ROMA 6

1A cava tale beka me da qai kaya? Me da ia tiko ga na i valavala ca me tubu vakalevu kina na loloma soli wale ni Kalou? 2E sega sara! E na rawa vakacava vei keda e da sa mate tu ki ua i valavala ca me da sa kitaka tiko ga na i valavala ca? 3Ko ni sega beka ni kila ni ko i keda kece e da sa papitaisotaki vei Jisu Karisito e da sa papitaisotaki me da duavata kei koya e na nona mate? 4O koya gona oya e na noda papitaiso eda sa bulu vata kaya ka vakaivotavota vata kaya e na nona mate, ka me vaka ni a sa vakaturi cake mai na mate na Karisito e na kaukauwa levu nei Tamana, me da sa bula vaka tale ga kina ko i keda e na dua na bula vou. 5Ka ni kevaka e da sa duavata kaya e na mate e a mate kina, e da na duavata tale ga e na tucake tale me vaka na nona tucake tale. 6Ni da sa kila na ka oqo: na noda i tovo ni bula makawa sa vakamatei vata kei Karisito e na nona kauveilatai, me vakarusai kina na bula ni valavala ca, ka me da kakua tale ni bobula tiko ki na i valavala ca. 7Ka ni sa mate e dua na tamata sa sereki mai na kaukauwa ni valavala ca. 8Kevaka e da sa mate vata kei Karisito e da vakabauta ni da na bula vata kaya tale ga. 9Ni da sa kila ni a sa vakaturi cake tale mai na mate na Karisito ka sa na sega tale ni mate rawa, ka ni sa sega tale ni rawai koya rawa na kaukauwa ni mate. 10O koya gona koya e na vuku ni nona mate sa sega tale kina ni kaukauwa vua na i valavala ca; ia oqo ni sa bula, sa bula vata tiko kei na Kalou. 11Me vaka tale ga koya na nomuni vakasamataki kemuni, mo ni sa okati kemuni sara mo ni sa mate ki na i valavala ca ka bula vua na Kalou e na nomuni tu vata kei Karisito Jisu! 12Me sa kakua tale ni vakatulewa tiko e yagomuni na i valavala ca, mo ni kua ni muria tiko kina na gagadre ca ni yagomuni. 13Ni kua tale ga ni solia e dua na tiki ni yagomuni ki na i valavala ca, me caka kina na ka ca. Ia mo ni soli kemuni ga vua na Kalou me vaka na tamata sa kau mai na mate ki na bula, ka mo ni solia na nomuni bula taucoko vua na Kalou me caka kina na veika vinaka. 14Ni sa sega ni dodonu me lewai kemuni tale na i valavala ca, ni ko ni sa sega ni tiko e na ruku ni Lawa i Mosese, ia e na ruku ga ni loloma soli wale ni Kalou. 15Ia sa na qai vakaevei? Me da sa i valavala ca tiko beka ga ni da sa sega ni tiko e na ruku ni Lawa, ka da sa tiko ga e na ruku ni loloma soli wale ni Kalou? E sega sara! 16Ko ni sega li ni kila ni kevaka ko ni sa soli kemuni mo ni vakarorogo vua e dua na tamata, ko ni sa yaco mo ni nona bobula na tamata oya? O koya gona oya kevaka ko ni sa soli kemuni ki na i valavala ca sa na kena i tinitini na mate, ia kevaka ko ni sa soli kemuni vua na Kalou sa na vakadonui kemuni ko koya. 17Ia me vakavinavinakataki mada ga na Kalou! Ka ni ko ni a bobula tu e liu ki na i valavala ca; ia e na dua na gauna sa qai yaco mo ni muria e na yalomuni taucoko na i vakarau ni vakavuvuli ko ni sa vakatavulici kina. 18Ko ni sa sereki mai na kaukauwa ni valavala ca, ka sa yaco mo ni bobula ki na i valavala dodonu. 19Au vosa tiko oqo e na vosa ga e da dau vakayagataka e na veisiga e na vuku ni malumalumu vakatamata e sa tiko vei kemuni. Me vaka ga ko ni a dau solia na veitikimuni taucoko me ra bobula ki na veika dukadukali ka ca me caka kina na veinaki ca kece ga, mo ni sa solia taucoko vaka tale ga e na gauna oqo na veitikimuni taucoko me ra sa bobula ki na valavala dodonu me caka kina na veinaki savasava. 20E na gauna ko ni a sa bobula tu kina ki na i valavala ca ko ni a sega ni bobula tu ki na i valavala dodonu. 21Ia a veika vinaka cava sara mada ko ni sa rawata mai na nomuni cakava na veitovo ko ni sa mai maduataka tiko oqo? Na i tinitini ni veika kece ga koya na mate! 22Ia oqo ko ni sa qai sereki mai na kaukauwa ni valavala ca ka sa yaco mo ni nona bobula na Kalou; a kena yaga vei kemuni sa i koya na bula sa soli vakatabakidua vua na Kalou ka sa kena i tinitini na bula tawa mudu. 23Ni sa i sau ni valavala ca na mate, ia sa i solisoli wale ga ni Kalou na bula tawa mudu, e na vuku i Jisu Karisito na noda Turaga.

will be added

X\