TAITO 2

1Sa nomu i tavi mo vunautaka na ka e salavata kei na i vakavuvuli dina. 2Vakarota me ra yalomatua na qase, me ra loma vuku ka lewai ira vakavinaka, me taucoko vinaka na nodra vakabauta, me ra dau loloma ka dau vosota. 3Me vaka tale ga kina ko ira na yalewa qase, me tiko vei ira na yalo e veidokai ka me ra kakua ni dau veibeitaki vakailasu se dau mateni. Ia me ra dau vakatavuvulitaka na ka vinaka, 4ka tuberi ira na yalewa gone me ra dau lomani ira na watidra kei na luvedra. 5Me ra yalomatua, yalosavasava, radinivale vinaka, yalovinaka ka dau talairawarawa vei ira na watidra, me kakua kina ni vosa vakacacataki na vosa ni Kalou. 6Vakamasuti ira tale ga na cauravou me ra lewai ira vakavinaka. 7Ia ko iko sara mada ga mo i vakaraitaki vinaka e na ka kece ga ko cakava, ka mo vakaraitaka na dodonu kei na bibi ni nomu i vakavuvuli. 8Na veika kece ko tukuna me dina ka sega ni vakamelei rawa me na vagalui kina na meca ka sega na ka ca e kaya rawa me baleti keda. 9Vakaroti ira na bobula me ra talairawarawa vei ira na nodra turaga e na ka kece ga. Me ra kakua ni dau sauma na nodra vosa na turaga, 10se me ra butakoca na veika era taukena. Me ra vakaraitaka ga na nodra yalodina e na ka kece ga, ka me ra vakarogovinakataka kina na i vakavuvuli ni Kalou na noda i Vakabula e na ka kece era cakava. 11Sa vakaraitaki mai na loloma ni Kalou me ra vakabulai kina na tamata kece ga. 12Sa vakavulici keda me da biuta tani na i tovo kece ga e sega ni tovo vakalou kei na gagadre ca vakayago, ka me da yalomatua, yalosavasava ka i tovo vakalou e na vuravura oqo, 13ni da sa waraka tiko na kena yaco mai na ka ni veivakalougatataki eda a namaka tiko, koya na rairai mai ni noda Kalou levu ka noda i vakabula ko Jisu Karisito e na nona lagilagi taucoko. 14Sa i koya ka a soli koya vaka i koya e na vukuda me voli keda mai na i valavala ca kece ga sa vakasavasavataki keda ka qisi keda me da nona tamata savasava, ka me da dau taleitaka na caka vinaka. 15Sa i koya oqori na veika mo kaya, vakayagataki na kaukauwa kece sa soli vei iko mo veivakauqeti ka veivunauci kina. Kakua ni laiva e dua me beci iko.

will be added

X\