ROMA 7

1E na matata vinaka tu vei kemuni na veiwekani na ka au vakarau tukuna oqo vei kemuni ka ni ko ni sa kila kece tu na veika e baleta na lawa. Na lawa e vauca tu na tamata e na gauna e bula tiko kina. 2E vaka kina na yalewa ni sa vauci koya tu na lawa vua na watina tagane, e na gauna kece e bula tiko kina; ia kevaka e sa mate na tagane sa qai galala ko koya mai na lawa ka a vauci koya tu vua na watina. 3Ia kevaka e sa la'ki tiko kaya tale e dua na tagane ni sa bula tiko ga na watina, sa na vakatokai ko koya me dautagane; ia ke sa mate na watina sa yaco me galala vakalawa ko koya, ka sa sega ni wili me dautagane ke vakawati tale kei na dua na tagane. 4Ko ni sa vaka tale ga koya ko i kemuni na wekaqu. E na vuku ni Lawa ko ni sa mate oti, ko i kemuni, baleta ni ko ni sa tiki ni yago i Karisito. Ia oqo ko ni sa qai watina e dua tani tale, koya ko koya ka a vakaturi cake tale mai na mate, me da sa yaga kina vua na Kalou. 5Ka ni gauna eda a se bula voli ga kina vakayago era a cakacaka tiko e na yagoda na veigagadre ca ni yago ni sa vakauqeti ira kina na Lawa, ia e a la'ki tini kece ki na mate. 6Ia oqo e da sa galala mai na Lawa, ka da sa wili vaka na mate vei koya eda a dau bobula tu vua e liu. Eda sa sega ni qai veiqaravi tale e na i vakarau makawa ni lawa volai, ia eda sa veiqaravi ga e na i vakarau vou ni Yalo Tabu. 7A cava me da qai kaya kina? Ni sa i valavala ca beka li na Lawa? E sega ni vaka kina! Ia na Lawa ga au sa qai kila kina na i valavala ca. Ka ni kevaka e a sega ni kaya na Lawa, “Mo kakua ni kocokoco” ke'u a sega ni kila se cava na kocokoco. 8Ia sa qai vakayagataka na i vakaro koya na i valavala ca me vakauqeta kina na veimataqali yalo kocokoco kece ga e lomaqu. Ka ni sa yaco me ka mate wale ga na i valavala ca ke sega na Lawa. 9E na dua na gauna au a sega tu kina ni kila na Lawa; ia ni sa qai yaco me'u kila na i vakaro, sa bula sara mai vakasauri na i valavala ca, 10ka'u sa mai mate sara yani ko i au. Ia nai vakaro ka a dodonu me kauta mai na bula sa qai kauta mai vei au na mate. 11Ni sa kaukauwa na ca e na vuku ni vakaro, ka sa vakaisini au kina ka vakamatei au. 12Ia na Lawa vakai koya e savasava, ka sa savasava tale ga, ka dodonu ka vinaka na i vakaro. 13E kena i balebale beka li oqo ni mai vakavuna na noqu mate na ka vinaka? E sega sara! Sa vakavuna ga na noqu mate na i valavala ca; sa vakayagataka na ka vinaka me kauta mai kina vei au na mate, me vakaraitaki kina na i valavala ca e na rokana dina. O koya gona oya e na vuku ni vakaro sa qai vakaraitaki vinaka sara ga kina na levu ni kena ca na i valavala. 14Eda sa kila ni sa ka vakayalo na Lawa, ia o i au, au sa tamata vakayago ga ka a voli au tu na i valavala ca me'u nona bobula. 15Au sa dau sega ni kila na ka au cakava tiko; ka ni veika au vinakata me'u cakava au qai sega ni cakava, ia na veika au sega ni vinakata au sa qai dau cakava tiko. 16Ia me vaka ni'u sa dau cakava tiko na veika au sega ni via cakava sa vakaraitaka oya ni'u sa vakadinata ni vinaka na Lawa. 17Ia sa sega kina ni ko i au dina au dau cakava na vei ka oqo, na i valavala ca ga sa tiko e lomaqu. 18Au sa kila, e na noqu i tovo ni bula vakatamata, ni sega ni dua na ka vinaka e tu e lomaqu. Ka ni dina ga e tu e lomaqu na gadreva me'u cakava na ka vinaka, ia e sega vei au na kaukauwa me'u cakava rawa kina. 19Au sega ni cakava rawa na vei ka vinaka au dau gadreva me'u cakava; au sa dau cakava tiko ga na vei ka ca au cata na cakava. 20Ia kevaka au sa dau cakava na ka au cata na cakava, e kena i balebale oya ni sega ni ko i au sa cakava tiko, na ca ga sa tiko vei au. 21Au sa raica gona kina ni cakacaka tiko na lawa oqo: oya ni'u dau gadreva me'u cakava na vei ka vinaka, qai sega ni bau laivi au na ca. 22E taleitaka na lomaqu mai loma na lawa ni Kalou. 23Ia au sa qai raica ni dua tale na lawa e cakacaka tiko e yagoqu, na lawa oya e saqata na lawa ka taleitaka na lomaqu. Sa vakabobulataki au kina na lawa oya ki na i valavala ca sa cakacaka tiko e yagoqu. 24Au sa tamata vakaloloma dina o i au! O cei e na sereki au mai na yago sa kauti au tiko oqo ki na mate? 25Ia me vakavinavinakataki na Kalou e na vuku ni noda Turaga ko Jisu Karisito! Sa qai vaka tu oqo na noqu bula: au sa qarava na lawa ni Kalou e na noqu vakasama wale ga, ia na noqu bula vakayago sa qarava na lawa ni valavala ca.

will be added

X\