ROMA 4

1Ia na cava me da qai kaya e na vuku i Eparaama na noda qase vakayago? Na cava e a kunea? 2Kevaka e a vakadonui koya na Kalou e na vuku ni veika e a cakava, ke a tu vua e so na ka e dodonu me qaciqaciataka, e dina ga ni na sega ni rawa me qaciqaciataka e na mata ni Kalou. 3E kaya na i Vola Tabu, “Sa vakabauta na Kalou ko Eparaama, ia e na vuku ni nona vakabauta sa okati koya kina na Kalou me tamata yalododonu.” 4Na tamata cakacaka e saumi. Na kena i sau e sega ni rawa ni okati me i loloma ka ni sa rawata ga mai na nona cakacaka. 5Ia na tamata e sega ni vakararavi ki na nona cakacaka, ka sa vakabauta ga na Kalou, o koya sa dau vakadonuya na tamata i valavala ca, sa okati vua na nona vakabauta me i valavala dodonu. 6Sa i koya oqo na ka e a tiko e na loma i Tevita e na nona tukuna na marau ni tamata e sa okata na Kalou me i valavala dodonu, ka sega ni vu mai na dua na ka e cakava: 7“Sa kalougata ko ira sa bokoca na nodra i valavala ca na Kalou, ka sa buluta na nodra caka cala. 8Sa kalougata na tamata sa sega ni okata na nona i valavala ca na Turaga .” 9Na veivakalougatataki e tukuna oqo ko Tevita e nodra wale beka ga na cilivi? Sega, sa nodra tale ga era sega ni cilivi. E da sa tukuna oti ni vakabauta ga sa okati kina me i valavala dodonu ko Eparaama. 10Ia e a yaco e na gauna cava na ka oqo? Ni sa cilivi oti ko Eparaama se ni sa bera ni cilivi? Io e a yaco ni se bera ni cilivi ka sega ni yaco ni sa cilivi oti. 11E a qai cilivi e muri, ka a yaco na nona cilivi me i vakatakilakila me vakaraitaka ni sa nona vakabauta ka vakadonui koya kina na Kalou ka okati koya me i valavala dodonu, ni sa bera ni cilivi. A sa yaco kina ko Eparaama me tamadra vakayalo na tamata kece ga era vakabauta na Kalou ka ra sa vakadonui mai vua na Kalou me ra i valavala dodonu veitalia ga ni ra sa bera ni cilivi. 12Sa tamadra tale ga na tamata sa cilivi ko Eparaama, sega ni baleta ni ra sa cilivi, ia e na vuku ga ni ra sa bula voli tale ga e na bula ni vakabauta ka a bula tiko kina ko Eparaama ni sa bera ni cilivi. 13E na gauna e a yalataka kina na Kalou vei Eparaama kei ira na nona kawa ni ra na taukena na vuravura, e a sega ni cakava vei Eparaama na vosa ni yalayala oya e na vuku ni nona muria na Lawa i Mosese, ia e na vuku ga m nona vakabauta; na vakabauta ka sa vakadonui koya kina na Kalou ka okati koya kina me i valavala dodonu. 14Ia kevaka e soli ga na ka e yalataka na Kalou vei ira era muria na Lawa ke sa na sega ni yaga na vakabauta ka sega tale ga ni yaga na vosa ni yalayala. 15Ni sa Lawa ga ka vakavuna me tau kina na cudru ni Kalou, ka ni vanua e sega kina na lawa e sega tale ga kina na basu lawa. 16Sa i koya gona oya sa yavutaki kina na vosa ni yalayala e na vakabauta, me vakadeitaki kina ni sa i solisoli wale ni Kalou na nona vosa ni yalayala vei ira na kawa i Eparaama ka sega ni vei ira ga era muria na Lawa, ia vei ira tale ga era sa vakabauta me vakataki Eparaama. Ni sa i Eparaama na tamada vakayalo kece ga, 17me vaka sa volai tu e na i Vola Tabu, “Au na qisi iko mo tamadra na veimatanitu e vuqa.” A sa vinaka na vosa ni yalayala e na mata ni Kalou, o koya sa vakabauta ko Eparaama; na Kalou ka a vakabulai ira tale na mate, ka a kacivi ira tale ga me ra bula na veika e sa sega tu vei ira na bula. 18Sa vakabauta ka vakanuinui ko Eparaama ni a se sega na ka me vakanuinuitaka ka sa yaco kina me “tamadra na veimatanitu e vuqa.” Me vaka ga e kaya na i Vola Tabu, “Era na lewe vuqa sara na nomu kawa me vaka na levu ni veikalokalo” 19E na gauna oya e a sa voleka sara kina ni yabaki dua na drau ko Eparaama, ia e a sega ga ni lailai na nona vakabauta ni vakasamataka na yagona, ka ni sa wili sara tu ga vaka na mate, kei na leqa e tiko vei Sera koya ni sega tiko ni rawa ni vakaluveni. 20E sega ni bau yali na nona vakabauta, ka sega tale ga ni bau vakatitiqataka na vosa ni yalayala ni Kalou. Ia sa vakaukauwataki koya ga na nona vakabauta ka sa vakacaucautaka na Kalou. 21E a sega sara ga ni vakatitiqataka ko Eparaama ni na rawa ni cakava na Kalou na ka e yalataka. 22Sa i koya oqo “sa vakadonui Eparaama kina na Kalou ka okati koya me i valavala dodonu e na vuku ni nona vakabauta.” 23Na vosa “sa vakadonui ko koya ka okati me i valavala dodonu,” e sega ni volai me baleti koya taudua ga. 24Sa volai tale ga e na vukuda e da sa vakadonui me i valavala dodonu, ko i keda e da sa vakabauti koya sa vakatura cake tale na noda Turaga ko Jisu mai na mate, 25o koya e a vakamatei e na vuku ni noda i valavala ca ka vakaturi cake tale me da vakadonui kina.

will be added

X\