Yakobus 3

1Ai dodiao nipipiricaya, upa ngini nidadala gena niadupa nidadi o guru la o nyawa niadoto. Sababu ngini nianakoka done ma orasi o nyawa yangodu manga dorou ma sopo ma fanggali yamake o Gikimoino de nakoso ngone poguru la ngone de nanga dorouka gena, Una wonafanggali nanga dorou ma sopo foloisi ḋatubuso. 2De ngone inangodu lo o sala idala paakaka. Duma o nyawa nakoso manga bicara ma rabaka o dorou moi lo ihiwa, de ona magena igogou maro o nyawa manga sininga ḋangodu itiai. Komagena lo nakoso manga bicara ḋangodu gena aku yapareta, de ona manga sininga ḋangodu lo aku yapareta. 3So komagena to ngone nanga laḋe gena itimisi duma aku ipareta ḋaputuru, maro o bobiliku ma ceceke moi duma o sapi ma ngunuka posipiliku la to ngone nanga dupa gena yamote, so o sapi ma rohe ilalamo gena aku lo papareta ḋaloha. 4Maro komagena lo o deru ilalamo moi ngaroko ma galema ma ceceke, duma o deru magena o rato ḋasosihilo de o moku-moku isipapaka lo ma galema magena aku yapareta, la imote o nyawa waaaho awi dupa kiaka wosikahika. 5So komagena ngone nanga laḋe lo, ngaroko itimisi, duma ka o demo moi lo ma kuasa ilamo so ipareta ḋaputuru. Maro idodooha lo o uku, ngaroko ma nonomaka ḋaceke, duma kanaga o ponga ilalamo lo aku yatupu. 6De lo maro o uku so ngone nanga laḋe lo aku o moi-moi yatupu. Sababu o Iblis una masirete asa nanga laḋe gena ma sigaro la pobicara ḋatorou, so o nyawa la de manga laḋe manga sininga ma rabaka gena asa ifoloisi ḋatorou. So o moi-moi manga sininga ma rabaka sidago lo o moi-moi ḋangodu yaaaka de yamamake manga oho ma rabaka gena, ḋangodu lo ḋatorou. 7Iḋoḋoma sidago lo o orasi manena o bi haiwani ilalago, de o bi namo isososo, de o bi haiwani itatase o dududuka de lo o bi moi-moi o teoka iooho gena moi-moi ḋangodu o nyawa aku yapalihara. 8Duma o nyawa lo yaakuwa manga laḋe yapareta. Ngone nanga laḋe gena o dorou isibicara imatoguwa, komagena lo iholu ngone papareta. De lo o bicara ḋatotorou gena iwedoka so o nyawa pasisangisara, maro o raci so o nyawa pasisone. 9De to ngone nanga laḋe gena asa o Jou Una nanga Baba Awi ronga posilamo. De o nyawa lo Una wosidadika de manga jamani gena imatero de ka to Una, duma de to ngone nanga laḋe lo o nyawa manga ronga asa pogaka ḋatorou. 10So komagena lo to ngone nanga uru ka ngai moi, duma kanaga lo bai o ronga posilamo bai lo o ronga pogaka ḋatorou. Ce! Magena itiaiwa. He! Ai dodiao nipipiricaya, o kia naga maro komagena, gena isala so bilasu paholu. 11Sababu o ake ma jobubu ngai moi nogenano yaakuwa o ake de o teo lo isupu. 12De lo o bole ma hutuno yaakuwa ma sopo o igo lo ioho, de lo o igo ma hutuno yaakuwa ma sopo o bole lo ioho. Komagena lo o sumu ḋatotorou yaakuwa isupu o ake ḋaloloha. Magena maro o goginano moi ngoneka, so ma orasi ngone posumbayang de o Gikimoi Awi ronga posilamo ḋaboloka, de upa ngone gena asa o nyawa lo manga ronga paaka ḋatorou. 13Ai dodiao nipipiricaya, ngini kanaga nimuruo naga asa niacawaro ḋaloha de lo nianako o loha moi-moi maro o kia la bilasu paaka de o dorou moi-moi maro o kia la upa paaka. So ngini bilasu o loha moi-moi niaaka de niasikelelo gena to ngini nia sininga ḋamuuḋu o nyawaka so igogou ngini nicawaro. 14Duma kanaga ngini nia sidongirabaka la nakoso o nyawa manga siningaka de o nyawa yalalago asa yaholu de yadoosa ifoloi, de manga dupa gena ma ngale ka ona masirete imasihie de foloisi imasilamo de o nyawa ma binuka, upa lo o nyawa ona magena yotemo, "Ngohi manena o nyawa tococawaro moi." Nakoso manga bicara komagena, ona magena asa ka yokulai so yamotewa o dodoto itotiai. 15So nako ngini la o moi-moi maro komagena niaaka, de o cawaro magegena upa nitemo isupu ma sihino o Gikimoino, duma magegena asa isupu ma sihino o nyawa manga sininga ḋatotorouno de lo o tokano. 16So ma orasi o nyawa la kanaga o nyawa yalalagoka yaholu de yatoosa, de lo manga ngale gena ka ona masirete imasihie de foloisi imasilamo de o nyawa ma binuka, de kanaga lo asa imarimoi kawa so imatekesikoholu de lo ka yaaka maro o moi-moi ḋangodu ḋatotorou. 17Duma nakoso o cawaro ma sihino o Gikimoino la wonahike ngoneka, de ngone nanga sininga ma rabaka asa ibolowo de o dorou moi lo ihiwa. So to ngone nanga oho o dame ma rabaka, sababu ngone asa o nyawa pagalusiri de nanga sininga asa ḋamuuḋu la o nyawa manga dupa lo posigise ḋaloha. De o nyawaka lo asa ngone o loha moi-moi idala paaka onaka. De lo ngone asa upa o nyawa pohihiri sidago moi pasitubuso de moi pasiguui, de lo nanga demo o nyawaka asa igogou de itiai. 18So nakoso ngone la kanaga de nanga sininga ḋamuuḋu o nyawaka la o dame de o sohi posigokoka, gena asa ma dodoguka o moi-moi paaka itotiai de ḋaloha. So maro o goho moi la o doroka yadato asa ioho de ma dodoguka lo asa isopo ḋaloha.

will be added

X\