1 Korintus 8

1De nako ngini nia sano-sano ma ngale o ino la kanaga isisuba o serika gena, ngohi tosango komanena. Igogou, ka idadi ngone potemo panakoka o Gikimoi Una magena ka womatengo de o bi giki ma somoa moili gena ihiwa. Ngaroko komagena, nakoso potemo ngone o kia naga moi ka panako ḋaloha, de magena ngone aku pomasihieka. Duma nakoso padodara, de nanga sininga ma meta cawali de o dodara ma ngale o nyawa manga sininga aku posiputuru. 2O nyawa nagoona la kanaga itemo o kia naga moi lo ka yanako ḋaloha, ona magena igogou itotiai yanako waasi. 3Duma o nyawa nagoona la kanaga igogou o Gikimoi iwidodaraka, ona magena manga sininga ma raba gena o Gikimoi lo wanako. 4Mutuwade, nako o ino la kanaga isisuba o serika gena, ngone potemo igogou aku o ino magena ka pooḋo, sababu panakoka o Gikimoi Una gena ka womatengo de o dunia ma rabaka o bi giki ma somoa gena ihiwa. 5O nyawa yasusuba gena kanaga o bi moi-moi ka idala, gena itemo bai o bi giki de lo o bi gurumi, kiaka o dipaka eko lo o tonaka. 6Duma ngone popipiricaya gena ka panako igogou o Gikimoi gena ka womatengo. Una magegena nanga Baba o bi moi-moi o duniaka gena ḋangodu wosidadadika, de to Una Awi giliri gena kanaga ngone nanga oho ma gaalu. De igogou lo o Jou ka womatengo, ena gena o Yesus Kristus. Una magena o Gikimoi asa wisulo la Una waaka so o bi moi-moi ḋangodu aku idadi, de lo sababu Una magena, so ngone aku o oho ka sidutu ikakali pamake. 7Ngaroko komagena, duma o nyawa ipipiricaya kiaka magena lo yanako itotiai, ona magena yangoduwa. Ma binuka gena ma orasi ma Kristus wipiricaya waasi, de kanaga ona magena yodupa o bi serika yosuba. La sidago o orasi manena naga gena nakoso o ino o gaso isusuba o bi serika la yamake, ma ngale o ino magena ona manga sininga ma rabaka itemo, "Magena o seri ma ino bai!" So nakoso ona la o ino magena yaoḋo, ona yamalo manga sininga ma rabaka igogou o dorou yaakaka, sababu manga siningaka gena manga piricaya he ḋaceke. 8Igogou, o ino o kia bato la nako pooḋo gena, idadiwa yaaka ngone dede o Gikimoi pomakadame eko pomakitinga. Nakoso o ino la kanaga pooḋo eko paholu, magena o Gikimoi wanano maro ma faida ingaliwa so ka imaketero. 9Ngaroko komagena, ngini lo bilasu nimasidodiahi. Upa sidago o nyawa ona magena manga piricaya ḋaceke so o dorouku yotura, ma sababu ngini gena kanaga nia siningaka nianako igogou ka ḋaloha so o ino magena paoḋo. 10Nako nimasidodiahi gena, hika tosiade-ade. Nakoso o oḋo ilalamo o seri ma tahuka, de ngini nianako igogou ka ḋaloha la o seri ma ino magena paoḋo, so kagena nitagi la nioḋo. Kagena done o nyawa moi, awi piricaya ḋaceke, una magena kanaga winikelelo so una lo wobarani o ino magena waoḋo. 11Ma duuruka, de ma ngale o kia naga nianakoka so asa to una awi piricaya yasisaka, sababu o kia naga wamalo ḋatorou la ngini niaaaka magena una wamote, duma una magenaka lo ma Kristus wosoneka. 12Nakoso de nanga manara komagena so nanga dodiao manga piricaya ḋaceceke gena manga sininga paaka so ḋasirika, de ngone lo o dorou paaka ma Kristuska. 13So nakoso o ino ngohi taoḋo de komagena ngohi ai dodiao ipipiricaya kanaga o dorouku tasitura, de upa sidago o ino magegena ngohi tooḋoli. So tasitura gena ngohi toholu bai!

will be added

X\