1 Tesalonika 3

1So kagena de ngini de ngomi pomakitingaka gena miapohawa, so ngomi misitatapu o Atena ma kotaka de ngomi bilasu kagena migoge 2la miwisulo o Timotius wotagi wakahika nginika. Una magena mia dodiao o Yesus wipipiricaya de o Gikimoi wileleleani so o habari ma ngale ma Kristus wosihabari. De una miwisulo la wakahika nginika ma ngale nia sininga wosiputuru. So ngini ma Kristus niwipiricaya foloisi ḋaputuru, 3ma ngale ma orasika done o nyawa inisisangisara, de ngini o nyawa moi lo upa he o habari ḋaloloha niodongosa. O Gikimoi Awi dupa ma ngale ngoneka la o nyawa done inasisangisara gena, ngini masirete nianako ḋabolo. 4Sababu ma orasi ngomi kagenasi nginika de o nyawa inasisangisara waasi, so ngomi minisingangasu iḋoma nginika gena done asa igogou imaaka ngoneka. So ngini nianako ḋaboloka de komagena igogou so asa ngone lo inasisangisara ḋaboloka. 5Ngone pomakitingaka de ngohi he tapoha kawa, so towisulo la o Timotius wakahika nginika ma ngale ai edekati gena bilasu tanako nakoso igogou ngini o Yesus niwipiricaya ḋaputurusi. Sababu ngohi tohawateri upa sidago o Iblis ngini inibaja ḋaboloka so o Yesuska niwipiricaya kawa, so to ngomi mia manara ḋatotubuso gena ma faida de ma sopo lo ihiwa. 6O Timotius kadoka nginika de o orasi manena asa woliho ngomino de o habari ḋaloloha ma ngale ngini gena womisingangasu. Komagena womisingangasu la ngini niadupa gena ma Kristus niwipiricaya ḋaputuru de o bi nyawa yangoduka niadodara. De lo o orasi isigeto-geto asa nimisosininga ngomi, so maro kia to ngomi mia dupa komagena lo ngini nia dupa foloi ḋaputuru la aku pomakamake kali. 7Mia dodiao nipipiricaya, sababu ngini gena asa ka o Jou Yesuska niwipiricaya ḋaputuru so ngomi kanena lo, ngaroko mia susa ilamo de lo o nyawa asa imisisangisara, duma mia sininga ma rabaka lo aku de ma buturusi. 8So nakoso ngini nimasigocohosi la o Jouka niwipiricayasi, de o orasi manena ngomi de mia sininga ma rabaka aku isanangi de ḋanali so foloisi ḋaputuruli. 9Komagena so ma ngale ngini gena to ngomi mia nali de mia more he ka ilamo poli, sidago lo mia sukuru miatitide o Gikimoika gena, ngaroko ilamo, duma magena lo yaado waasi. 10De mia sininga igogou so mia sumbayang misidadu-dadu ma ngale aku ngomi de ngini pomakamake kali de lo o bi dodoto, o moi-moi o kia minidoto waasi gena, aku minidotoli ma ngale nia piricaya ma dogo o Gikimoika. 11So ngomi migolo tanu o Gikimoi nanga Baba Una masirete de lo nanga Jou Yesus asa o ngeko moi isidailako ma ngale ngomi aku miahika kali nginika. 12De lo migolo tanu o Jou asa winiriwo la maro ngomi minidodara ngini, so ngini lo nia dodara ifoloisi idogo de ḋaputuru la nimatekedodara moi de moika sidago lo nia dodara magena o bi nyawa yangoduka. 13Komagena so tanu winiriwo la nia sininga asa wosiputuru kali so ma orasi o Jou Yesus wahino kali dede to Una Awi malaikat yatetebi, de nanga Baba o Gikimoi Awi simaka asa ngini nia sininga lo ḋatebi de o nyawa moi lo akuwa nia sala yamake.

will be added

X\