aKolosi 4

1Yin tekasa nye yin be sam yin gyr ne i se yin whiwh kamok yin ren yin ye yin gip yin be yin Atekasa akak kayr kaza. 2Ni te yin riku ninye aduwa, ne i nye yin tatan ne i nye yin riy rikan be Adakunom. 3Nye yin aduwa kamok yir gip, nong as Adakunom tin karak yir iren kutaas rif wu nong ta taas yir kanyk aKiristi kaya ka ta se nunrng kafe sang akak ta ren ba, kamok anong ne a min te nitsm. 4Ni nye yin aduwa nong mi ta kyem i taas rif na gyr, kyndi mi tana kyem i nye. 5Sak yin riy be kutseng yin kayr ner aya sang ta nye fikuus ba. Ni nye yin itomong be koakye izen ife yin ta s yin. 6Won rif yin tu sas kufok nong as yin ta ren yin kuri iren iya yin tana f yin be koangan aya a tana ka nye yin kurip. 7aTikikus ta ka tak yin koakye kuri ikng iya i ta sen tseng natoon'i. A nye agbang aroneng, aya a ta nye itomong be katsak ne a nye asam afudang itomong'i kayr itomong Agwm gwm yir. 8Mi tu ku tom nufe yin nong yin ta ren yin ikng iya i tin se yir kayr'e ne a ka tsesek yin. 9A t b mak be aroneng yir akak aOnesimus aya yir tu ku shim yir ne a be kuse kutek. Ba ta ka tak yin koakye i ta sen tseng azena. 10Aristakus, aya i ta se yir nitsm mak ta nye yin ashou. aMarkus aronyining rifam aBarnabas ta nye yin ashou gip, wu ne yin kun fok yin itak natoon wu, ku shan yin ibk ifa ke a b nufe yin. 11aYeso, aya a t ku yis ye aZhostus ta nye yin ashou gip, igak ner aYahuda ya a ta se ni itomong rigwm Adakunom mak be mi'ong. 12Abafaras a ta nye azining kayr yin ne a bun a nye asam aYeso Kiristi ta nye yin ashou. A yiir rus ne a ka nye yin aduwa didng koakye izen nong yin ta kyem i nyeseng yin be agap ne i nye yin ikng iya Adakunom ta shim. Kyndi ya a ta min nk katsak na Adakunom be riy rizining. 13Mi be rice mi, mi ta kyem i f natoon Abafaras ye a s risam nong a ta ka tobok yin ne ner aLaudikiya ne fe aHirapolis. 14Aferim yir aLuka aya a t nye abok'e be aDemas cicr ba ta nye yin ashou. 15Nye shou yin roneng ta se na aLaudikiya be angasnyining yir aNimfa ne fikuus ta nyiis kari wu. 16Ke gang yin ku fa yin kufumung na ne i tom yin ner ta se na Ikilisiya aLaudikiya'me nong ba gip ta ma fa. Yin gip ma fa yin kufumung ba tana ka tom yin'e gip. 17Tak yin Akipus ye a ra sak riy nong a ta gang itomong'ong Agwm gwm t ku nk. 18Mi aBulus ne i zibir ashou na be kubk'i, tu tiburum yin ye mi na aze nitsm ba. Ritek Adakunom se mak be yin.

will be added

X\