ROMA 9

1Na ka au kaya tiko e dina; au sa nei Karisito ka'u sa sega ni lasu, sa vakadinadinataka mai na noqu lewa e loma e na cakacaka ni Yalo Tabu ni'u sa sega ni lasu. 2Sa ka levu dina na noqu rarawa, ka sega ni oti rawa na mosi ni yaloqu me baleti ira na kai noqu, ko ira na tiki ni yagoqu ka noqu dra dina! 3E vinaka cake vei au me a tau vei au na cudru ni Kalou ka'u tawasei tani mai vei Karisito kevaka e rawa ni ra vukei kina. 4Sa i ira na tamata digitaki ni Kalou. Sa okati ira ko koya me ra luvena ka a vakaraitaka vei ira na nona i serau lagilagi. E a cakava tale ga na nona veiyalayalati kei ira, ka solia vei ira na Lawa. E ra sa kila tale ga na sala dodonu ni nona qaravi ka sa nodra tale ga na vosa ni yalayala. 5Sa i ira na nodra kawa na Pateriaki (koya ko ira na nodra qase na Isireli). E na tikina vakayago e a mai sucu tale e na nodra kawa tamata na Karisito. Ia me vakacaucautaki tiko ga na Kalou, o koya sa lewa na ka kece ga ka sega ni mudu! Emeni. 6Au sega ni kaya ni sa sega ni yaco na vosa ni yalayala ni Kalou; ka ni ra a sega ni Isireli dina ko ira kece na kawa i Isireli. 7Era a sega tale ga ni luve ni Kalou kece na kawa i Eparaama, ka ni a kaya na Kalou vei Eparaama, “Era na okati me ra nomu kawa ko ira na kawa i Aisake .” 8E kena i balebale oya ni ko ira na gone e ra sucu ga mai vakadodonu vakayago, era sega ni luve ni Kalou; ia ko ira ga na gone era sucu mai me vaka e yalataka na Kalou, era sa okati me ra nona kawa dina. 9Ka ni a vaka oqo na vosa ni yalayala ni Kalou, “Au na lako mai e na gauna vata oqo e na yabaki ka tu mai, ka sa na dua kina na luve i Sera tagane.” 10Ia e sega ni o koya wale ga oya: ni ko i rau na luvei Repeka tagane e tamadrau vata ga ko Aisake, na tukada. 11Ia me rawa ni vakaraitaki kina ni sa digidigi sara ga ni Kalou vakai koya ka sega ni a veikacivi e na vuku ni cakacaka sa cakava e dua vei rau na drua (ka ni rau sa bera ni sucu ka sega ni se dua vei rau me cakava e dua na ka vinaka se ka ca). 12Sa kaya vei tinadrau ko koya: “E na dau qaravi koya e gone ko koya ka qase” 13Me vaka tale ga sa volai tu e na i Vola Tabu, “Au sa lomani Jekope ka'u cati Iso.” 14Ia a cava me da qai kaya? Sa sega beka li ni dodonu na Kalou? E sega sara. 15Ni a kaya vei Mosese ko koya, “Au na lomani koya au sa via lomana ka'u na yalovinaka vei koya au sa via yalovinaka vua.” 16O koya gona sa sega kina ni vakatau ki na ka e vinakata se cakava na tamata, ia e na loloma ga ni Kalou. 17Ni sa kaya na i Vola Tabu vua na Fero, “Au sa buli iko sara ga me kilai kina na yacaqu e vuravura taucoko.” 18O koya gona oya sa yalovinaka kina na Kalou vei koya sa vinakata, ka vakayalokaukauwataka na tamata e vinakata me yalo kaukauwa. 19E na dua vei kemuni e na kaya mai vei au, “Ke dina oya, e na qai rawa vakacava vua na Kalou me beitaka ni cala e dua na tamata? O cei e na rawa ni vorata rawa na lomana?” 20Ia ko cei ko iko, na wekaqu, mo sauma na vosa ni Kalou? Na kuro qele e na sega ui rawa ni vosa lesu vei koya e buli koya me kaya, “Na cava ko buli au kina vakaoqo?” 21Ni sa tu vua na dautulikuro na nona dodonu me lewa ga na nona vakayagataka na qele me vaka na ka e vinakata; sa rawa ni bulia e rua na kuro mai na dua ga na i buli qele, ka me cakava e dua na kena e sau dredre se dua ga na kena e sau rawarawa. 22Sa vaka kina na Kalou e na ka e sa cakava. Sa vinakata me vakaraitaka na nona cudru, ka vakatakila tale ga na nona kaukauwa. O koya gona oya sa dede dina kina na nona vosoti ira ka sa dodonu me ra cudruvi, ko ira sa ganita me ra vakarusai. 23Sa via vakaraitaka tale ga ko koya na levu ni nona vinaka, vei keda na lewe ni ka sa lomana ko koya, ko i keda eda sa vakarautaki me da vakaivotavota e na nona i serau lagilagi. 24Ka ni sa i keda ga sa kacivi keda ko koya; e sega ni kacivi keda wale ga mai vei ira na Jiu, mai vei ira tale ga na kai matanitu tani. 25Ni sa i koya oqo na ka e kaya na i vola i Osea, “O ira era a sega ni noqu tamata au na kacivi ira me ra ʻNoqu Tamata.ʼ Na matanitu au a sega ni lomana au na kaciva me ʻNoqu Daulomani.ʼ 26Kei na vanua sara ga e a tukuni toka kina vei ira ʻKo ni sa sega ni noqu tamata,ʼ era na vakatokai kina me ra luve ni Kalou Bula.” 27A kacivaka ko Aisea na ka e baleti ira na Isireli, ka kaya, “Kevaka sara mada ga era yaco na Isireli me ra lewe levu me vaka na i wiliwili ni mata ni nuku e na matasawa, ia era na lewe vica ga era na qai vakabulai; 28ka ni na vakayacora na Turaga na nona lewa e vuravura taucoko me vaka sa kaya oti tu; e na totolo ka kaukauwa.” 29E na vaka talega na ka e a sa kainaka oti tu ko Aisea, “Kevaka e a sega ni vakavoca toka vei keda e so na noda kawa na Turaga na Kalou Kaukauwa, keda sa vakataki Sotoma, ka tautauvata kei Komora.” 30Sa i koya oqo na lewe ni ka keitou kaya tiko: Ko ira na kai matanitu tani era a sega ni saga me ra vakadonui, sa vakadonui ira oqo na Kalou e na vuku ni vakabauta. 31Ia ko ira na Isireli, era vakasaqara tiko e so na lawa me vakadonui ira kina na Kalou, ka ra sa sega tiko ga ni kunea. 32A cava era sega tiko ga kina ni kunea? Baleta ni ra vakararavi tiko ga ki na nodra sasaga vaka i ira ka ra sega ni yavutaka na nodra cakacaka e na vakabauta. Era sa tarabe e na vatu ni veivakatarabetaki, 33e kainaki toka kina e na i Vola Tabu: “Raica, au sa vakotora toka mai Saioni e dua na vatu, e na vakatarabetaki ira na tamata; e dua na vatu era na tacaqe kina. Ia ko koya e na vakabauta e na sega ni vakamaduataki!”

will be added

X\