TAITO 3

1Tukuna tiko ga vei ira na tamata lotu me ra dau talairawarawa ki na matanitu kei ira na veiliutaki; me ra talairawarawa vei ira ka vakarau tu me ra cakava na veieakacaka vinaka kece ga. 2Me ra kakua ni vosavakacacataka e dua na tamata se dau veivala, ia me ra yalomalua ga ka vakarokorokotaki ira na tamata kece ga. 3Ni ko i keda vaka i keda eda a lialia ka dau talaidredre e liu. Eda a vakacalai ka vakabobulataki e na gagadre kei na veimataqali marau e vuqa. E a sinai na noda bula e na veiqati ca kei na vuvu. Era a cati keda na tamata ka da a veicati vaka i keda. 4Ia ni sa vakatakilai mai na yalo vinaka kei na loloma ni Kalou na noda i Vakabula, 5sa vakabulai keda ko koya. E a sega ni vakabulai keda e na vuku ni noda caka dodonu, e na vuku ga ni nona loloma. Sa vakabulai keda ni sa vakasavasavataki keda e na veivakasucumi vou kei na veivakavoui ni Yalo Tabu. 6Ni sa sovaraka vakayauyau mai na Yalo Tabu na Kalou e na vuku i Jisu Karisito na noda i Vakabula, 7me da vakadonui kina e na nona loloma ka me da taukena kina na bula tawa mudu eda namaka tiko. 8Sa dina na veika kece au sa tukuna oti oqo. Au vinakata mo vakabibitaka tiko ga na veika oqo, me ra cakava tiko ga kina na ka vinaka ko ira era vakabauta na Kalou ni sa vinaka na veika oqo ka yaga raraba vei ira na tamata. 9Ia mo kakua ni vakaitavi e na veileti sega na betena, na tuva kawa, na veiba, kei na veiletitaka na lawa i Mosese ni ra sa ka mate wale ga ka tawa yaga. 10Ia kevaka ko sa vunauca vakarua e dua e vakavuna tiko na veisei ka sega tiko ga ni rogoca, mo kakua tale ni kauwaitaka na tamata koya. 11Sa yaga mo kila ni sa tamata ca na tamata koya ka sa vakaraitaka na nona i valavala ca ni sa cala dina. 12E na gauna au na tala yani kina vei iko e dua vei rau ko Aritema se ko Tikiko tovolea sara e na nomu i gu taucoko mo lako mai vei au ki Nikopoli, niʼu sa nakita tiko meʼu na la'ki tiko e kea e na vula i liliwa. 13Tovolea mo vukei Sina na loya kei Apolosa e na nodrau i lakolako, me kua ni dua na ka e leqa vei rau. 14Me ra vakavulici tale ga na noda me ra dau cakacaka e na vei cakacaka e dodonu ka vinaka, me ra rawata kina na veika a yaga e na nodra bula, ka me kakua ni tawa yaga tu ga na nodra bula. 15Era sa loloma tu yani vei iko ko ira kece sara era tiko vata kei au. Keimami sa loloma kece sara tale tu ga yani vei ira na noda i tokani e na vakabauta. Me sobuti kemuni kece ga na loloma ni noda Kalou.

will be added

X\