1 Korintus 13

1Hika tosiade-ade. Ngaroko ngohi kanaga o dunia ma nyawa manga bahasa de lo o malaikat manga bahasa irupa-rupa o Gurumi Ḋatetebino gena aku tosibicara, duma ai dodara o nyawaka gena ihiwa, de to ngohi ai demo moi-moi gena ḋangodu asa ma faida ihiwa. So ai demo moi-moi gena kanaga imatero maro ka o lipa eko o gosoma ma ili iḋoḋo-ḋoḋo gena ma ngale lo ihiwa. 2De ngaroko ngohi lo kanaga o Gikimoi Awi demo aku tosingangasu, de sininga ma kanako o Gikimoino gena ḋangodu tamakeka sidago lo o bi moi-moi kiaka o nyawa yananakowa gena ḋangodu ka tanako, de lo ai piricaya ḋaputuru sidago lo o tala moi aku tosulo imasituluru, duma ai dodara o nyawaka gena he ihiwa, de to ngohi ai oho gena asa ma faida ka ihiwa. 3De lo ngaroko ngohi kanaga ai arata ḋangodu tahike o nyawa isususaka de lo ma ngale o Jou Yesus towipiricaya so ngohi ai rohe tahike la o nyawa aku yatupu, duma ai dodara o nyawaka gena he ihiwa, de ngohi ai oho gena asa ma faida ka ihiwa. 4O nyawa la kanaga o nyawa ma somoa yadodara, ona magena manga sabari ilamo de lo manga sininga ḋaloha. Ona lo kanaga o nyawa yaduhuduwa, manga giliri masirete isimanewa, de lo imasihiewa. 5Ona lo kanaga o nyawa yasimaḋewa, imasilamo ifoloiwa de o nyawa ma binuka, ḋataiwa yatoosa de lo o nyawa ona yatotorouka gena yaetowa. 6O nyawa la kanaga o nyawa ma somoa yadodara, ona magena nakoso o gogoho ḋatorou yakelelo gena yosanangiwa, duma nakoso o gogoho itiai yakelelo gena asa yosanangi. 7O bi moi-moi la kanaga idadadi ḋangodu manga oho ma rabaka gena, ona ka yapoha. Ma ngale o nyawamoi-nyawamoi gena ona ipiricaya ḋaputuru de lo ingongano ḋaputuru. So o sangisara moi-moi gena ḋangodu ona aku yamoku. 8O dodara gena ma bati lo ihiwa de lo magena idadiwa isisa. Ngaroko kanaga o cocatu o Gikimoi Awi demo yosingongangasu, duma magena o orasi ma simaka done asa isisa, sababu Awi demo ḋangodu gena done wosiganapu. De ngaroko kanaga o cocatu o bi bahasa irupa-rupa yosibobicara, duma magena o orasi ma simaka done asa isisa, sababu done upa he yosibicara. De lo ngaroko kanaga o cocatu sininga ma kanako o Gikimoino, duma magena o orasi ma simaka done asa isisa, sababu o bi moi-moi ḋangodu done ka panako so upa he o nyawa yadoto. 9Sababu, o orasi manenaka, nako o bi cocatu sininga ma kanako o Gikimoino eko Una Awi demo posingongangasu gena, ḋangodu kanaga de ma bati. 10Duma ma orasi done imasidiadoka, de o Gikimoi o bi moi-moi ḋangodu wosiganapu ḋaasu-asu so itiai ḋangodu, de asa o bi cocatu magena ma bati yaado so ka isisa. 11Hika tosiade-ade, ma orasi iḋomaka ngohi ka o ngopa moi ka iecesi, de ngohi tobicara maro ka o ngopa, de ai sininga lo maro o ngopa ma sininga de lo ai tagapi maro ka o ngopa ma tagapi. Duma o orasi manena ngohi kanaga ilamoka, so o ngopa ma manara gena ngohi taḋoha so taaka kawa. 12O orasi manenaka o kia naga ngone pakokelelo gena imatero maro o nyawa moi kanaga awi bio o kasinangaka wanano duma ḋamarasa. Duma o orasi ma simaka ngone done asa pakelelo itiai, imatero maro o nyawa imarisimano so imatekekelelo. O orasi manenaka o kia naga ngohi tanako gena de ma bati so ḋaasu-asu waasi, duma o orasi ma simaka done ngohi asa o bi moi-moi ḋangodu tanako igogou, imatero maro o Gikimoi ngohi woinako igogouka. 13So o bi cocatu gena ḋangodu done asa isisa, duma o kia naga de ma bati ihihiwa gena kanaga ngai saange la bilasu paaka: ena gena, o piricaya o Gikimoika, o ngongano Awi jajika, de o dodara o nyawaka. So kagena ngai saange ma rabaka o kia naga foloisi ilalamo de ḋaloha icarawa gena o dodara o nyawaka.

will be added

X\