2 aKoranti 13

1Iyu ne i ta nye ku b mi kufe ataar nufe yin. A ta s katsak koakye be rif ner afa ka ataar ayi kyndi rif Adakunom. 2Izen mi ta b nufe yin ife afa mi t krk yin kuto. Mi bun i toos'e. Ke mi bun i b, mi ta won fe a tan nye rinn gbugbang t tseng warak ba, ko aner azining ba. 3Kum yin ta sen tsr yin ikng iya i ta tonong ye aKiristi f kanu be mi. Wu ymng ba, amma a be agap a tana nye koakye ikng be yin. 4Katsak'e nye ye, a tu tigak kayr kuymng kuri rif rinerawe, gip be anong ne wu ti sor kamok kukyem Adakunom. Anong ne yir ymng yir kayr wu, gip be anong ne kukyem Adakunom yir ta sor yir mak be wu nong a ta ka nye yin itomong. 5Maas yin rice yin nong ta di yin ka yin kuus yin aYeso Kiristi kayr katsak'e, bmng yin rice yin, yin ren yin ye aYeso aKiristi se kayr yin, sang ke yin kpa yin kumaas ba. 6Mi mok ye, yin ren yin ye, sang yir kpa yir kumaas'e ba. 7Kyrna, yir nye yir aduwa be Adakunom ye yin ta nye yin ikng ikak imaan'e ba. Sang nong nerawe ta di ye yir n ya yir kumaas'e ba, amma nong yin ta nye yin ikng iya i ta se gyr, ke yir kpas yir. 8Kamok yir ta kyem i nye yir ikng ikak tana tnng yir katsak ba, ma ke nong katsak'e ta ya kashn tsek. 9Yir nye yir riy rikan ke yir se yir gbrk, amma ne yin se yin gbugbong. Yir nye yir aduwa ye yin ta shining yin. 10Ikng i ta sak mi ta sen ka zibir yin ikr na, kamok mi ta se mak be yin ba, nong ke mi b, mi ta ba f be agap ba. Kukyem Agwm gwm tin nk na se nong ta ka nk mo yin sang nong tin yirik ba. 11Ni igang'e, roneng, ma yin katuk kakak. Naka tsesek yin nong ta shining, fok yin izong'i, sor yin be riy rizining, sor yin caang. Be anong ne kushim Adakunom ne kameneng riy ta se mak be yin. 12Na ka nye yin ashou be ku naka kur kuzhl'e. 13zhl'e aze cicr ta ka nye yin ashou. 14Ritek Agwm gwm yir aYeso Kiristi ne kushim Adakunom be kunyim rice Kabik Kazhl'e se mak be yin cicr.

will be added

X\