ROMA 5

1Ia oqo ni sa vakadonui keda na Kalou e na vuku ni vakabauta, e da sa qai veivinakati vata kei na Kalou e na vuku i Jisu Karisito, na noda Turaga. 2Sa kauti keda mai ko koya e na vakabauta ki na loloma ni Kalou e da sa mai tu kina oqo. O koya gona e da sa marau kina e na i nuinui sa tu vei keda ni da na vaka i votavota e na lagilagi ni Kalou. 3E da sa dau marau tale ga e na noda sota kaya na veika rarawa ni da sa kila sa dau tubu mai na dauvosota e na noda sota kaya na veivakararawataki, 4na dauvosota sa vakavuna me da vakadeitaki kina mai vua na Kalou, ia na noda vakadeitaki sa tara cake na noda i nuinui. 5Na i nuinui oqo e na sega ni vakamaduataki keda, ni sa sovaraka mai na Kalou ki na yaloda na nona loloma e na cakacaka ni Yalona Tabu. Na Yalo Tabu sa i koya na i loloma ni Kalou vei keda. 6Ni da a se malumalumu tu, sa mai mate na Karisito e na vukuda na i valavala ca, e na gauna sa lokuca na Kalou. 7Sa dua na ka dredre me solia na nona bula e dua na tamata me mate e na vukuna e dua na tamata i valavala dodonu, e dina ni na rawa beka me dua e bolea me mate e na vukuna e dua na tamata vinaka. 8Ia sa vakaraitaka vei keda na Kalou na levu ni nona lomani keda; ka ni da sa ia tiko ga na i valavala ca sa mai mate na Karisito e na vukuda! 9Ia ni da sa vakadonui tu oqo e na vuku ni nona mate, sa macala ni da sa na vakabulai kina sara mai na cudru ni Kalou e na vukuna. 10Ni kevaka e yaco rawa, e na gauna e da se veimecaki tu kina kei na Kalou, me da sa veivinakati kaya tale e na vuku ni mate ni luvena, sa na uasivi cake sara oqo, ni da sa veivinakati tu me da na vakabulai tiko e na vuku ni bula i Karisito! 11Ia e sega ni o koya wale ga oya; eda sa vakavinavinaka tiko vua na Kalou e na vuku ni noda Turaga ko Jisu Karisito, o koya sa mai yaco kina me da veivinakati kei na Kalou. 12E a curu mai ki vuravura na i valavala ca e na vuku ni dua ga na tamata, ia na nona i valavala ca sa kauta vata mai na mate. Sa mani yaco kina me tete na mate ki na tamata kece ga, me vaka ni da sa i valavala ca na tamata kece ga. 13E a sa tu e vuravura na i valavala ca ni se bera ni soli na Lawa; ia me vaka ni a se sega kina na Lawa e a sega ni mani volai na i valavala ca vua na tamata e cakava. 14Ia mai na gauna i Atama me yacova na gauna i Mosese e a lewai ira kece tu na tamata na mate; e bau lewai ira tale ga era sega ni valavala ca e na nodra voroka e dua na Lawa, me vaka na cala e a cakava ko Atama. Ko Atama e a i vakatakarakara kei koya e na qai muri mai. 15Ia e rau sega ni tautauvata na lewe rua oqo, ni sega ni tautauvata na i solisoli soli wale ni Kalou kei na i valavala ca i Atama. Sa dina ni sa levu sara na tamata e mate e na vuku ni valavala ca ni dua na tamata. Ia sa levu cake sara na loloma ni Kalou ka vaka kina na nona i solisoli soli wale vei ira e vuqa na tamata e na vuku ni loloma ni dua na tamata, koya ko Jisu Karisito. 16Ka sa tiko na kedrau duidui na loloma soli wale ni Kalou kei na i valavala ca ni tamata e lewe dua koya. Ni lewa ka a tau mai e na vuku ni dua ga na i valavala ca ka cakava e dua na tamata, e tukuni kina ni da sa cala, ia na i solisoli ka soli wale mai ni sa oti na veicakacala e vuqa, sa kainaki mai kina ni da sa tawa cala. 17Ni kevaka sa yaco me lewai keda ko mate e na vuku ni valavala ca ni lewe dua koya, sa na qai wacava sara na uasivi ni ka e rawata na le dua ka tarava, ko Jisu Karisito. Ka ni ko ira kece era sa ciqoma na loloma vuabale ni Kalou kei na veivakadonui sa solia wale kina ko koya era na qaqa e na bula oqo e na vuku i Karisito. 18Ia me vaka gona ni sa lewai me totogi na tamata kece ga e na vuku ni duabulu ga na i valavala ca, sa lewai vaka kina e na vuku ni duabulu ga na i valavala dodonu me talaci na tamata kece ga ka soli vei ira na bula. 19Ia me vaka na nodra sa okati me ra i valavala ca na tamata e na vuku ni valavala ca ni dua ga na tamata era, na vakadonui tale ga e na vuku ni talairawarawa ni dua ga na tamata. 20E a kau mai na Lawa me tubu vakalevu kina na i valavala ca, ia e na vanua sa levu kina na i valavala ca sa levu cake sara kina na loloma soli wale ni Kalou. 21Ia me vaka gona ni sa kaukauwa ni ca na mate, sa vaka kina sa kaukauwa ni loloma soli wale ni Kalou na i valavala dodonu; sa i koya na loloma oqo ka sa kauti keda tiko ki na bula tawa mudu e na vuku i Jisu Karisito na noda Turaga. Mate ki na i Valavala Ca Ia ka Bula e na vuku i Karisito

will be added

X\