nakoso ngohi de kanaga woisusulo gena, ngohi masirete foloi tolamo.' 17De magena o dodoto manena ngini kanaga nianako itiaika, so ngini asa igogou nisanangi, nakoso ngini nimahadoku de nimatekeleleani moi de moika. 18O kia naga Ngohi tinidedemo nginika gena nia sininga ma dorou yatiodoka, kanaga tinisidumu duma ningoduwa. Kanaga moi una o nyawa ma dorou, una towisidumuwa, sababu o nyawa nagoona Ngohi tahihirika, ona magena igogou Ngohi tanako. Duma Ngohi tinidedemo komagena, la ma ngale isiganapu maro o kia isilelefo iḋomaka o Gikimoi Awi Jaji ma Buku ma rabaka itemo, 'Kanaga o nyawa moi wooḋo dede Ngohi, una magena done asa womadadi to Ngohi Ai lawangi.' 19De magena idadi waasi de kanaga Ngohi tinisingangasu iḋoma nginika, la o orasi magena yaadoka, de ngini asa nipiricaya igogou, Ngohi manena o Salamati ma Kolano. 20O nyawa Ngohi tasusulo so itagi o nyawaka, la nakoso ona magena yaḋehe ḋaloha, magena imatero de ona lo Ngohi iḋehe ḋaloha. So o nyawa nagoona la Ngohi iḋehe ḋaloha, ona manga ḋehe ma manara magena lo ma meta Ai Babaka, sababu Ngohi Una woisulo so tahino." 21So o Yesus wasitemo ḋaboloka, de Una Awi sininga asa foloisi ipeleso, de asa wotemo wosingangasu kali onaka, "Igogou-gogou o nyawa moi kanaga to ngini nia sidongirabano asa Ngohi woisiija Ai lawangika." 22Ato yoise Awi demo magegena, de Awi muri-muri imatatamiye gena yogamamu icarawa. So kanaga manga sininga ma rabaka itemo, "Ma ngale o nyawa naguuna sidago Awi demo komagena." 23De kanaga o muri moi, una o Yesus Awi dodiao widododara gena, womatamiye o Yesus Awi dateka, 24so una magenaka o Simon Petrus wisidoginano de wotemo, "Hika ngona nosano una magena naguuna." 25So una o Yesus Awi dateka, de wotemo Unaka, "Jou, naguuna done asa Ngona wonisiija Ani lawangika." 26Kagena de Una wotemo, "Nakoso o roti manena la tongadoka de towihike unaka gena, he una magena ḋabolo." So wotemo komagena ḋabolo de Una o roti moi waḋehe de wongado o lelengaku de wihike o Yudaska, una o Simon Iskariot ma ngopa. 27O Yudas waḋeheka, de kagena asa o Iblis unaka wingosa de iwipareta. De o Yesus wotemo unaka, "O kia naga ngona notetemo la naaka gena, taika la naaka kasi." 28Awi demo komagena, duma ona o meja yosigogilolino moi lo yanakowa Awi demo ma ngale ma diai o Yudaska. 29De ma sababu to ona manga manara ma pipi wisicoho unaka, so yamuruo naga imafikiri manga siningaka itemo, "Nagala una wotagi la ma ngale ngone nanga rarame ma ino woija," de ma binuka manga siningaka itemo, "Igogou, wisulo la wotagi ma ngale o pipi o nyawa isususaka wahike." 30So o roti waḋehe de o Iblis wingosaka so una womajoboka, o orasi magena he ḋaputuka. 31So o Yudas womajoboka, de o Yesus Awi muri-murika wotemo, "Kanaga o orasi manena de Ngohi o Nyawa ma Duhutu gena Ai Baba Awi simaka, de asa isimulia. De ma sababu Ngohi o Gikimoi towisigise itiai, so asa tosone, so Una magegena lo asa wisimuliaka. 32Nakoso magena taaka so o Gikimoi wisimuliaka, de lo Ngohi masirete gena dede o Gikimoi so asa Ngohi woisimuliaka, so ma cunusi de igogou magena asa waaka. 33Ngini maro Ai ngopa-ngopa tinisosininga, bilasu ngini nianako ma cunusi Ngohi dede ngini he kanena kawa. De done asa ngini Ngohi nisari duma imatero maro o kia Ngohi totetemo o Yahudi manga roririka gena, komagena lo Ngohi tinidedemo nginika, gena ngini lo niaaku waasi niakahika o riho magegenaka, kiaka Ngohi asa kagena tokahika. 34De kanaga o sulo ma demo ḋamomuane moi tinihike nginika, ena gena ngini bilasu nimatekedodara moi de moika. La imatero maro Ngohi tinidodara nginika, komagena lo ngini bilasu nimatekedodara moi de moika. 35Mutuwade de ma ngale ngini nimatekedodara moi de moika, so o bi nyawa yangodu asa yanako ngini nidadi to Ngohi Ai nyawa tinisusulo." Komagena to Una Awi gogolo onaka. 36Magena de o Simon Petrus wotemo, "Jou, kiaka notagi." So Una wotemo, "O riho kiaka kagena Ngohi totagi gena ngona naaku waasi noimote, duma done ma orasika de kagena lo ngona asa noimote kiaka Ngohi tokahika." 37"Jou, o kiaso Ngona notemo ngohi taakuwa Ngona tonimote o orasi manena. Ḋohaka, ma ngale Ngona toniriwo la ngohi bilasu ai oho tahike de ngohi lo tosanangi tomaaka komagena." 38De Una wosango wotemo unaka, "Nakoso igogou ngona notemo nosanangi nosone ma ngale Ngohi noiriwo, ce, Ngohi tonisingangasu ngonaka, sutusi o toko isore waasi, de igogou ngona asa o nyawa manga simaka nomanosu, notemo Ngohi noinakowa sidago lo ma para ma saange."

will be added

X\