ROMA 2

1O koya gona sa sega kina na nomu i ulubale, o iko na dauveivakalewai, veitalia ga se o cei o iko. Ni ko sa vakalewai ira na tani, ka cakava tale tiko ga na ka era dau vakayacora, ko sa vakavuna ga vaka i iko na nomu cudruvi. 2E da sa kila ni sa dodonu na Kalou e na nona cudruvi ira era sa vakayacora na ka oqo. 3Ko nanuma beka na wekaqu ni na cudruvi ira ga na tani era dauveivakalewai na Kalou ka na qai sega ko iko, e dina ga ni ko sa dau veivakalewai tale ga? 4Se ko sa rairai beca na yalovinaka ni Kalou, kei na nona yalololoma kei na nona dauvosota vakadede? Io o iko o sa kila vakavinaka sara ga ni sa yalovinaka dina na Kalou, ka ni sa nona i naki me tuberi iko mo yaco rawa kina mo veivutuni. 5Ia na kaukauwa kei na dredre ni yalomu ko sa binia tiko ga kina na nomu i totogi me bibi cake sara e na Siga sa na vakaraitaki mai kina na cudru kei na lewa dodonu ni Kalou. 6Ni na sauma na Kalou vua na tamata yadua na i sau ni nona i valavala. 7E so na tamata era sa ia tiko ga na i valavala vinaka, ka vakasaqara na lagilagi, na dokai kei na bula tawa mudu. Ia e na solia dina vei ira na Kalou na bula tawa mudu. 8E so era sa nanumi ira ga vakataki ira ka cata na ka e dodonu, me rawa ni ra cakava kina na ka ca. Ia e na sovaraka vei ira na nona cudru waqawaqa na Kalou. 9E na yaco na veika rarawa kei na yaluma vei ira na tamata i valavala ca kece ga, e na liu vei ira na Jiu, ka na qai vaka kina vei ira na kai vei matanitu tani. 10Ia na Kalou e na qai solia na veivakalagilagi, na dokai kei na nona vakacegu vei ira kece era sa cakava na ka dodonu, ka na liu vei ira na Jiu, ka qai vaka talega kina vei ira na kai matanitu tani. 11Ni sega ni dau vakaduiduitaka na tamata na Kalou. 12Ko ira era i valavala ca e na taudaku ni Lawa i Mosese era na rusa e na taudaku ni Lawa. Ia ko ira era sa i valavala ca e na ruku ni Lawa era na lewai e na loma ni Lawa. 13Ni ra na sega ni vakadonui e na mata ni Kalou ko ira kece ga era sa rogoca na Lawa, era na vakadonui ga ko ira era muria na Lawa. 14E sega ni a soli vei ira na kai matanitu tani na Lawa i Mosese, ia e na gauna kece ga era cakava kina vaka i ira e dua na ka me vaka na veika sa tu e na Lawa era sa yaco e na gauna oya me ra Lawa vei ira vaka i ira, e dina ga ni sega vei ira na Lawa i Mosese. 15Na veika era cakava e vakaraitaka ni sa volai tu e lomadra na ka e vakaroti e na Lawa. Sa tukuna tale ga na nodra lewa e loma ni dina na ka oqo, ka ni so na gauna sa dau beitaki ira ka so na gauna e dau taqomaki ira. 16Ia e na siga koya, me vaka na i Tukutuku Vinaka au vunautaka tiko e na veilewaitaka na veika vuni kece ga ka tu e na vakasama ni tamata ko Jisu Karisito e na vuku ni Kalou. 17Ia me da tauri iko mada me kena i vakaraitaki. O sa vakatokai mo Jiu; o sa dau vakararavi tu e na Lawa, ka ko sa dau dokadokataka na nomu Kalou; 18o sa kila tiko na ka e vinakata na Kalou mo cakava; ka ko sa vulica rawa mai na Lawa mo digia na ka e dodonu mai na ka e cala, 19sa vakadinata ni sa i iko na dauveituberi vei ira era mataboko ka vu ni rarama vei ira era tiko e na butobuto; 20o sa dauveivakadodonutaki vei ira na lialia, ka qasenivuli vei ira na yalowai e na veika vakayalo. O sa vakadinadinataka ni sa tu na ka kece sara me kilai kei na dina e na Lawa i Mosese. 21O sa dau vakavulici ira na tani, a cava o sega mada ga ni vakavulici iko kina? O vunautaka me kua na butako, ia o dau butako tiko li? 22O kaya me kua na veibutakoci ia ko veibutakoci tiko li? E dau vakasisila ki na lomamu na veikalou matakau, ia o bau dau la'ki butako li ki na vei vale ni soro? 23O boletaka ni tu vei iko na Lawa ni Kalou, ia ko sa bau vakamaduataka li na Kalou e na nomu basuka na lawa? 24Ni sa kaya na i Vola Tabu, “Sa vosa vakacacataki na Kalou mai vei ira na kai matanitu tani e na vukumuni na Jiu.” 25Kevaka ko muria na i vunau i Mosese, sa na yaga na nomu cilivi ia kevaka ko sega ni muria na Lawa, e vinaka cake ga mo a kakua ni cilivi. 26Ia kevaka e muria na Lawa e dua na kai matanitu tani ka sega tu ni cili, e na sega li ni na okati koya na Kalou me vaka e dua sa cilivi? 27Kevaka ko voroka na Lawa, o iko na Jiu, veitalia ga na kena sa volai tu kei na nomu sa cilivi oti, e na vakacalai iko vakalawa na tamata tawa cili vakaoya, kevaka e muria vinaka tiko na Lawa ko koya. 28Ni sega ni Jiu dina sara ko koya e Jiu e na kena i rairai ga e taudaku, ka cilivi vakayago ga. 29Ia na Jiu dina sara, sa i koya na tamata e Jiu e loma, o koya e sa cilivi e na yalona. Ia sa yaco rawa oya e na cakacaka ni Yalo ni Kalou ka sega ni yaco rawa e na vuku ni Lawa. Ia o koya e sa yaco e na nona bula na ka oqo e na sega ni dokai mai vei ira na tamata, ia mai vua ga na Kalou.

will be added

X\