aFisa 6

1Yin inoon, kuus yin ikr iya da yin kayr Agwm gwm ta f be yin, kamok i se gyr yin ta nye anong. 2Itsi Adakunom ife imsng'e iya a tin nk kut natoon'e f ye, Tiyiik ada wan be ang wan. 3Ke wan nye anong Wan ta fok kusas kusor wan ne i bun i s kuks kusp nazatse. 4Yin tek inoon, sang tu sak yin inoon yin ta nye riy kubeseng ba, amma ku kunees yin ba be itabak ne i kubsp yin ba iren Agwm gwm. 5Yin sam, kuus yin ikng iya tekasa yin fe kazatse ta f be yin be inyim ne ikap kutiim be riy rizining kyndi aKiristi ne yin sen ku nye yin'e. 6Sang tu nye yin nong ta ka karp yin ba ay ka kamok ba ta ka yrk yin tsek ba, amma kyndi sam aKiristi ne i nye yin ikng iya Adakunom ta shim be riy rizining. 7Nye yin itomong yin be ifeng kyndi yin sen nye yin Agwm gwm'me sang anerawe ba. 8Kamok yin ren yin ye Agwm gwm t nk koangan ishorong wu kamok koakye kuri ikng itek aner'e t nye ko a tu nye asam ka aya a ta sor washak. 9Yin tekasa nye yin anong be sam yin gip. Sang ta ka shirik yin ba ba. Ren yin ye yin be ba cicr Atekasa yin se kayr kaza, wu kasa akak zr ba. 10Ni igang'e cicr, nyeseng yin be agap kayr Agwm gwm be agbang kukyem wu. HK00194b.tif Horace Knowles; The British & Foreign Bible Society aSozha agbugbang'e akak 11Te yin ares itsom kuri fe Adakunom cei nong as ta kyem i nyeseng yin be agap ne i tnng yin kanyk amaan aner. 12Kamok sang kuren yir se be nask be rinam ba, amma be amaan nabik ta se natoon kaza ne fe rigwm ne fe kukyem ne ya rigwm awhi kazatse na ta se nubk ba. 13Kamok anong, te yin ares itsom kuri fe Adakunom cei nong as ta kyem i nyeseng yin katuk amaan kunom'ong, nong ke yin gang yin koakye ne a ka s yin nunyeseng kpa. 14Kamok anong, nyeseng yin be agap, katsak tu sor ikng kurosom kutin yin ne kuse zhl nye kukpiin kutsm kufe itsom yin. 15Kanyk kutaas Rif Ritek, tu sor kyndi akpatak na atak yin. 16Awan anong tsek ba, won kunk katsak tu sor ikpaar yin, iya yin tanin riming yin kurng afer amaan aner'ong. 17Te yin kashesh yin kyndi ribong kutsm ne awn itsor ife Kabik Kazhl'e iya i ta nye rif Adakunom. 18Yiir inye yin aduwa koakye izen kayr kukyem Kabik. Nye yin aduwa ne i rip yin koakye kuri ikng iya yin ta tsr yin. Sor yin be kanyk koakye izen ne i ya yin kashn be aduwa kamok zhl'e. 19Nye yin aduwa kamok'i gip, nong as Adakunom tin nk ikng iya mi tana f nong mi t taas nerawe Rif Ritek riya ri ta se nunrng dar inyim dim. 20Kamok Rif Ritek na ne mi te aner kutom, aya a ta se kayr izining. Nye yin aduwa nong as nizen iya mi ta sen taas kutom'e mi ta taas dar inyim kyndi mi ta shim. 21aTikikus, agbang aronyining yir ne a bun a nye asam Agwm gwm, aya a ta be katsak, t b nufe yin nong a t ka tak yin koakye natoon kutser'i be kuri ikng mi ta sen nye'me aze. 22Agbang ikng i ta sak mi ta sen ku tom nufe yin se, nong yin ta ren yin kutser yir ne wu bun a ka tsesek yin. 23roneng, mi mok ye Adakunom a ta nye Ada yir ne Agwm gwm yir aYeso Kiristi t ka nk yin kameneng riy, kushim be kunk katsak yin ni ibarang. 24Ritek se mak be ya a ta shim Agwm gwm yir aYeso Kiristi cicr ne kushim kuya sang ku tana gang ba.

will be added

X\