aLuka 10

1Nama anong, aYeso kasa ner isk kanataar be afa nong a t ku tom ba afufa afufa nashn wu ye ru tseng kayr koakye kuwp be ni nar wu tana tseng cicr. 2A f be ba ye, Ishamang kuse didng, amma fe itomong'e se hiir. Kamok anong nye yin aduwa nong atek rik'me tin barang fe a tana ku nye itomong ishamang'e. 3Tseng yin! Mi sen ka tos yin kyndi tsamang ta se kayr gabu katse. LB00011b.tif Horace Knowles; The British & Foreign Bible Society Itsamang be gabu katse 4Sang tu be yin ishika itsm ka ishika ares ka kpatak akak zr ba, tu nye yin ashou asp niren ba. 5Koakye kasa ne yin n yin f yin ye, Maleku yin, fekari. 6Ke aner a ta shim kameneng riy tuse azong, a ta s nufe yin, ke anong ba, a t s ba. 7Sor yin nasa kayong, ne i ya ne i s yin koakye ne ta ka nk yin, kamok i se gyr ke aner a ta nye itomong ta s ishorong wu. Sang tu yiir shishing yin nasa ba. 8Koakye kuwp ne yin tseng yin ke ta shan yin be riy rikan, ne i ya yin koakye ne ta ka nk yin. 9Sak yin fe irk ta se azong ta te atser, ne i tak yin fe kuwp'e ye, Rigwm Adakunom m b bubarak. 10Amma kuwp kuya ne yin n yin ke ta shan yin be riy rikan ba, ne i tseng yin nanu iren kayr kuwp'e ta se f yin ye, 11Iwur kuwp yin iya i tin ngarak natak yir gip, yir ta waar yin'e. Amma ren yin ye, rigwm Adakunom m b bubarak. 12Won ta ka tak yin, i ta ra kuse be kuwp aSodom katuk amok'ong be kuwp kuyong. 13Aw be kuwp aKorasi! Aw be kuwp aBatseda! Ke a fa f ye a nye kuri ikr azhing a t nye nufe yin na aTaya be na aSidon ke shishing kuse ba gbugbang, ne sosok be agyr ares ne korok itong nace. 14Amok Adakunom tana t aTaya be aSidon'e ta ra kuse ne a nar afe yin katuk amok'e. 15Wan, aKapanum, wan di ye a t ka tiyiik ne a nar ribir'e a? Wayo, a t ka barak tsik kayr kar kaya fe a t kus t ku se. 16Aner aya a ta ka fok yin kuto, i nye ye a ti fok. Aner aya a ta ranyin, i nye ye a ti ramin. Aya a ti ramin, i nye ye a rawu aner aya a tin tom. 17ner isk kanataar be afa'me t bun be riy rikan nong t se f be aYeso ye, Atekasa, tseng gip i ti fok yir kuto ke yir yis yir riyerek wan. 18Ayong aYeso f be ba ye, Mi di Ishetan ta samang a ta kpa ni itsik wu kyndi iza ta tarang kar. 19Mi ma ka nk yin kukyem nong ta tseng yin natoon when be nyng, ne i ya yin agap amudn yin, Ishetan. Ka ikng ikak imaan'e ta ka man yin ba. 20Gip be anong, tu nye yin riy rikan kamok tseng t ka fok yin kuto ba, nye yin riy rikan kamok an zibir ayerek yin kayr kaza. 21Nizen iyong aYeso n shining be Kabik Kazhl'e yong a f ye, Mi be riy rikan be wan, Ada agbang, Agwm gwm, wan afe i t nye kaza be kaben, kamok wan nr ya a t be kukyem ne ya a t ren ikng natoon ikr na nong i ta tonong ya a ta se kyndi inoon zhizhk. I se gyr anong, Ada, kamok iyong ne i nye kushim riy wan. 22Ada, mi n won koakye nubk wan. Akak ren Igon'e ba, ma Ada'me tsek. Akak ren Ada'me ba, ma Igon'e be ya Igon'e ta shim a tu ku ren ba. 23Ayong aYeso kirik nufe limazhiri wu nong a ta f be ba kyn nukim ye, ner riy rikan nye ya a ta di ikr ife yin ta sen yrk yin'e na. 24Won ta ka tak yin, ner kuzarap Adakunom be gwm whr shim ke yrk ikr yin ta sen yrk yin'e na, amma kyem di ba, ne shim ke foos ikr yin ta sen foos yin'e na, amma kyem foos ba. 25Katuk kakak, aner akak a t ren Itsi aMusa didng dorok nong a t bmng aYeso be kurip ye, Aner Kubsp, aky ne mi ta nye nong ta s kutser kufe izen izen ? 26Ayong aYeso f be wu ye, Aky ne i se ni izibir kayr Itsi aMusa ? Itsi'me f an ? 27Ne aner ame f ye, Shim Agwm gwm wan Adakunom wan be riy wan cei, be kutser wan cei, be agap wan cei, ne kutrng wan cei, ne i shim afegbak wan kyndi wan ta shim rice wan. 28Ne aYeso f be wu ye, Ikng wan t f se gyr. Ke wan nye anong, wan ta s kutser. 29A shim ke a tonong ye wu se gyr nashn Adakunom, ayong a rip aYeso ye, T, angan ne a nye afegbak'i ? 30Ayong aYeso t tak kumaas na ye, Aner akak dorok na aUshalima, a dorok a tisik a be na aZheriko. Ayong a gor a nyim be gbang kpatang kak, turung ares wu ne mu ku nye amaan atsor, nong t ma ku won azong kyndi kukom. 31Nizen iyong atsi akak sen tisik iren iyong gip, a t fa di aner ame ne a faas a t tseng akn wu. 32Anong ne aner aLawi akak gip, a t fa b nar'me, a t ku di ne a faas a t tseng akn wu. 33Amma aner aSamariya akak a t se be kutseng wu, a t b nar aner ame t ku se. A t fa ku di ne a r riy wu. 34A tseng nufe aner ame nong a t ku kusu ifor'e be ashi kakon a ta yis ye anap, ne a ni te name nong a t rosom. Ne a sok aner ame natoon azhaki wu nong a t tseng'e nar tsen tu ku ks, ne a ni sak riy ni wu. 35Naya katson'e, a sok ica itsm a ta yis ye adinari ifa a t nk aner a tin sak riy nar ame nong a t f be wu ye, Inga, ni sak riy ni wu. Koakye ne wan ti fr ni wu, nizen iya mi b ne i ni tak, mi t ka karang. 36Ayong aYeso t rip ye, Kayr ner ataar na, wan di ye angan ne a nye afegbak atek nufe aner gbang kpatang tu ku tsor na ? 37Ayong aner a ta ren Itsi ame f be aYeso ye, Aner a t r riy aner'e. Ne aYeso f be wu ye, T, tseng ta se nye anong gip. 38Nizen aYeso be limazhiri wu t se be kutseng, gor nuwp kukak yong abining akak a t ku yis ye aMarta b a t ku shan niren nong a t n kari wu. 39aMarta ame be angasnyining akak a t ku yis ye aMarya, a sonong nashn aYeso nong a t foos ikr aYeso t se be kutaas'e. 40Amma aMarta s kudaam kamok riy wu se ninye kanyk ikr i ta se nashn wu. Ayong a b nufe aYeso nong a t f be wu ye, Agwm gwm, wan di angasnyining'i t min won nong mi ta nye itomong mi zr aa? F be wu nong a tin s mo. 41Ayong aYeso f be wu ye, aMarta! aMarta! Wan min te riy wan nikr didng ma i n nudaam. 42Ikng izining ne i nye igbang'e nusor wan. aMarya n kasa iya i ta se gyr, ka akak tin shan ba.

will be added

X\