ROMA 3

1E vakaevei e tiko li e so na ka era uasivi cake kina na Jiu mai vei ira na kai veimatanitu tani? Se dua li na kena yaga na cili? 2Io e levu dina sara na ka era vinaka cake kina na Jiu! Na kena i matai sa i koya ni a soli vei ira na vosa ni Kalou. 3Ia e vakaevei kevaka e so era sega ni yalodina? E kena i balebale li oqo ni nodra sega ni yalodina me sa na sega ni yalodina tale ga kina na Kalou? 4E sega, sega sara, ni vaka kina! E na dina tiko ga na Kalou veitalia ga ke ra lasu kece na tamata; me vaka sa volai tu, “Me kune ni sa dina tikoga na ka ko ni kaya, ka mo ni qaqa ni ko ni sa lewai.” 5Ia e na vakaevei kevaka e mani vakaraitaki vakavinaka cake mai na i tovo ni Kalou e na vuku ni noda i tovo tawa dodonu? E da na kaya beka ni sa caka cala na Kalou kevaka e vakaitotogitaki keda? Ni sa i koya oqo na mataqali taro e na tarogi dina ga e na vakasama vakatamata. 6E sega sara! Kevaka sa sega ni dodonu na Kalou e na qai veilewaitaki vuravura rawa vakaca? 7Ia kevaka e vakaraitaka vakavinaka cake na lagilagi ni Kalou na noqu sega ni dina, a cava au sa okati tiko ga kina me'u i valavala ca? 8Ia na cava e da sega ni cakava ga kina na ka ca me rawa ni yaco kina na ka vinaka? E so na tamata era vakasewasewani au voli ka beitaki au ni'u tukuna na ka oqo; ia era na cudruvi dina ga me vaka sa ganiti ira. 9Ia sa vinaka cake beka na keda i tuvaki na Jiu mai vei ira na kai veimatanitu tani? E sega sara! Au sa vakaraitaka oti ni da sa tautauvata na tamata kece ga, na Jiu kei na veimatanitu tani, ka da sa tu kece ga e na ruku ni kaukauwa ni valavala ca. 10Me vaka e kaya na i Vola Tabu: “Sa sega sara ni dua na tamata e i valavala dodonu, e sega mada ga ni bau dua. 11Sa sega sara ni dua e kila vakavinaka, ka sega ni dua e bau vakasaqara na Kalou. 12Era sa gole tani kece ga mai vua na Kalou era sa yaco vata kece me sega na kedra yaga, ka sega sara ni dua e i valavala vinaka, e sega sara mada ga ni bau dua. 13Sa vaka na i bulubulu sa dola tu na nodra i tilotilo. Sa lako mai na veivakaisini e na yamedra, ka sa tu e na bele ni gusudra na vosa ca me vaka na weli gaga ni gata. 14Sa sinai na gusudra e na veivatonaki kei na vosa gaga. 15Era sa dau totolo ni vakadave dra. 16Sa dau biu tu mai na rusa kei na rarawa e na vanua era sa lakova oti. 17Era sa sega ni kila na sala ni veivakacegui; 18ka sa sega tale ga ni tu vei ira na rerevaka na Kalou” 19Ia e da sa kila ni ka kece ga e vakaroti e na Lawa, e kainaki vei ira era tiko e na ruku ni Lawa, me vagalui kina na nodra i ulubale na tamata kece ga ka me beitaki kina vua na Kalou na kai vuravura kece ga. 20Ni sa sega sara ni dua na tamata e vakadonui mai vua na Kalou e na nona muria na Lawa; na ka ga e kitaka na Lawa, oya e mai vakaraitaka vua na tamata ni sa i valavala ca. 21Ia oqo sa qai vakaraitaka mai na Kalou na sala sa vakadonuya kina na tamata ko koya; ka ni sega ni rawa e na kena muri na Lawa, ia era sa vakadinadina ga kina na Lawa i Mosese kei ira na parofita. 22Io, sa vakadonui ira na tamata na Kalou e na vuku ni nodra vakabauti Jisu Karisito. Sa kitaka na ka oqo na Kalou vei ira kece ga era sa vakabauti Jisu Karisito, ka ni da sa tautauvata kece ga; 23e da sa i valavala ca kece ga na tamata ka sa sega ni kune vei keda na i tovo ni Kalou. 24E da sa vakadonui wale ga e na loloma soli wale ni Kalou ni sa sauma na keda i sere ko Jisu Karisito. 25E a soli koya na Kalou me rawa ni yaco na nona dra me i bulubulu ni noda i valavala ca ko i keda eda sa vakabauta. Sa soli koya na Kalou me vakaraitaka kina na nona dodonu. E liu e na yalo vosota ni Kalou e a sega kina ni cakava e dua na ka me baleta na noda i valavala ca; 26ia oqo sa qai cakava kina ko koya e dua na ka, me vakatakila kina na nona yalododonu. E na ka oqo sa vakaraitaka kina ni Kalou ni sa yalododonu ka ni sa vakadonuya na tamata yadua e vakabauti Jisu. 27Sa qai cava beka e da sa rawata me rawa ni da dokadokataka? E sega ni dua na ka. Baleta na cava? E baleta ga ni noda vakadonui e sega ni da rawata e na noda cakacaka; e rawa ga e na ka sa cakava na Karisito kei na noda vakabauti koya. 28O koya oqo ni keitou sa vakasamataka na veika kece oqo kei na vakadinadinataka ni da sa vakabulai e na noda vakabauti Karisito ka sega e na vuku ni veika vinaka e da cakava. 29Se sa nodra Kalou duadua beka ga na Jiu na Kalou? Sa sega beka ni nodra Kalou tale ga na kai veimatanitu tani? Io sa nodra Kalou tale ga na kai veimatanitu tani. 30Sa duabau ga na Kalou ka na vakadonui ira na Jiu e na vuku ni nodra vakabauta, kei ira na kai matanitu tani e na nodra vakabauta. 31E kena i balebale beka oqo me sa biu laivi na Lawa e na vuku ni vakabauta? E sega, e da sa qai biuta ga na Lawa e na kena i tutu dina.

will be added

X\