2 Korintus 9

1Igogou, o kia naga moi ma ngale o roriwo o pipi o Gikimoi Awi nyawa o Yerusalemka gena ngohi upa he tinidelefo nginika. 2Sababu ngohi tanako ḋaboloka, kanaga to ngini nia gaeli gena foloisi ḋaputuru la ona niariwo, de nia giliri tosimane ḋabolo o Makedonia ma nyawaka. Ngohi totemo onaka, "Nanga dodiao ipipiricaya o Akhayaka ona magena o taungu ipapasaka isidailako ḋabolo so manga roriwo o pipi gena yahikeka." De ngini nia sininga ma loha la nihike gena ona yoiseka, de ona o Makedoniaka yasigaro la yadadala lo yomode o roriwo o pipi yohike. 3Ngaroko komagena, ka ḋaloha o Titus de ma dodiao yasinoto ona magena ngohi tasulo la ikahika iḋoma nginika, ma ngale ona ngini iniriwo la nia roriwo o pipi gena niaaturu. So ngohi tongongano done ma orasi tomasidiado nginika, de ngini nia aturu ḋaboloka, maro ngohi totemo ḋabolo o Makedonia ma nyawaka. Upa sidago ai demo kiaka nia giliri tosimamane gena ka ma demo bato. 4Sababu nagala o Makedoniaka ma nyawa asa ngohi imote done ma orasi ngohi tahika nginika, de nakoso ngini nia roriwo o pipi gena niaaturu waasi de, awadede, ngomi asa de mia maḋeka de komagena lo ngini nimaḋe, sababu ngohi iḋomaka nia giliri tosimane ḋaboloka. 5Komagena so ngohi tosininga ka ḋaloha ona yaruwange tasulo la ikahika iḋoma nginika, ma ngale ngini nia roriwo o pipi kiaka o ngongike nijajajika gena ona aku yaaturu. Komagena taaka la ma orasi ngohi tahino de ḋangodu magena asa isidailako ḋabolo, de isikelelo nia roriwo o pipi gena kanaga nihike de nia sininga isosanangi, upa de nigegego. 6Niosininga o demo manena: O nyawa la kanaga yodato ma cunu, done ma sopo lo asa ka ma cunu. De o nyawa la kanaga yodato ilamo, done asa ma sopo lo ka ilamo. 7Ngone o nyawamoi-nyawamoi bilasu pahike de nanga sininga isosanangi, maro o kia naga iḋomaka ngone pasitatapu ḋaboloka. Upa pohike de nanga sininga ḋatubuso de upa lo ka ma ngale inasulo sidago ngone posininga bilasu pahike. Sababu o Gikimoi wadodara o nyawa kiaka kanaga yahihike manga sininga de ma nalika. 8De o Gikimoi de Awi kuasa aku ngini winidogo o bi moi-moi ḋaloloha gena ḋangodu, so nginika o kia naga ikurangi gena ḋangodu niamake sidago nia kurangi moi lo asa ihiwa. La o bi loha moi-moi gena ḋangodu ngini aku niaaka ma ngale o nyawa niariwo. 9O nyawa la kanaga yahike de manga sininga ḋaloloha imatero maro o kia naga isilelefo o Gikimoi Awi Jaji ma Buku ma rabaka itemo, "O Gikimoi de Awi sininga ḋaloloha wahike o nyawa isususaka, Awi sininga ma loha gena ma bati lo ihiwa." 10O Gikimoi o gisisi wonahike ngone pototoroka de lo o doro ma sopo wonahike maro nanga ino. So komagena lo igogou Una asa o kia naga de maena nginika gena wodogo, sidago ngini aku nifoloi la niahike kanaga o nyawa de manga kurangika. 11De o ngeko moi-moi idala o Gikimoi asa ngini winihike de ma boloili la ngini aku de nia sininga foloisi ḋaloloha niahike o nyawaka. So done ma orasi to ngini nia roriwo o pipi gena ngomi miatota o nyawa isususa o Yerusalemka, de o nyawa yadala asa manga sukuru yatide o Gikimoika. 12To ngini nia roriwo o pipi nihihike gena upa cawali o Gikimoi Awi nyawa yariwo, duma magena ma ngale lo o nyawa yadadala asa manga sukuru yatide o Gikimoika. 13Sababu ma orasi ona magena to ngini nia roriwo o pipi gena yakelelo, de ona asa o Gikimoi iwigiliri. Sababu ona asa aku yakelelo igogou ngini o habari ḋaloloha ma ngale ma Kristus gena niopiricaya de lo niosigise, sidago lo de nia sininga ḋaloloha niahike onaka de lo o nyawa ma somoaka. 14De ma ngale ngini gena ona de manga sayangi ilamo so isumbayang, sababu kagena nginika kanaga o Gikimoi Awi laha ilalamo gena imanara foloisi ḋaputuru. 15Hino la ngone nanga sukuru patide o Gikimoika, sababu igogou to Una Awi ngongike gena ḋaloha icarawa.

will be added

X\