1 Korintus 7

1Ngini ai dodiao nipipiricaya o Korintuska, iḋomaka de nia sano-sano gena o surati ma rabaka nilefo ngohika, so o orasi manena ngohi asa todupa tinisango. Ma nonomaka, ngini nisano idodooha, ka ḋaloha nakoso o nyawa ipipiricaya gena kanaga ikawi, eko hiwa. De ngohi tosango, foloi ḋaloha nakoso ikawiwa. 2Duma ifoloi ḋaloha nakoso yanau moi-moi de ma peḋeka masirete de lo o ngopeḋeka moi-moi de ma roka masirete, la upa yabaja o nyafusu ma dorou yaaka. 3O roka moi bilasu womote ma peḋeka ami dupa gena ona imasikiidu, de komagena lo ma peḋeka. 4Sababu ma peḋeka ami rohe gena upa ka muna mapareta, duma kanaga ma roka lo wapareta. De komagena lo ma roka awi rohe gena upa ka una wapareta, duma kanaga ma peḋeka lo mapareta. 5Upa ma roka de ma peḋeka imakitinga so imasikiidu kawa. Ka cawali ona imakomote ḋaloha la imatinga upa iteka, ma ngale o orasi yamake la ona yasinoto aku isumbayang. Duma isumbayang magena ḋaboloka, de ona bilasu iliho imarimoi kali. Sababu ma duuruka upa sidago manga nyafusu gena yapareta yapohawa, de o Iblis aku wabaja so ona o nyafusu ma dorouku yotura. 6To ngohi ai demo magenena o sulo ma demo ḋasowo, duma koloko o hakasonyinga moi so o simaha ma demo gena, ḋadoohawa, nakoso ma roka de ma peḋeka imakomote la imatinga, hitilahi o orasi ma cunu. 7Igogou, lebelaha o nyawa yangodu upa he ikawi, imatero maro ngohi. Ngaroko ngohi tosanangi komagena, duma tanako igogou o nyawamoi-nyawamoi kanaga de manga kia naga moi eko manga gogaho masirete o Gikimoi wasicatuka. So ma binuka yaaku sidago ma orasi yosone gena, upa he ikawi, duma ona ma binukali yaakuwa so bilasu ikawi. 8De nako yanau la ikawi waasi, de lo o ngopeḋeka yobabalo ona magenaka, to ngohi ai demo gena komanena: Lebelaha upa ona ikawi, imatero maro ngohi. 9Duma nakoso ona manga nyafusu yapareta gena yaakuwa, bilasu ona ka ikawi. Sababu de manga nyafusu irama gena, ifoloi ḋaloha ona ikawi. 10De nako o nyawa ikawi ḋaboloka, ona magenaka ngohi tosulo o kia naga moi, ena gena o Jou Yesus Una masirete wodedemo iḋomaka, wotemo o ngopeḋeka bilasu upa ma roka mowidongosa. 11Duma nakoso kanaga o ngopeḋeka moi ami roka mowidongosaka, de muna magena bilasu momasiroka kawa. Nako komagenawa, de muna bilasu momakiliho ami rokaka. De o roka bilasu upa ma peḋeka womidongosa. 12De nako o nyawa ma binuka ona magenaka, upa o Jou Awi demo, duma to ngohi ai demo masirete gena komanena: Nakoso o nyawa wopipiricaya moi kanaga de ma peḋeka gena mopipiricaya misowo, duma muna modupa de ma roka imatekesikogoge o tahu moi, de una magena womitinga gena he idadi kawa. 13Komagena lo nakoso o ngopeḋeka mopipiricaya moi kanaga de ma roka gena wopipiricaya wisowo, duma una wodupa de ma peḋeka imatekesikogoge o tahu moi, de muna magena mowitinga gena he idadi kawa. 14Sababu ma ngale ma peḋeka o Jou Yesus mowipiricayaka so ami roka, ngaroko wopiricayawa, duma una magena o Gikimoi asa winano ḋaloha. Komagena lo ma ngale ma roka o Jou Yesus wipiricayaka so awi peḋeka, ngaroko mopiricayawa, duma muna magena o Gikimoi asa wominano ḋaloha. Nako komagenawa, de igogou to ona manga ngopa o Gikimoi asa ka wanano ḋatorou, imatero maro o nyawa ipipiricayawa manga ngopa. Duma to ngini nia ngopa magena igogou o Gikimoi asa wanano ḋaloha, sababu manga dodihimo imatengo kanaga de manga piricayaka. 15Duma nakoso o nyawa ipipiricayawa kanaga de manga edekati la manga peḋeka eko manga roka ipipiricayaka magena yadongosa gena, bilasu ka niaḋohaka. Nako komagena, de ma roka eko ma peḋeka ipipiricaya manga kawi magena he yapalakoka. O Gikimoi wodupa la ma ngale ngone pogoge ka o dame ma rabaka. 16Sababu ngone panakowa, nagala o ngopeḋeka mopipiricaya done aku ami roka mowingaho so una lo wopiricaya de wisalamati, eko o roka wopipiricaya done aku awi peḋeka womingaho so muna lo mopiricaya de mosalamati. 17Ka cawali maro kiaka bato o Jou wositatapu o nyawamoi-nyawamoika, ma orasi ipapasaka o Gikimoi o nyawa moi-moi waaso so wipiricayaka, ka komagena lo bilasu ngone inangodu podupa paaka. Ai sulo magena ngohi todoto o bi gogobu moi de moika. 18Hika tosiade-ade, nakoso o Yahudika ma nyawa ma orasi o Gikimoi waaso so ma Kristus wipiricayaka, ona magena manga Yahudi ma nonako, ena gena manga suna, upa he yasisa. Komagena lo nakoso o nyawa kanaga imasuna waasi ma orasi o Gikimoi waaso so ma Kristus wipiricayaka, ona magena upa he imasuna. 19Sababu o Gikimoi Awi simaka bai pomasuna de pomasunawa gena, ḋadoohawa. Duma Una wanako itiai cawali nanga sigogise to Una Awi sulo moi-moi gena kanaga ngoneka. 20So ngini moi-moi bilasu nia oho ma rabaka gena maro iḋomaka, ma orasi o Gikimoi winiaso so ma Kristus niwipiricayaka, so kagena nigoge de upa he niatagali. 21Nakoso koloko ngini kanaga nigogilalo de o Gikimoi winiaso so ma Kristus niwipiricayaka, upa he nia sininga isusa. Magena ḋadoohawa. Duma nakoso ma dongoho niamake la aku nidadi nipalako, de hika nidadi nipalako bai! 22Igogou, ona la kanaga yogogilalo ma orasi o Jou waaso so ma Kristus wipiricayaka, ona magena ngaroko yogogilalo, duma manga dorouno o Jou Yesus asa wapalako. De lo ona la kanaga yogogilalowa ma orasi o Gikimoi waaso so ma Kristus wipiricayaka, ona magena yodadi maro yogogilaloka sababu ma Kristus iwileleani. 23Ngini gena o Gikimoi winiijaka so wofangu lo ḋaboloka. Komagena so hika o nyawa manga dupa gena upa ngini niamote, maro nigogilalo. 24So, ai dodiao nipipiricaya, ma orasi o Gikimoi ngini winiaso so ma Kristus niwipiricayaka, o kia naga moi-moi nia oho ma rabaka gena upa he niatagali, sababu ngini kanaga nimakangaho dede o Gikimoi. 25De nako ngini nia sano-sano ma ngale o nyawa ikawi waasi gena, iḋomaka o Jou Yesus Awi sulo moi lo ihiwa. Duma ngohi ai sitiari masirete gena asa tinisingangasu nginika. Ai demo manena aku niopiricaya itiai, sababu ngohi gena o Jou woigalusiri so woisitatapu maro Awi sosulo moi. 26So to ngohi ai sitiari gena komanena: O orasi manena de ngone popipiricaya gena asa o sangisara idala pamake, so lebelaha ngone nanga oho ma rabaka gena upa he patagali. 27Hika tosiade-ade, nakoso ngini kanaga nimasipeḋeka ḋaboloka, de upa o ngeko nisari la nimakitinga. De nakoso ngini kanaga nimasipeḋeka waasi, de upa o ngeko nisari la nikawi. 28Duma nakoso yanau wodupa womasipeḋeka, gena o dorou ḋasowo. De nakoso o jojaru moi de modupa momasiroka, ma ngale muna magena lo o dorou ḋasowo. Duma o nyawa la kanaga ikawika, ona magena done asa o sangisara ka idala yamake. De ngohi todupa o sangisara gena tinisirese la upa he nidahe. 29Ai dodiao nipipiricaya, to ngohi ai ngale gena komanena: ngone nanga orasi ma deka gena he ikuru kawa. So o orasi manena de isikahika gena o nyawa ikakawika, ona magena bilasu upa yosininga cawali manga peḋekaka eko manga rokaka. 30De o nyawa la kanaga idodora, ona magena bilasu upa yosininga cawali manga sininga ma belesoka. O nyawa la kanaga isanangi, ona magena bilasu upa yosininga cawali manga sanangika. O nyawa la o kia naga yaija, ona magena bilasu upa yosininga cawali manga alamu moi-moika. 31De o nyawa la kanaga isidogosa manga oho o dunia manenaka yasari, ona magena bilasu upa yosininga cawali manga oho magena. Sababu itekawa de o dunia o orasi manena asa isisa. 32Ngohi tongongano gena ngini nia sininga magena he isusa kawa. O nyawa moi la kanaga womoḋoka waasi, una magena wodupa wosininga cawali o Jou Awi manara gena idodooha aku o Jou iwisisanangi. 33Duma o nyawa moi la kanaga de wipeḋekaka, una magena bilasu wosininga awi oho o dunia manena ma rabaka gena idodooha aku ma peḋeka womisisanangi, 34so awi sininga gena asa ngai sinotoka. Komagena lo o ngopeḋeka moi nakoso kanaga momoḋoka waasi eko mojojojarusi, muna magena modupa mosininga cawali o Jou Awi manara gena idodooha aku ami rohe de ami sininga lo ka ma ngale o Jou Awi dupa gena maaka. Duma o ngopeḋeka moi la kanaga momoḋokaka, muna magena bilasu mosininga ami oho o dunia manena ma rabaka gena idodooha aku ma roka mowisisanangi. 35Magena tolefo nginika, upa de ma ngale ngini bilasu niholu nikawi maro tinipilikuka, duma ka ma ngale ngini gena ngohi tinisitiari. Upa sidago o kia naga moi lo inifati so ngini niaakuwa o Jou niwileleani itiai de ḋaputuru. 36Duma tosiade-ade, maro kanaga yanau moi imabobaika, de una wotemo ma ngale muna magena waakuwa awi nyafusu wapareta, sidago wamalo ona bilasu ikawi. Nako komagena, de igogou awi dupa gena bilasu wamote la ona ikawi kasi, de magena o dorou ḋasowo. 37Duma nakoso kanaga o nyawa moili wobobaika de una wotemo, "Upa he ngohi tomasipeḋeka," gena upa lo o nyawa ma somoa manga demo duma ka to una awi demo masirete de lo ka waaku awi nyafusu wapareta ḋaloha, de ka ḋaloha la una asa upa wokawi. 38So una la kanaga o jojaru moi womasipeḋekaka, de igogou o loha moi waaka. Duma una moili la kanaga wokawiwa, sababu o orasi manena naga o sangisara kanaga idala, so una magena asa waaka foloisi ḋaloha. 39O ngopeḋeka moi momasirokaka de ma roka gena ka woohosi, de muna magena momapiliku unaka. Duma nakoso ma roka wosone, de muna gena mipalakoka so aku momasiroka yanau moili naguuna mowidudupa, hitilahi una magena o Jou wipipiricaya moi. 40Duma nako ngohi gena, muna magena nakoso mokawi kawa, de asa ami sininga foloi isanangi. Ngaroko magena ka to ngohi ai sitiari masirete, duma ngohi tamalo magena tositemo sababu igogou ngohi lo asa kanaga de o Gikimoi Awi Gurumi ma kuasa.

will be added

X\