ROMA 8

1O Koya oqo sa sega kina ni wilika na Kalou na nodra cala ko ira era sa tu vata kei Karisito Jisu. 2Ni sa sereki au mai na lawa ni valavala ca kei na mate na lawa ni Yalo Tabu, o koya ka sa kauta mai vei keda na bula e na noda tu vata kei Karisito Jisu. 3Ia na ka e sega ni cakava rawa na Lawa e na vuku ni malumalumu ni vakarau ni bula vakatamata, sa cakava oti na Kalou. Sa vakaraitaka ko koya ni sa vakacala na ca sa tu e na i tovo ni bula vakatamata e na nona tala mai na luvena, e na yago sa tautauvata kei na yagoda i valavala ca na tamata, me vaqeyavutaka kina na i valavala ca. 4Sa cakava na ka oqo na Kalou me caka rawa kina na i valavala dodonu e vakarota na Lawa e na noda bula na tamata eda sa bula voli e na veiliutaki ni Yalo Tabu, ka sega ni vaka na i tovo e gadreva na yagoda. 5Ko ira era bula voli me vaka na ka e vinakata na yagodra era sa vakarorogo ki na ka e gadreva na yagodra, ia ko ira era sa bula voli me vaka na ka e vinakata na Yalo Tabu era sa vakarorogo ki na veiliutaki ni Yalo Tabu. 6Me lewai keda na yagoda sa kena i tinitini na mate, me lewai keda na Yalo Tabu sa kena i tinitini na bula kei na vakacegu. 7O koya gona oya sa yaco kina me meca ni Kalou na tamata sa lewa tu na nona vakasama na gagadre vakayago, ni sa sega ni muria tiko na lawa ni Kalou, ka na sega dina ga ni rawa ni muria. 8Ka ni ko ira era sa muria tiko na gagadre ni yagodra era sega ni rawa ni cakava e dua na ka e vinaka vua na Kalou. 9Ia ko ni sa sega ni bula voli me vaka na ka e gadreva na yagomuni, ko ni sa bula voli ga me vaka na ka e gadreva na Yalo Tabu, ke vaka e dina ni sa bula tiko na Yalo ni Kalou e lomamuni. Ni tamata yadua e sega ni tiko vua na Yalo i Karisito e sega ni nona na Karisito ko koya. 10Ia kevaka sa tiko e lomamuni na Karisito, e dina ga ni sa mate na yagomuni e na vuku ni valavala ca, ia sa bula tiko na yalomuni ni sa vakadonui kemuni na Kalou. 11Ia kevaka sa tiko e lomamuni na Yalo i koya ka a vakaturi Jisu cake tale mai na mate, e na vakabula tale ga na yagomuni vakavuravura ko koya e a vakaturi Karisito mai na mate baleta ni vakaitikotiko e lomamuni na Yalona. 12O koya gona kemuni na veiwekani eda sa sega ni vauci tu ki na yago me da vakayacora kina na ka e gadreva na yagoda. 13Ia kevaka ko ni na bula voli me vaka na ka e gadreva na yagomuni ko ni na mate; ia kevaka ko ni sa vakamatea na veika e gadreva na yagomuni e na Yalo Tabu ko ni na bula. 14Ko ira sa liutaki ira na Yalo ni Kalou era sa luve ni Kalou. 15Ni Yalo e solia vei kemuni na Kalou e sega ni yalo ni veivakabobulataki me vakavurea vei kemuni na rere, ia na yalo ga sa qisi kemuni mo ni luve ni Kalou ka yaco rawa kina mo ni kaya vua na Kalou, “Apa! Tamaqu.” 16A Yalo oqo sa vakadinadinataka ki na yaloda ni da sa luve ni Kalou. 17Ia kevaka eda sa luvena, eda na taukena na veivakalougatataki e maroroya tu ko koya me nodra na nona tamata, ka da na taukena vata tale ga kei Karisito na ka e maroroya tu na Kalou me baleti koya; kevaka e da sa vakaivotavota e na nona vakararawataki na Karisito e da na vakaivotavota tale ga e na nona lagilagi. 18Au vakasamataka ni veika rarawa eda sota kaya tiko e daidai e na sega ni rawa ni vakatautauvatani kei na lagilagi e na qai vakaraitaki vei keda e na gauna mai muri. 19Ka ni ra sa wawa tu ka nanamaki tiko na veika kece e bulia na Kalou me vakaraitaki ira mai na luvena ko koya. 20Ni a sa cudruvi tu na vuravura ka yaco me tawa yaga, e sega e na vuku ni ka e vinakata ga na vuravura vaka i koya, ia e baleta ga ni vinakata na Kalou me vaka kina. Ia e koto ga na i nuinui 21ni na yaco me na qai sereki tale na vuravura e na dua na siga me kakua tale kina ni luca se vuca rawa e dua na ka, ka me vakaivotavota e na nodra galala lagilagi na luve ni Kalou. 22Ni da sa kila tu, me yacova mai na gauna oqo era sa vutugu kece tu na veika buli e na rarawa me vaka na rarawa ni vakasucu gone. 23Ia era sa sega ni vutugu wale ga na veika buli, eda sa vutu tale ga e yaloda ko i keda sa tu vei keda na Yalo Tabu, na i matai ni solisoli ni Kalou. Ka da sa waraka na veivakacabecabetaki ni Kalou me qisi keda kina me da luvena ka sereka na veitikida kece me ra galala. 24Ni sa i koya na noda vakanuinui oqo eda sa vakabulai kina, ia kevaka eda sa rawa ni raica na ka e da nuitaka tiko sa qai sega tale ni wili vaka i nuinui koya. Se ko cei mada e dau nuitaka me yaco e dua na ka sa raica tiko? 25Ia kevaka eda vakanuinui tiko ki na ka eda se sega ni raica eda na dau wawa e na yalo vosota. 26Sa vaka kina na nona lako mai na Yalo Tabu me vukei keda e na noda malumalumu. Ni da sa sega ni kila na i vakarau ni masu e kilikili me da vakayacora. Sa vakamamasu tiko ga na Yalo Tabu vua na Kalou e na vukuda e na vutugu e sega na vosa e vakamacalataki rawa kina. 27Ia na Kalou, o koya sa rawa ni raica na yalo ni tamata, sa kila na vakasama ni Yalo Tabu; ni sa dau masulaki keda na Yalo Tabu me vaka na ka e vinakata na Kalou. 28Ni da sa kila ni sa cakacaka tiko na Kalou e na veika kece ga me ra vinaka kina ko ira era sa lomani koya, ko ira sa kacivi ira ko koya me vaka na lomana. 29Ni ko ira sa digitaki ira oti na Kalou sa lesi ira ko koya me ra yaco me ra vakataka na Luvena, me yaco kina na Luvena me ulumatua e na kedra maliwa na tacina. 30O koya gona sa mani yaco kina me vaka oqo: ko ira sa digitaki ira na Kalou, sa kacivi ira; ko ira sa kacivi ira ko koya sa vakadonui ira; ia ko ira sa vakadonui ira sa vota tale ga vei ira na nona lagilagi. 31Na cava tale me da qai kaya e na veika kece oqo? Kevaka sa noda i to na Kalou ko cei e na qai noda meca? 32O koya ka a sega ni bureitaka na Luvena dina, ka ni a soli koya ga e na vukuda kece, e na sega li ni solia wale ga vei keda na ka kece ga? 33Ko cei e na beitaki ira na digitaki ni Kalou? Na Kalou sara ga vakai koya e sa vakadonui ira ka sa okati ira me ra sa i valavala dodonu! 34Ko cei tale e na rawa ni vakacalai ira? Sa i Jisu Karisito ga ka a mate; a sa vakaturi cake tale, sa tiko e na liga i matau ni Kalou e daidai ka sa dau vakamamasu tiko vua na Kalou ko koya e na vukuda. 35Ko cei me na tawasei keda rawa mai na loloma i Karisito? Na ka rarawa li, se na yaluma, se na dauveivakacacani, se na dausiga, se na luvaiwale, se na dauveivakarerei se na i seleiwau? 36Ia me vaka sa volai: “E na vukumuni, keitou sa vakamatei tiko kina e na siga taucoko; keitou sa vakatautauvatani kei na sipi e na vakarau vakamatei.” 37Sega! E na veika kece oqo e da na qaqa kina e na vuku i koya sa lomani keda. 38Ni'u sa vakadinata sara ni na sega tale ni dua na ka me na tawasei keda mai na loloma i Karisito; e na sega ni rawata na mate, se na bula, era na sega ni rawata na agilosi se ko ira na daulewa mai lomalagi, se na veika e yaco edaidai se na veika e na yaco mai muri, 39se na vuravura e cake, se na vuravura e ra. E na sega sara ni dua na ka me na rawa ni tawasei keda mai na loloma ni Kalou sa mai noda e na vuku i Jisu Karisito na noda Turaga.

will be added

X\