TAITO 1

1Oqo na i vola i Paula e dua na bobula ni Kalou ka i apositolo i Jisu Karisito. Au sa talai me'u tara cake na nodra vakabauta na tamata digitaki ni Kalou ka vakavulici ira e na i vakavuvuli dina ni noda lotu, 2sa kena yavu na vakanuinuitaki ni bula tawa mudu. E sa yalataka makawa sara tu na bula oqo na Kalou, o koya sa sega ni dau lasu. 3Ia ni sa yaco mai na kena gauna dodonu sa qai vakaraitaki kina ko koya e na nona i tukutuku. A sa lesi vei au me'u vunautaka na ka oqo e na lewa ni Kalou na noda i Vakabula. 4Au sa volavola yani kina oqo vei iko Taito na luvequ dina e na vakabauta eda sa taukena vata. Me nomu mada ga na loloma kei na vakacegu mai vua na Kalou na Tamada kei Karisito Jisu na noda i vakabula. 5Au a biuti iko yani mai Kiriti mo tuvana vakavinaka na veika ka ra sa vo tu, ka lesi ira e so na qase e na veikoro me vaka au a vakarota vei iko. 6Na tamata me digitaki me sega ni dua na ka e vakamelei rawa vua, me dua ga na watina me ra tamata vakabauta va-Karisito na luvena, me ra i tovo vinaka ka kakua ni beitaki rawa e na dua na ka. 7Sa dodonu me kakua ni beitaki e na dua na ka ko koya e veiliutaki e na lotu me vaka ni sa dauniyau ni Kalou, ka sa sega ni dodonu me qaciqacia se yalototolo se dau mateni se i tovo kaukauwa se kocokoco. 8Ia sa dodonu ga me tamata dau vakacegui ira na vulagi, me dau vinakata na ka kece ga e vinaka, me yalo matua, me yalododonu, yalosavasava ka me dau lewai koya vakavinaka; 9me taura dei na i vakavuvuli dina sa vakatavulici kina ka me rawa kina ni vakatavuvulitaka na i vakavuvuli vinaka ka vakadrukai ira era via vakatanitaka. 10Ni ra sa lewe vuqa na tamata be era tiko e keri, vakauasivi e na kedra maliwa na Jiu era sa lotu. Era sa vagolea tani na nodra vakasama na tamata e na nodra vosa veivakacalai. 11Sa dodonu me ra vagalui ni ra sa vakacacani ira kece na veivuvale e vuqa e na nodra vakatavuvulitaka na veika e sega ni dodonu me rawa ga kina na i lavo. 12E dua sara mada ga vei ira na kai Kiriti, o koya era okata me dua na parofita, e a kaya vaka oqo: “Era tamata lasulasu na kai Kiriti, era sa vaka na manumanu ca, daukana ka vucesa.” 13E vosa dina koya. Ia sa dodonu mo vunauci ira sara vakaukauwa me ra dei tiko kina e na vakabauta dina, 14ka kakua ni vakarogoca na nodra i tukuni walega na Jiu kei na nodra i vakavuvuli na tamata sa vakanadakuya na ka dina. 15Vei ira era yalo savasava sa savasava na ka kece ga; ia vei ira sa dukadukali ka tawa vakabauta sa sega ni dua na ka e savasava; sa dukadukali ruarua na nodra vakasama kei na lomadra. 16Era kaya ni ra kila na Kalou, ia era sa cakitaki koya e na nodra i tovo. Era sa tamata vakasisila, dau talaidredre ka sega ni rawa me ra cakava rawa e dua na ka vinaka.

will be added

X\